මුහුණුපොත හරහා දැන්වීමක් පළ කර උසස් වර්ගයේ සුනඛයෙකු අලෙවි කිරීමට උත්සාහ කළ පයාගල ප්‍රදේශයේ පුද්ගලයෙකුගේ බැංකු ගිණුමෙන් රුපියල් තුන් ලක්ෂ තිස්තුන් දාහක මුදලක් (333,000) සොරා ගත් කල්ලියක සැකකරුවන් දෙදෙනෙකු පෙරේදා (06) අත්අඩංගුවට ගත් බව බේරුවල පොලිසිය පවසයි.
මෙසේ අත්අඩංගුවට පත් වූයේ නුවර, පේරාදෙණිය, මුරුතලාව ප්‍රදේශයේ පදිංචි අවුරුදු 20 හා 22 වයස්වල පසුවන තරුණයන් දෙදෙනෙකි.
පයාගල ප්‍රදේශයේ පුද්ගලයෙකු බේරුවල පොලිසියට කරන ලද පැමිණිල්ලකට අනුව මෙම අත්අඩංගුවට ගැනීම සිදු කෙරිණ.
පයාගල, හල්කඳවිල ප්‍රදේශයේ පුද්ගලයෙකු රුපියල් තිස්පන්දාහකට ‘ලැපිඩෝ’ වර්ගයේ සුනඛයෙකු විකිණීමට ඇති බවට පසුගිය 12 වැනිදා මුහුණුපොතේ දැන්වීමක් පළ කර තිබෙන අතර, දියතලාවේ හමුදා කඳවුරේ සිටින බව පවසමින් 17 වැනිදා පුද්ගලයෙකු එම සුනඛයා මිලදී ගැනීමට කැමති බව පවසා තිබේ. මේ දිනවල නිවාඩු නොමැති බවත් 20 වැනිදා පැමිණිය හැකි බවත් එතෙක් අත්තිකාරම් මුදලක් ලබා දීමට බැංකු ගිණුම් අංකය හා ජාතික හැඳුනුම්පත් අංකය ලබා දෙන ලෙසත් පවසා තිබේ. ඒ අනුව පැමිණිලිකරු විසින් එම තොරතුරු ලබා දී ඇති අතර, සුළු වේලාවකින් එම පුද්ගලයා පවසා ඇත්තේ බැංකුවෙන් එවා ඇති කෙටි පණිවුඩයේ සඳහන් පරිදි ඔන්ටයිම් පාස්වර්ඩ් එක ලබා දෙන ලෙසයි.
එය ලබා දුන් පසුව මෙම මුදල් සොරාගෙන ඇති අතර, පොලිසිය සිදු කළ දීර්ඝ විමර්ශනයේ දී මහනුවර, මුරුතලාව ප්‍රදේශයේ බැංකු දෙකකට මෙම මුදල් වැටී ඇති බව අනාවරණය වී තිබේ.
මොවුන් මුරුතලාව ප්‍රදේශයේ මිතුරෙකුගේ ඒ.ටී.එම්. කාඩ්පත ඉල්ලාගෙන මෙම සොරකම සිදු කර තිබෙන බව මෙහිදි සිදු කළ දීර්ඝ විමර්ශනයේදී අනාවරණය වී තිබෙන අතර, විවිධ පුද්ගලයින්ගේ නම්වලට සිම් කාඩ්පත් ලබා ගෙන ඇමතුම් ලබා දෙමින් මෙලෙස ජාවාරමක් ලෙස සංවිධානාත්මකව සිදු කරන ක්‍රියාවක් බව අනාවරණය වී තිබේ.
තදින් අයිස් මත්ද්‍රව්‍යවලට ඇබ්බැහි වූවන් වන මොවුන් කිහිප දෙනෙකුගෙන් යුතුව සංවිධානාත්මක කල්ලියක් ලෙස කටයුතු කරන බවත් මෙහි පිටුපස මහමොළකරුවෙකු මෙන්ම තවත් කිහිප දෙනෙකු සිටින බවත් කාන්තාවන් කිහිප දෙනෙකු ද ඒ අතර සිටින බවත් මෙතෙක් සිදු කළ විමර්ශනයේදී අනාවරණය වී තිබෙන බව පොලිසිය පවසයි.
විනීතා මානෙල් ගමගේ
0 Comments