මහනුවර හන්තාන කන්ද තරණය කරමින් සිටි රාගම වෛද්ය පීඨයේ සිසු සිසුවියන් එකසිය අසූ එක්දෙනකු හා මඟ පෙන්වන්නන් ලෙස කටයුතු කළ පේරාදෙණිය විශ්වවිද්යාලයේ සිසුන් දෙදෙනකු අයහපත් කාලගුණය සමඟ මඟ වැරදී පැය දහයකට අධික කාලයක් අතුරුදහන් වී සිටියදී මහනුවර පොලිසිය හා යුද හමුදාව එක්ව ඔවුන් මුදාගැනීමට කටයුතු කරන ලදි.
මහකන්ද ප්රදේශයෙන් හන්තාන කන්ද තරණය කිරීමට පෙරේදා පෙ.ව. 10.00ට පමණ ගිය රාගම වෛද්ය පීඨයේ සිසු සිසුවියන් 180 දෙනකුගෙන් සමන්විත කණ්ඩායමක් අධික වර්ෂාවත් සමඟ ඇති වූ ඝන මීදුම් සහිත තත්ත්වය හේතුවෙන් කඳු මුදුනේ අතරමංව සිටියදී පොලීසිය හා යුද හමුදාව ඒකාබද්ධව කළ මෙහෙයුමකින් පසු සිසු පිරිස නිරුපද්රිතව පහළට රැගෙන විත් තිබේ.
කඳු මුදුනේ අතරමංව සිටි සිසුන් පෙරේදා රාත්රී 10.00ට පමණ තමන් අතරමංව සිටින බවට දුරකතන මගින් මවුපියන්ට පවසා ඇත. පසුව මවුපියයන් ඒ බව මහනුවර පොලීසියට දැනුම් දීමෙන් පසු වහා ක්රියාත්මක වූ පොලිසිය යුද හමුදාවේද සහාය ඇතිය අදාළ ස්ථානයට ගොස් සිසුන් 120 දෙනෙකු ඊයේ (03) අලුයම 3.30 පමණ වනවිට පහළට රැගෙන ඒමට සමත්ව ඇත.
ඒ අතුරින් තරමක අසනීප තත්ත්වයෙන් පසු වූ සිසුවියන් දෙදෙනකු හා සිසුන් දෙදෙනකු ප්රතිකාර සඳහා මහනුවර ජාතික රෝහලට ඇතුළත් කර තිබේ. ඔවුන් ගේ තත්ත්වය බරපතළ නොවන බව වාර්තා වේ.
මේ හන්තාන ගමන සඳහා රාගම වෛද්ය පීඨයේ සිසුන් 60 දෙනකු හා
සිසුවියන් 121 දෙනකු පැමිණ තිබේ. ඔවුන් පේරාදෙණිය විශ්වවිද්යාලය
පැමිණ ඒ ඔස්සේ හන්තාන තරණය කිරීමට පිටත්ව ඇත්තේ පෙරේදා (2) දින පෙරවරු
11 ට පමණය. සවස 5 පමණ වන විට අධික මීදුම හා වර්ෂාව සමග මාර්ගය වැරදුනු බව
එම සිසුහු පවසති.
මධ්ය පළාත් නියෝජ්ය පොලිස්පති මහින්ද දිසානායක මහතා හා මහනුවර 111වන බලසේනාධිපති බ්රිගේඩියර් සාලිය ඩයස් එම ස්ථානයට පැමිණ මෙහෙයුම සඳහා උපදෙස් දුන්හ.
හන්තාන කන්දට ඇතුළු වු හතළිහක් පමණ හමුදා පිරිස් විසින් මෙහි මුල්ම කණ්ඩායම ඊයේ (3) අලුයම 2ට පමණ පහලට රැගෙන ආ අතර එම ප්රමාණය සිසුන් සිව් දෙනෙකි.
ඊළඟට රැගෙන ආ සිසුවකු හා සිසුවියක අසාධ්ය තත්ත්වයෙන් සිටීම හේතුවෙන් මෙහි සූදානම් කර තිබූ ගිලන් රථයකින් ඔවුහු මහනුවර මහ රෝහල වෙත පිටත් කරනු ලැබූහ.
සොයා ගත් සිසු සිසුවියන්ට ඇති වී තිබූ අසාත්මිකතාවන්ට ප්රථමාධාර හා වෛද්ය උපදෙස් දීමට කඳු පාමුලට පැමිණ සිටි වෛද්ය කණ්ඩායම් සමඟ පරිසර විද්යාඥ ප්රදීප් සමරවික්රම හා වන සත්ව ගවේෂක අනිල් විජේතුංග යන පරිසරවේදීන්ද යුහුසුලුව ක්රියා කරනු දක්නට ලැබිණි. මේ වන විට සිසු සිසුවියන්ගේ මවුපියන්ද රටේ විවිධ ප්රදේශවල සිට මෙම ස්ථානය වෙත පැමිණෙමින් සිටි අතර ඔවුන් තම දරුවා දැක ගන්නා තුරු නොඉවසිල්ලෙන් පසු විය.
