මොරටුව උයන ප්‍රදේශයේ නීතිවිරෝධී ලෙස පවත්වාගෙන ගිය මහා පරිමාණ වයින් නිෂ්පාදනාගාරයක් වටළා සැකකරුවෙකු සහ නිෂ්පාදනය කළ වයින් තොගයක් පාදුක්ක සුරාබදු කාර්යාලයේ නිලධාරීන් මගින් අත්අඩංගුවට ගෙන තිබේ.
මේ නිෂ්පාදන අලෙවිය සදහා වෙබ් අඩවියක්ද නිර්මාණය කර අන්තර් ජාලය මඟින් ඇණවුම් ගනිමින් කාලයක සිට මහා පරිමාණයෙන් නිෂ්පාදනාගාරය පවත්වාගෙන ගොස් තිබූ බව පාදුක්ක සුරාබදු කාර්යාලය සඳහන් කරයි. එම කාර්යාලයේ ස්ථානාධිපති ප්‍රධාන සුරාබදු පරීක්ෂක කීර්ති ආරියපාල මහතාට ලද තොරතුරක් මත උපාය දූතයකු යොදාගෙන මේ නීති විරෝධි වයින් නිෂ්පාදනාගාරයට ඇතුළු වී මේ වැටලීම සිදු කර ඇත.
උත්සව සමය ඉලක්ක කරගනිමින් වෙනත් කාලවලට වඩා වැඩි වයින් නිෂ්පාදනයක් මෙහි සිදු කර ඇති බවත්, සමාජ මාධ්‍ය මඟින් කිව්ආර් (QR) කේත භාවිත කරමින් ඉතා ඉහළ මිල ගණන්වලට මේ වයින් නිෂ්පාදන අලෙවි කර ඇති බවත්, අත්අඩංගුවට ගත් සැකකරුගෙන් කළ ප්‍රශ්න කිරීමේදී අනාවරණය වූ බවද එම කාර්යාලය පවසයි.
මේ නීති විරෝධි බලපත්‍ර රහිත වයින් නිෂ්පාදනාගාරය සඳහා වයින් නිෂ්පාදන සඳහා වෙළෙඳ බලපත්‍රයක් නිකුත් කිරීමට මොරටුව මහා නගර සභාව කටයුතු කර ඇත. මේ නීති විරෝධි නිෂ්පාදකයෙන් බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ පැ‍වැති අලෙවි ප්‍රදර්ශන සඳහාද මේ නිෂ්පාදන අලෙවි කුටිවල තබා අලෙවි කර ඇතැයිද සිදු කළ විමර්ශනයේදී අනාවරණය වී තිබේ.
මේ නිෂ්පාදනාගාරයේ තිබී එළවළු සහ පලතුරු යොදාගෙන නිෂ්පාදනය කළ රුපියල් ලක්ෂ පහක් පමණ වටිනා වයින් බෝතල් 58ක් සහ වයින් මත්පැන් තොගයක් බෝතල් මූඩි මුද්‍රා තබන යන්ත්‍ර දෙකක් හිස් බෝතල්, මූඩි තොගයක් ප්‍රචාරක බැනර් ආදිය සුරාබදු නිලධාරීන් සිය භාරයට ගෙන ඇත.
අත්අඩංගුවට පත් මොරටුව උයන ප්‍රදේශයේම පදිංචිකරුවකු වන 59 හැවිරිදි සැකකරු මහේස්ත්‍රාත් අධිකරණයට ඉදිරිපත් කිරීමට නියමිතය. සහකාර සුරාබදු කොමසාරිස් බස්නාහිර පළාත 2 ජයන්ත සිල්වා සහ සුරාබදු අධිකාරි 2 උපාලි ජයසිංහ යන මහත්වරුන්ගේ උපදෙස් පරිදි පාදුක්ක සුරාබදු කාර්යාලයේ ස්ථානාධිපති ප්‍රධාන සුරාබදු පරීක්ෂක කීර්ති ආරියපාල මහතාගේ අධීක්ෂණය යටතේ සුරාබදු පරීක්ෂක මාන්න උතුම් සුරාබදු නියාමකවරුන් වන 1127 කසුන්, 1169 වජිර, සුරාබදු රියැදුරු දුමින්ද ඇතුළු නිලධාරීන් විසින් මේ වැටලීම කර ඇත.
0 Comments