ආගමික සංහිඳියාවට හානි වන අයුරින් බුදුදහම සම්බන්ධයෙන් ප්‍රකාශයක් කළැයි රක්ෂිත බන්ධනාගාරගත කර සිටින දේවගැති ජෙරොම් ප්‍රනාන්දු යන අයගේ හඬ පරීක්ෂාවක් සිදු කර අධිකරණයට වාර්තාවක් ඉදිරිපත් කරන ලෙස කොළඹ අතිරේක මහේස්ත්‍රාත් රජින්ද්‍රා ජයසූරිය මහත්මිය රජයේ රස පරීක්ෂකවරයාට ඊයේ (27) නියෝග කළාය.
මෙම සිද්ධිය තහවුරු කර ගැනීමට සැකකරුගේ කටහඬ
පරීක්ෂාවක් සඳහා රජයේ රස පරීක්ෂකවරයා වෙත ඉදිරිපත් කිරීමට
නියෝගයක් ලබා දෙන ලෙස අපරාධ පරීක්ෂණ දෙපාර්තමේන්තුව කළ ඉල්ලීමක්
සැලකිල්ලට ගත් මහේස්ත්‍රාත්වරිය මෙම නියෝගය නිකුත් කළාය.
සැකකරු ලබන 03 වැනිදා තෙක් තවදුරටත් රක්ෂිත බන්ධනාගාරගත කරන ලෙස ද නියෝග කෙරිණි.
මෙම සිද්ධියට අදාළ මහේස්ත්‍රාත් පරීක්‍ෂණය ඊයේ (27) යළි කැඳවූ
අවස්ථාවේදී සැකකරු බන්ධනාගාරය මඟින් අධිකරණය හමුවට ඉදිරිපත් කර
තිබිණි. පැමිණිල්ල වෙනුවෙන් අපරාධ පරීක්ෂණ දෙපාර්තමේන්තුවේ
ස්ථානාධිපති සහ ඩිජිටල් වෝහාරික විද්‍යාගාරයේ ස්ථානාධිපති ප්‍රධාන
පොලිස් පරීක්ෂක එස්.කේ. සේනාරත්න මහතා අධිකරණය හමුවේ පෙනී සිටිමින්
කරුණු ඉදිරිපත් කළේය. ආගමික සංහිඳියාව බිඳලන අයුරින් සැකකරු කළ
ප්‍රකාශයන්ට අදාළ හඬ ඇතුළත් ඩී.වී.ඩී. පටයක් අධිකරණයට ඉදිරිපත්
කළ අපරාධ පරීක්ෂණ දෙපාර්තමේන්තුව, එය නඩු භාණ්ඩයක් ලෙස භාර ගන්නා
ලෙසට අධිකරණයෙන් ඉල්ලීය.
සැකකරු වෙනුවෙන් අධිකරණයේ පෙනී සිටි ජනාධිපති නීතිඥ අනූජ ප්‍රේමරත්න මහතා සඳහන් කර සිටියේ මෙම නඩුව යළි කැඳවීම සඳහා ඉතා කෙටි දිනයක් ලබා දෙන ලෙසය.
ඉදිරිපත් වූ කරුණු සැලකිල්ලට ගත් අධිකරණය අපරාධ පරීක්ෂණ
දෙපාර්තමේන්තුව භාර දුන් නඩු භාණ්ඩය අධිකරණය භාරයට ගෙන සැකකරු ලබන
03 වැනිදා තෙක් තවදුරටත් රක්ෂිත බන්ධනාගාරගත කළේය.බුදු දහමට නිගා
වන අයුරින් සහ ආගමික සංහිඳියාව බිඳලන අයුරින් වගකීම් විරහිත හිතළු
ප්‍රකාශයක් කළ මෙම දේවගැතිවරයාගේ එම ප්‍රකාශ පිළිබඳ විමර්ශනයක්
ආරම්භ කළ බවත් ඒ හේතුවෙන් ඔහුගේ විදෙස් ගමන් තහනම් කිරීමේ නියෝගයක්
නිකුත් කරන ලෙසත් අපරාධ පරීක්ෂණ දෙපාර්තමේන්තුව මින් ඉහතදී
අධිකරණයෙන් ඉල්ලීම් කර තිබිණි. ආගමික ගැටුම් නිර්මාණය වී එය රටේ සංහිඳියාවට බලපෑමක් විය හැකි බවට සඳහන් කරමින් පාර්ශ්ව කිහිපයක් මේ සම්බන්ධයෙන් තම දෙපාර්තමේන්තුවට පැමිණිලි කළ බව ද අපරාධ පරීක්ෂණ දෙපාර්තමේන්තුව අධිකරණයට දැනුම් දී තිබිණි. පසුව, විදෙස්ගතව සිට ඉකුත් නොවැම්බර් මස 29 වැනිදා මෙරටට පැමිණි දේවගැතිවරයා ප්‍රකාශයක් ලබා දීම සඳහා අපරාධ පරීක්ෂණ දෙපාර්තමේන්තුවට ගොස් සිටියදී එම දෙපාර්තමේන්තුව මඟින් අත්අඩංගුවට ගනු ලැබ තිබුණේ දෙසැම්බර් මස පළමු වැනිදාය.
නිමන්ති රණසිංහ
0 Comments