පැවති දැඩි වර්ෂාව සමග හන්තාන මාර්ගයද කැඩී ගොස් ගමන් කිරීමට නොහැකි අයුරින් වලවල් සෑදී තිබීම නිසා මෙම පිරිස කන්දෙන් පහළට රැගෙන ඒම දැඩි දුෂ්කර කටයුත්තක් වී තිබිණි. මේ තත්ත්වය නිසාම අලුයම හතර පසු වන තුරුම ඔවුන් පහළට රැගෙන ඒම සිදු විය. මෙහිදී රෝගාතුර වූ සිසු සිසුවියන් පස් දෙනෙකු රෝහල්ගත කරන ලදි. අනෙක් සිසු පිරිස ඊයේ (03) පෙරවරු 6.00 පමණ වනවිට පහළට රැගෙන ආ බව පොලීසිය පවසයි.
සිද්ධියට මුහුණ දුන් විශ්වවිද්යාල සිසු සිසුවියන් තම අත්දැකීම විස්තර කළේ මෙලෙසිනි:
“මගේ ගම මාතර අපේ බැජ් එකේ අය හන්තානෙ යන්න තීරණය කළාට පස්සේ මම ඒ
ගැන අපේ අම්මලාට කීවා එතකොට තාත්තා කිව්වේ මේ දවස්වල කඳුකර පැත්තට
තදින් වහිනවා කඳු නාය යනවා ඒ නිසා ඒ ගමන අවදානම් කියලා. ඒත් අපේ කට්ටිය
ඔක්කොම යන නිසා මට යන්න වුණා. අපි රාගම වෛද්ය පීඨයේ ඉදලා පේරාදෙණිය
යුනිවසිටි එකට උදේ ආවා. ගමන පිටත් වෙලා මහකන්ද කියන පැත්තෙන් අපි
හන්තානේ නඟින්න පටන් ගත්තා.
“අපට පාර පෙන්නන්න පේරාදෙණිය කැම්පස් එකේ දෙන්නෙක් හිටියා. අපි කන්ද උඩට ආවේ බොහොම අමාරුවෙන් වැස්ස නිසා පාරවල් ඔක්කොම හේදිලා ගිහින්. විශාල වළවල් හෑරිලා. පාර හරියට ලිස්සනවා. අපි කන්දෙ යන කොට හවස පහට පහමාරට විතර තේරුණා අපි අතරමං වෙලා කියලා.
ඒ වෙලාව වෙන කොට පළාතම අඳුරු වෙලා මීදුම නිසා හරියට මොනවත් පේන්නේ වත් නෑ. අපි හොඳටම බය වුණා අපි පැය ගානක් කන්දේ එහෙ මෙහෙ ගියා කිසි දෙයක් හිතා ගන්න බැරිව ඉන්නකොට පාන්දර දෙකට විතර අපි හොයාගෙන ආව පොලිසියේ හා හමුදාවේ අයගේ කෑගැසීම් ඇහුණා.
ඒ අය අපට හයියෙන් කථා කරමින් අපි හෙව්වා. පස්සේ ඒ අයත් එක්ක අපි කන්දෙන් පහලට එනකොට පාන්දර හතරට විතර ඇති.මේ ගමන නම් මට ජීවිතේට අමතක වෙන්නෑ ඒත් එක වෙලාවකට හිතෙනවා ඒකත් හොඳ අත්දැකීමක් කියලා.”
ෆාතිමා කලිසා විශ්වවිද්යාල සිසුවියක්:
“අපේ බැජ් එකේ ගෑනු ළමයි තමයි වැඩි පිරිමි ළමයි හිටියේ හැටයි, ගෑනු ළමයි එකසිය විසි එකක්. අපි හරි අමාරුවෙන් කන්ද උඩට නැග්ගේ වැස්ස මීදුම සීතල එක්ක කැලේ භයංකාර කම අපට දැනුණා කවුරුත් කිවුවේ රෑ වෙන්න කලින් පහලට යමු කියලා හවස 5 වෙනකොට පලාතම කරුවල වෙලා ඉවරයි. අපි යන පාරවල් හොයාගන්න බෑ. කැලේ කූඩැල්ලෝ පිරිලා. උන් අපේ ඇඟ හැම තැනම යනවා. ගොඩක් ළමයි ඒ සතුන්ට බයේ කෑගහනවා. ඔක්කොම බය වෙලා හිටියත් එක එක්කෙනාට කිව්වේ කවුරුවත් කලබල වෙන්න එපා, බයවෙන්න එපා කියලා. ඒත් අපි ඔක්කොම බයේ තමයි හිටියෙ. නොදන්න පළාතක ඇවිත් අපට මොනවා වෙයිද කියලා හිතා ගන්න බැරුව ඉන්න කොට පාන්දර එකට විතර හමුදා කට්ටියක් අපි හිටපු තැනට ආවා අපි ඒ අයත් එක්ක කන්ද පහළට එනකොට පාන්දර තුන හමාර විතර වුණා.“
මේ දිනවල පවතින අධික වර්ෂාව සහ ඝන මීදුම් සහිත තත්ත්වය නිසා
අනාරක්ෂිතව හන්තාන කන්ද තරණය කිරීමට යෑමෙන් වළකින ලෙස මහනුවර
පොලිස් මූලස්ථානය ජනතාවගෙන් ඉල්ලීමක් කරයි.
(අසේල කුරුළුවංශ, සුරංග දිල්හාන්)
0 Comments