කැනේඩියානු කෝටිපති Softimage අධිපති ඩැනියෙල් හා බිරිය ඩොමිනිකාහිදී අභිරහස් ලෙස මිය ගිහින්

කැනේඩියානු ව්‍යවසායකයෙකු වන ඩැනියෙල් ලැන්ග්ලොයිස් සහ ඔහුගේ බිරිද කැරිබියන් දූපත් රාජ්‍යයක් වන ඩොමිනිකාහිදී සැක කටයුතු ලෙස මියගොස් සිටියදී සොයාගෙන තිබේ.

ලැන්ග්ලොයිස් මහතාගේ සහ බිරිය ඩොමිනික් මාර්චන්ඩ්ගේ සිරුරු සිකුරාදා දිනයේ දී පිළිස්සී ගිය වාහනයක තිබී සොයා ගන්නා ලදී. මෙම අඹුසැමි යුවළ දින කිහිපයක සිට අතුරුදන්ව සිටි බවද වාර්තා වී තිබිණි.

ලැන්ග්ලොයිස් මහතා Softimage නම් සජීවිකරණ මෘදුකාංග සමාගමක් ආරම්භ කළ අතර,  එහි නිෂ්පාදනයන් ප්‍රධාන බ්ලොක්බස්ටර් චිත්‍රපට සඳහා භාවිතා කරන ලදී.

ඩොමිනිකා හි ජාතික ආරක්ෂක සහ නීති කටයුතු අමාත්‍ය රේබර්න් බ්ලැක්මූර් පැවසූවේ, සිද්ධිය සම්බන්ධයෙන් විදේශීය ජාතිකයින් තිදෙනෙකු සහ එක් ඩොමිනිකන් ජාතිකයෙකු අත්අඩංගුවට ගෙන ඇති බවයි.

පොලිසිය විසින් ප්‍රශ්න කරන සිව්දෙනාගෙන් එක් අයෙකු ඇමරිකානු පුරවැසියෙකු බවට පළ වූ වාර්තාවලට ප්‍රතිචාර දක්වමින් එක්සත් ජනපද රාජ්‍ය දෙපාර්තමේන්තුවේ ප්‍රකාශකයෙකු පැවසුවේ “ඩොමිනිකාහිදී එක්සත් ජනපද පුරවැසියෙකු අත්අඩංගුවට ගැනීමේ වාර්තා පිළිබඳව අපි දනිමු." යනුවෙනි.

මිය ගිය අය පිළිබඳ තොරතුරු අල්පය.

1997 දී ව්‍යවසායකයා විසින් නිර්මාණය කරන ලද දානපති සංවිධානයක් වන ඩැනියෙල් ලැන්ග්ලොයිස් පදනම සඳුදා ප්‍රකාශයක් නිකුත් කරමින් කියා සිටියේ,  මෙම යුවළ දෙසැම්බර් 1 වන දින “ඛේදජනක" තත්වයන් යටතේ මිය ගොස් ඇති බවයි. "ඉදිරි කාලයේ දී , ඩොමිනිකන් පොලිස් බලධාරීන් සහ අධිකරණ පද්ධතිය විමර්ශනය යටතේ ඔවුන් මිය යාමේ නිශ්චිත තත්වයන් පිළිබඳ තොරතුරු අනාවරණය වනු ඇත," යනුවෙන්ද එම ප්‍රකාශයේ සඳහන් විය.

 ලැන්ග්ලොයිස් මහතාගේ "තාරකා වෘත්තිය" සමකාලීන සිනමාවට ප්‍රබල බලපෑමක් ඇති කර ඇත. ලැන්ග්ලොයිස් මහතා 1980 දී  Softimage ආරම්භ කිරීමට පෙර කැනේඩියානු ක්විබෙක් පළාතේ අධ්‍යක්ෂකවරයෙකු සහ සජීවිකරණ ශිල්පියෙකු ලෙස කටයුතු කළේය. එහි දී නිර්මාණය කරන ලද ත්‍රිමාණ සජීවිකරණ මෘදුකාංගය Jurassic Park, The Matrix, Star Wars: Episode I - The Phantom Menace සහ Titanic ඇතුළු ප්‍රධාන චිත්‍රපට නිෂ්පාදනය සඳහා භාවිතා කරන ලදී.

1994 දී, සමාගම වාර්තා කරන ලද ඩොලර් මිලියන 130 (පවුම් මිලියන 85) සඳහා මයික්‍රොසොෆ්ට් වෙත විකුණන ලදී. එම අලෙවියෙන් වසර තුනකට පසුව, ලැන්ග්ලොයිස් මහතා Softimage සජීවිකරණ සංරචක සඳහා විද්‍යාත්මක හා තාක්ෂණික කාණ්ඩයේ ඇකඩමි සම්මානයක් ලබා ගත්තේය.

ඔහු Montreal හි ස්වාධීන චිත්‍රපට උළෙලක් වන Festival du Nouveau Cinéma හි සභාපති ලෙස ඇතුළුව,  කලා සහ චිත්‍රපට කර්මාන්තයන් සමග පැවති සම්බන්ධය පවත්වා ගෙන ගියේය.

වඩාත් මෑතකදී, ලැන්ග්ලොයිස් මහතා සහ මාර්චන්ඩ් මහත්මිය ඩොමිනිකා හි කූලිබ්‍රි රිජ් නම් පරිසර හිතකාමී නිවාඩු නිකේතනයක් පවත්වාගෙන ගිය අතර , පුද්ගලයන් 65 දෙනෙකුට මරු කැඳවූ සහ දේශීය ආර්ථිකය විනාශ කළ මාරියා සුළි කුණාටුවෙන් පසුව දිවයිනට උපකාර කිරීම සඳහා ක්‍රියාත්මක වන ඩොමිනිකා ව්‍යාපෘතිය ස්ථාපිත කළහ.

මාර්චන්ඩ් මහත්මිය සත්ව පුණ්‍යායතනයක් වන ඩොමිනිකා හි හියුමන් සොසයිටි සමඟ වැඩ කළ බව ද එම පදනම පවසයි.

X හි සටහනක් දක්වමින් කැනේඩියානු උරුමයන් පිළිබඳ අමාත්‍ය Pascale St-Onge විසින් ලැන්ග්ලොයිස් මහතා හැඳින්වූයේ "ඩිජිටල් තාක්‍ෂණ සහ සිනමාවේ දූරදර්ශී" පුද්ගලයෙකු  ලෙසිනි.