කොළඹ ජාතික රෝහලට අයත් ගිලන් රථයක් බීමතින් ධාවනය කර පොලිස් මාර්ග බාධකයක ගැටී අනතුරකට ලක් කළ රියැදුරා හලාවත පොලිසිය පසුගිය 11දා රාත්‍රියේදී අත්අඩංගුවට ගෙන තිබේ.
බෙල්ලන එගොඩවත්තේ පදිංචිකරුවෙක් වන කොළඹ ජාතික රෝහලේ සේවය කරන බෙල්ලන විතානලාගේ සිසිර කුමාර නැමැති මේ ගිලන් රථ රියැදුරා හලාවත මහේස්ත්‍රාත් අධිකරණයට පෙරේදා (12) ඉදිරිපත් කිරීමෙන් අනතුරුව ලබන 15වැනිදා දක්වා රක්ෂිත බන්ධනාගාර ගත කළ බව හලාවත පොලිසිය සඳහන් කළේය.
හලාවත දැදුරුඔය පාලම මත ඇති පොලිස් මාර්ග බාධකයේ මේ ගිලන් රථය ගැටී ඇත්තේ පුත්තලම දෙස සිට හලාවත දෙසට ධාවනය කරමින් තිබියදීය. එම අනතුරින් ගිලන් රථයට හානි සිදුව ඇති බව ද පොලිසිය පවසයි.
හලාවත කොට්ඨාස භාර ජ්‍යෙෂ්ඨ පොලිස් අධිකාරී ලූෂන් සූරියබණ්ඩාර මහතාගේ උපදෙස් මත රථවාහන අනතුරු අවම කිරීම සහ අපරාධ නිවාරණ කටයුතු සඳහා දැදුරුඔය පාලම මත ස්ථාපිත කර ඇති පැය 24 පුරාම ක්‍රියාත්මක මාර්ග බාධකය ක්‍රියාත්මක වන්නේ හලාවත පොලිසියේ වැඩබලන ස්ථානාධිපති ප්‍රධාන පොලිස් පරීක්ෂක ඉඳුනිල් ඒකනායක මහතාගේ අධීක්ෂණයෙනි.
මේ ස්ථානයේදී මාර්ග බාධකයක ගිලන් රථය ගැටී ඇත්තේ රාත්‍රි 9.30ට පමණය. එම අවස්ථාවේදී රෝගීන් කිසිවෙක් ගිලන් රථයේ සිට නැත. ගිලන් රථ රියැදුරු සහායකයන් බව කියන දෙදෙනෙකු පමණක් රථයේ ගමන් කරමින් සිට ඇත. රියැදුරු බීමතින් සිටියත් සෙසු දෙදෙනා බීමතින් සිටි බවට නිරීක්ෂණය නොවූ බව පොලිසිය කියයි.
රියැදුරු බීමතින් සිටින බව පරීක්ෂණවලින් තහවුරු කරගැනීමත් සමඟ ඔහු අත්අඩංගුවට ගත් බවත් ගිලන් රථය පොලිස් භාරයට ගත් බවත් පොලිසිය කියයි. මේ ගිලන් රථය අලුත්ම වර්ගයේ එකක් බව උසස් පොලිස් නිලධාරියෙක් සඳහන් කළේය.
කොළඹ ජාතික රෝහලේ ප්‍රතිකාර ලබමින් සිටි රෝගියකු අනුරාධපුරය රෝහලට භාරදී පැමිණෙන අතරතුර මේ අනතුර සිදුව ඇති බව විමර්ශනයේදී අනාවරණය වී ඇත.
අනුරාධපුරයේ සිට පැමිණෙන අතරතුර පුත්තලම ප්‍රදේශයේදී ගිලන් රථ රියැදුරු මත්පැන් පානය කර ඇතැයි ඔහු සමඟ සිටි දෙදෙනාගෙන් කළ ප්‍රශ්න කිරීමේදී අනාවරණය වූ බව ද නිලධාරියා කීය.
ගයාන් කුමාර වීරසිංහ
0 Comments