ඉන්දියන් සාගරයේ ගමන් කළ නැවකට ඉරානයෙන් ඩ්‍රෝන ප්‍රහාරයක්

ඉන්දියාවේ ගුජරාට් ප්‍රාන්තයේ වෙරාවල් නගරයට නිරිත දෙසින් නාවික සැතපුම් 200 ක් දුරින් නෞකාවක පිහිටි රසායනික ටැංකියකට ඉරාන ඩ්‍රෝන ප්‍රහාරයක් සෙනසුරාදා (23) සිදුව ඇතැයි ඇමරිකාවේ පෙන්ටගන වාර්තාවක් උපුටමින් බීබීසිය වාර්තා කර තිබේ.
 එක්සත් ජනපද හමුදාව පවසන්නේ යේමනයේ ඉරාන පිටුබලය ලබන හූති කැරලිකරුවන් විසින් රතු මුහුදේ නැව් වෙත ඩ්‍රෝන් සහ රොකට් ප්‍රහාර මාලාවක් මෑතකදී ආරම්භ කර ඇති බවත් මෙම ප්‍රහාරය ඊටම සම්බන්ධිතව ඉන්දියන් සාගරයේදී සිදුවූ බවයි.

පෙන්ටගනය පැවසුවේ Chem Pluto නමැති යාත්‍රාවට "ඉන්දියාවේ වෙරළේ සිට නාවික සැතපුම් 200 ක් (370km)" ප්‍රදේශයේ වේලාවෙන් 10:00 ට (GMT 06:00) පහර දුන් බවයි. නෞකාවේ ඇති වූ ගින්නක් නිවා දැමූ බවත් ජීවිත හානි කිසිවක් සිදු වී නැති බවත් වාර්තාවේ දැක්වේ.
එක්සත් ජනපද මධ්‍යම විධානය (CENTCOM) සෙනසුරාදා කියා සිටියේ
යේමනයේ වැඩි කොටසක් පාලනය කරන හුති කැරලිකරුවන් ගාසා තීරයේ අඛණ්ඩ යුද්ධය හේතුවෙන් ඊශ්‍රායලයට සම්බන්ධ යාත්‍රා ඉලක්ක කර ප්‍රහාර දියත් කරන බවයි.

ප්‍රහාර වැඩි වීමේ අවදානම හේතුවෙන් බොහෝ විශාල ගෝලීය නාවික කණ්ඩායම් රතු මුහුදේ මෙහෙයුම් මේ වනවිට අත්හිටුවා ඇත.
එක්සත් රාජධානියේ සමුද්‍රීය වෙළඳ මෙහෙයුම් (UKMTO) පවසන පරිදි ඉන්දියාවේ ගුජරාට් ප්‍රාන්තයේ වෙරාවල් නගරයට නිරිත දෙසින් නාවික සැතපුම් 200 ක් දුරින් මෙම සිදුවීම සිදුව ඇත.
පහර දීමෙන් ටැංකියේ ව්‍යුහයට හානි සිදු වූ අතර ජලය නැවට ගෙන ගියේය. ඉන්දියානු නාවික හමුදාව මීට සහය දීමට ගුවන් යානයක් සහ යුද නැව් යවා ඇත.