ශ්‍රී ලංකා ක්‍රිකට් ක්‍රීඩක ඇන්ජලෝ මැතිව්ස් පිටියේ ඇති කළ ප්‍රමාදයක් නිසා පළමුවරට ‘කාලය ඉක්මවා යාමේ‘ වරදට දැවීයාම පසුගිය දිනවල කථාබහට ලක්වූ සිදුවීමකි. මෙම සිදුවීම සිදුවන්නේ ශ්‍රී ලංකාව බංග්ලාදේශය අතර තරගයේදීය.
බංග්ලාදේශ පිලේ ෂකීබ් අල් හසන් විනිසුරුගෙන් කළ ඉල්ලීමක් අනුව මැතිව්ස්ගේ දැවීයාම තීරණය කළේය. ICC රෙගුලාසිවලට කල් ඉකුත් වූ රීතියක් ඇතුළත් වූ නමුත් එය පෙර භාවිතා කර නැත. මැතිව්ස්ට අලුත් හිස්වැස්මක් ලබා ගැනීමේ ක්‍රියාවලියට විනාඩි දෙකක් ගත විය. ප්‍රමාදය දුටු ෂකීබ් විනිසුරුට දැනුම් දුන් අතර මැතිව්ස් කාලය අවසන් වූ බව ප්‍රකාශ කළේය.
මෙම අවස්ථාවේ ක්‍රිකට් විස්තර විචාරයෙහි යෙදුණ කුටිය තුළ, සිටියේ හිටපු ශ්‍රී ලංකා ක්‍රිකට් ක්‍රීඩක රසල් ආර්නෝල්ඩ් සහ පකිස්තාන හිටපු ක්‍රීඩක වකාර් යූනිස්ය. ශකීබ්ගේ ක්‍රියාව හෙළා දකිමින්, එම ඉල්ලීම “ක්‍රීඩාශීලී නොවන හැසිරීමක්” ලෙස ඔවුහු දෙන්නාම ලේබල් කළහ.
මේ විවේචනය බංග්ලාදේශ ජාතිකයින්ට රිස්සුවේ නැත. හිටපු පකිස්ථාන ක්‍රිකට් ක්‍රීඩක වකාර් යුනිස්ගේ නමට විරුද්ධව ජාත්‍යන්තර ක්‍රිකට් කවුන්සිලයට (ICC) පැමිණිල්ලක් ඉදිරිපත් කරන ලෙස හඩක් නැගිණි.නමුත් එවන් තීරණයක් ගන්නට බංග්ලාදේශ ක්‍රිකට් පාලක මණ්ඩලයේ (BCB) සභාපතිවරයා ඉක්මන් නොවූ අතර ඔහු පසුව දන්වා සිටියේ එවැනි පැමිණිල්ලක් නොකරන බවයි.
මේ වනවිට වාර්තා වන්නේ එවැනි තීරණයක් නොගැනීම සම්බන්ධයෙන් පැහැදිලි කිරීමක් කළ යුතු බවට බංග්ලාදේශ මහාධිකරණය තීන්දු කර තිබෙන බවය.
සඳුදා ශ්‍රී ලංකාව සමඟ පැවති ලෝක කුසලාන තරඟයේදී බංග්ලාදේශ නායක ෂකීබ් අල් හසන් සම්බන්ධයෙන් යුනිස් කළ ප්‍රකාශයට ප්‍රතිචාර වශයෙන් බදාදා මෙකී තීන්දුව ප්‍රකාශයට පත් කරන ලදී.
ෂකීබ්ගේ හැසිරීම සහ බංග්ලාදේශයේ ක්‍රමෝපාය විවේචනය කරමින් යුනිස්, එය ක්‍රිකට් ක්‍රීඩාවේ ආත්මයට පටහැනි බව පැවසීම වරදක් ලෙස නම් කර තිබුණි.
විනිසුරු මුස්තාෆා සමාන් ඉස්ලාම් සහ විනිසුරු එම් ඩී අටබුල්ලා යන විනිසුරු මඩුල්ල විසින් මෙයට හේතු දක්වන ලෙස ඉල්ලමින් තීන්දුවක් ප්‍රකාශයට පත් කරනු ලැබුවේ මේ සම්බන්ධයෙන් ශ්‍රේෂ්ඨාධිකරණයේ නීතීඥ වලියුර් රහ්මාන් ඛාන් විසින් ඉදිරිපත් කරන ලද රිට් නඩුවක මූලික විභාගයෙන් පසුවය.
0 Comments