පිස්තෝල වර්ගයේ ගිනි අවියක් සහ ඉපයූ ක්‍රමයක් සඳහන් කළ නොහැකි රුපියල් කෝටි අටකට අධික මුදලක් සන්තකයේ ඇතිව කොළඹ මල් පාරේ පිහිටි තරු පන්තියේ හෝටලයක රැඳී සිටියදී අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් පුද්ගලයන් 8 දෙනා ලබන 13 දා දක්වා රක්ෂිත බන්ධනාගාරගත කරන ලෙස කොටුව මහේස්ත්‍රාත් තිළිණ ගමගේ මහතා ඊයේ (8) නියෝග කළේය.
මෙලෙස රක්ෂිත බන්ධනාගාගරගත කෙරුණේ මහමානගේ රුවන් පුෂ්පකුමාර, මොහොමඩ් ඊර්ෆාන්, ජගත් සඳරුවන්, ඉරසිංහ ආරච්චිගේ ශ්‍රී තමීර චතුරංග, කිසත්සිරි තුසිත කුමාර, හේවා කෝට්ටගේ රජගන, සනත් බණ්ඩාර දිසානායක, මාක් නයිජල් කොල්ලුරේ යන අය වෙති.
ගිනි අවි ආඥා පනත පුපුරන ද්‍රව්‍ය ආඥා පනත සහ මුදල් විශුද්ධිකරණ පනත යටතේ සැකකරුවන් අත්අඩංගුවට ගත් බව අපරාධ පරීක්ෂණ දෙපාර්තමේන්තුව සැකකරුවන් අධිකරණයට ඉදිරිපත් කරමින් දන්වා සිටි අතර පරීක්ෂණ අවසන් නැති බැවින් සැකකරුවන් රක්ෂිත බන්ධනාගාර ගත කරන ලෙස අධිකරණයෙන් ඉල්ලා සිටියේය.
නවීන් පන්නයේ රථ දෙකකින් පිරිසක් නිති විරෝධි ක්‍රියාවක් සඳහා කොළඹ ප්‍රදේශයේ සැරිසරන බවට අපරාධ පරීක්ෂන දෙපාර්තමේන්තුවේ අධ්‍යක්ෂකවරයාට ලද තොරතුරක් මත සිදු කළ පරීක්ෂාවකදී කොල්ලුපිටි මල් පාරේ හෝටලයේ නවීන පන්නයේ රථ දෙකනින් පැමිණි මේ පිරිස අත්අඩංගුවට ගනු ලබන්නේ සැකකටයුතු අන්දමින් සැරසරනු දැක සිදු කළ පරීක්ෂාවකදී බව අපරාධ පරීක්ෂණ දෙපාර්තමේන්තුව අධිකරණයට දන්වා සිටියේය.
පළමු සැකකරු සන්තයේ තිබී පිස්තෝල වර්ගයේ ගිනි අවියද, දෙවන සැකකරු භාරයේ තිබී රුපියල් තුන් කෝටි තිස් හත් ලක්ෂයක මුදලක්ද තෙවන සැකකරු භාරයේ තිබී රුපියල් කෝටි 4ක මුදලක්ද අත්අඩංගුවට ගත් බව අපරාධ පරීක්ෂණ දෙපාර්තමේන්තුව අධිකරණයට දන්වා සිටියේය. මුදල් ගනින යන්ත්‍රයක්ද ඔවුන් සතුව තිබූ බව ද එහිදී අපරාධ පරීක්ෂණ දෙපාර්තමේන්තුව අධිකරණයට කියා සිටියේය.
සුභාෂිණී සේනානායක
0 Comments