පොල්ගස්ඕවිට, හෙරලියාවල ප්‍රදේශයේ වගුරුබිමක ඉතා සූක්ෂ්ම ලෙසින් පවත්වාගෙන ගිය නීති විරෝධී මත්පැන් ස්කාගාරයක් වැටලීමෙන්, එහි තිබූ ගෝඩා මි.ලී. අටලක්ෂ හතළිස්දහසක් සහ කසිප්පු මි.ලී. තිස්තුන්දහස් හත්සිය පනහක් සමඟ එකම පවුලේ මාමා සහ දියණියක අත්අඩංගුවට ගත් බව කහතුඩුව පොලිසිය පවසයි.
වැඩ බලන පොලිස්පති දේශබන්ධු තෙන්නකෝන් මහතාගේ උපදෙස් මත ක්‍රියාත්මක ‘යුක්තිය’ වැඩසටහන යටතේ මෙම වැටලීම සිදු කර තිබුණි.
කහතුඩුව පොලිසියේ ස්ථානාධිපති, ප්‍රධාන පොලිස් පරීක්ෂක ප්‍රියංකර මහතාට ලද තොරතුරකට අනුව නිලධාරී කණ්ඩායමක් පොල්ගස්ඕවිට, හෙරලියාවල ප්‍රදේශයේ කැලෑබද ප්‍රදේශයක වැටලීමක් සඳහා යමින් සිටියදී, ස්කූටි යතුරුපැදියක සැකකටයුතු ලෙස ප්ලාස්ටික් කෑන් එකක් තබාගෙන කාන්තාවක රැඳී සිටිනු දැක තිබේ. එම අවස්ථාවේදී කැලෑබද පෙදෙසේ කාන්තාව රැඳී සිටින්නේ කුමකටදැයි විමසූ විට ඊට නිසි පිළිතුරක් ලබා නොදීම නිසා සැක සිතී, ප්ලාස්ටික් කෑන් එක පරීක්ෂා කිරීමේදී එහි කසිප්පු මි.ලී. තිස්තුන්දහස් හත්සියපනහක් තිබී ඇති බවට අනාවරණය වී ඇත.
එම කාන්තාව අත්අඩංගුවට ගෙන ප්‍රශ්න කිරීමේදී ඊට යාබද වගුරුබිමක කසිප්පු පෙරමින් තම මාමා සිටින බවත්, ඔහු පැමිණෙන තෙක් මෙහි රැඳී සිටින බවත් ඇය පවසා තිබේ.
ඒ අනුව පොලිස් නිලධාරීන් මහත් පරිශ්‍රමයක් දරා කැලෑ රොදක් මැද පිහිටි වගුරුබිමට ගොස් එහි සිටි පුද්ගලයා අත්අඩංගුවට ගෙන, නීති විරෝධී මත්පැන් නිෂ්පාදනය සඳහා භාවිතා කරන ගෝඩා මි.ලී. දෙලක්ෂ දහදාහක් බැගින් බහා තිබූ ගෝඩා බැරල් හතරක් පොලිස් භාරයට ගෙන ඇති අතර,
එහි ගෝඩා මි.ලී. අටලක්ෂ හතළිස්දහසක් තිබූ බව පැවසේ. මෙම වැටලීමේදී ගෝඩා මි.ලී. අටලක්ෂ හතළිස්දහසක් කසිප්පු මි.ලී. තිස්තුන්දහස් හත්සියපහනක් අඩි පහක් උස දඟර 2ක්, ගෑස් සිලින්ඩරයක්, ගෑස් ළිපක්, ප්ලාස්ටික් කෑන් 4ක් සහ බැරල් 04ක් පොලිස් භාරයට ගෙන තිබේ.
මෙසේ අත්අඩංගුවට ගෙන ඇත්තේ එකම පවුලේ මාමා සහ දියණිය වන අතර, සැකකරු මීට සති දෙකකට පෙර ගෝඩා මි.ලී. විසිතුන්ලක්ෂ දසදහසක් සමඟ අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව දඩ ගෙවා නිදහස් වූ අයකු බව පැවසේ. අත්අඩංගුවට ගත් එම ප්‍රදේශයේම පදිංචි (25) සහ (60) හැවිරිදි සැකකරු හා සැකකාරිය කැස්බෑව අධිකරණයට ඉදිරිපත් කිරීමට නියමිතය.
සිද්ධිය සම්බන්ධයෙන් කහතුඩුව පොලිසියේ ස්ථානාධිපති, ප්‍රධාන පොලිස් පරීක්ෂක ප්‍රියංකර මහතාගේ උපදෙස් මත දූෂණ මර්දන අංශයේ ස්ථානාධිපති පො.සැ (41445) ලලිත්, පො.සැ (5205) අසංක, (6215) තෙන්නකෝන්, පො.කො (97337) ඒකනායක, (94949) මධුසංඛ, (97284) ප්‍රේමසිංහ ඇතුළු නිලධාරීහු වැටලීම සිදුකොට ඉදිරි පරීක්ෂණ පවත්වති.
කොට්ටාව - ප්‍රදීප් කුමාර
0 Comments