දුරකථන සමාගමකින් රුපියල් ලක්ෂ 25ක තෑග්ගක් ලැබී ඇති බව පවසා අවන්හල් සහායකයකුගෙන් රුපියල් ලක්ෂ දෙකකට ආසන්න මුදලක් ඊෂි කෑෂ් මගින් වංචා කළැයි කියන සිද්ධියකට අදාළව වංචා කළ දුරකතන අංකය සම්බන්ධයෙන් වන සියලු තොරතුරු බම්බලපිටිය පොලීසියට දෙන ලෙස කොළඹ අතිරේක මහේස්ත්‍රාත් රජීන්ද්‍රා ජයසූරිය මහත්මිය ඊයේ (27) දුරකථන සමාගමක ප්‍රධාන කළමනාකරුට නියෝගයක් නිකුත් කළාය.
මේ සම්බන්ධයෙන් විමර්ශනයක් ආරම්භ කළ බවට සඳහන් කරමින් බම්බලිපිටිය පොලීසිය අධිකරණයෙන් කළ ඉල්ලීමක් සැලකිල්ලට ගත් මහේස්ත්‍රාත්වරිය මේ නියෝගය නිකුත් කළාය.
සිද්ධිය සම්බන්ධයෙන් බම්බලපිටිය පොලීසියට පැමිණිල්ලක් ඉදිරිපත් කරනු ලැබ තිබුණේ ගිලිනුගේවත්ත, සාම්මලේ, නුවරඑළිය පදිංචි බම්බලපිටිය ප්‍රදේශයේ අවහන්හලක සහායකවරයකු වන ස්ටැන්ලස් නිරංජන් නිකොලොස් නමැත්තා විසිනි.
දීර්ඝ කාලයක් තිස්සේ තමන් අදාළ ජංගම දුරකතන අංකය භාවිතා කරන අතර, එම හේතුව නිසා එම සමාගමෙන් තමාට රුපියල් ලක්ෂ 25ක ත්‍යාගයක් හිමිව ඇති බවත් එය ලබා ගැනීම සඳහා ලියකියවිලි ගාස්තු වශයෙන් රුපියල් එක්ලක්ෂ හැත්තෑපන්දහසක මුදලක් දෙන ලෙස ඇමතුමක් ලද බවත් පැමිණිල්ල සඳහන් කළ බව
බම්බලපිටිය පොලීසිය අධිකරණයට කරුණු ඉදිරිපත් කර ඇත.
අදාළ ජංගම දුරකතන ඇමතුමට අනුව එම මුදල අවස්ථා තුනකදී ඊෂි කෑෂ් ලෙස දුන් බවත් පසුව එම ත්‍යාගය ලබා ගැනීමට පැමිණීම සඳහා දුන් දිනයේදී අදාළ අංකය ක්‍රියා විරහිත කර ඇති බවත් පැමිණිල්ල සඳහන් කර තිබූ බව බම්බලපිටිය පොලීසිය අධිකරණයට කරුණු වාර්තා කළේය.
නිමන්ති රණසිංහ
0 Comments