අය වැය කෙවනවර කියවීමේ ඡන්ද විමසීම ඊයේ පාර්ලිමේන්තුවේදී වැඩි ඡන්ද 41 කින් සම්මත විය. පක්ෂව 122 ක් හා විපක්ෂව 81 ක් ලැබිණි.චමල් නාමල් ඇතුළු මන්ත්‍රීවරු 21 ක් මෙම අවස්ථාව මගහැර තිබුණි.
2024 වසර සඳහා වන අය වැය සඳහා ඡන්ද විමසීම සිදු කිරීමට කථානායක මහින්ද යාපා අබේවර්ධන මහතා විසින් සීනුව නාද කිරීමට නියෝග කළේය. ඒ අනුව පස්වරු 6.35ට පමණ තෙවැනි වර කියවීමේ ඡන්ද විමසීම පැවැත්විණ. එසේම ඡන්ද විමසීම සඳහා පාර්ලිමේන්තු මන්ත්‍රී සී.වී විග්නේෂ්වරන් මහතා ඡන්දය ප්‍රකාශ කිරීමෙන් වැළකී සිටියේය.
අය වැයට පක්ෂව ආණ්ඩුව සමඟ අනුර ප්‍රියදර්ශන යාපා, ඩබ්ලිව්.ඩී.ජේ. සෙනවිරත්න, අලි සබ්‍රි රහීම්, ප්‍රියංකර ජයරත්න, දුමින්ද දිසානායක, නිමල් ලාන්සා, ඒ.එල්.එම්. අතාවුල්ලා යන මන්ත්‍රීවරු අය වැයට පක්ෂව ඡන්දය ප්‍රකාශ කළහ.
පාර්ලිමේන්තු මන්ත්‍රීවරුන් වන චමල් රාජපක්ෂ, නාමල් රාජපක්ෂ යන මහත්වරුන් ඇතුළු මහජන නියෝජතයන් 21 දෙනෙක් ඡන්ද විමසීම සිදු කරන අවස්ථාවේ සභාවෙහි නොසිටියහ.
හිටපු ක්‍රීඩා අමාත්‍ය රොෂාන් රණසිංහ මහතා ඡන්ද විමසීම සඳහා විරුද්ධව ඡන්දය ප්‍රකාශ කළ අතර සමඟි ජන බලවේගය, ජාතික ජන බලවේගය, දෙමළ ජාතික සන්ධානය යන පක්ෂ නියෝජිතයෝ විරුද්ධව ඡන්දය ප්‍රකාශ කළහ.
2024 වසර සඳහා වන විසර්ජන පනත් කෙටුම්පත දෙවැනි වර කියවීම හෙවත් අය වැය මුදල් අමාත්‍යවරයා ලෙස ජනාධිපති රනිල් වික්‍රමසිංහ මහතා පසුගිය නොවැම්බර් 13 වැනිදා පාර්ලිමේන්තුවට ඉදිරිපත් කළේය. ඉන් පසුව නොවැම්බර් 14 වැනිදා සිට 21 වැනිදා දක්වා, ඉරිදා දිනයන් හැර දින 7ක් විසර්ජන පනත් කෙටුම්පත (අය වැය) දෙවැනි වර කියවීමේ විවාදය පැවැත්විණි.
ඉන් පසුව විසර්ජන පනත් කෙටුම්පත (අය වැය) දෙවැනි වර කියවීම වැඩි ඡන්ද 45කින් නොවැම්බර් 21 වැනිදා පාර්ලිමේන්තුවේදී සම්මත විය.
පසුව 2024 වසර සඳහා වන විසර්ජන පනත් කෙටුම්පත කාරක සභා අවස්ථා විවාදය නොවැම්බර් 22 සිට ඉරිදා දිනයන් හැර දින 19ක් පැවැත්වීමෙන් අනතුරුව තෙවැනි වර කියවීමේ ඡන්ද විමසීම මෙසේ ඊයේ (13) පැවැත්විණ.
0 Comments