කැලණිය විශ්වවිද්‍යාලයේ විද්‍යා විෂය යටතේ උපාධිය හදාරා මීට මාස දෙකකට පමණ ඉහතදී ඉවත්ව ගොස් සිටි 27 හැවිරිදි යසාරා හංසමාලි ගුණසේකර නමැති තරුණියක පෙරේදා (2) දහවල් කාලයේ විශ්වවිද්‍යාල නේවාසිකාගාරයට පැමිණ කිසියම් ඖෂධ වර්ගයක් අධි මාත්‍රාවකින් පානය කර දැඩි ලෙස රෝගාතුරව රාගම උතුරු කොළඹ ශික්ෂණ රෝහලට ඇතුළත් කර ප්‍රතිකාර ලබමින් සිටියදී එදිනම මියයාමේ සිදුවීමට අදාළ පශ්චාත් මරණ පරික්ෂණ කටයුතු රාගම රෝහලේ අධිකරණ විශේෂඥ වෛද්‍යවරයා විසින් (03) දින සිදුකර තිබුණි.
අනතුරුව ඉදිරිපත් වු සාක්ෂි හා වෛද්‍ය වාර්තා සැලකිල්ලට ගත් රාගම රෝහලේ හදිසි මරණ පරික්ෂක ප්‍රියංකර ලාල් මහතා විසින් මෙම තරුණියගේ මරණය පිළිබඳව විවෘත තීන්දුවක් ලබා දෙමින් සිරුරෙ කොටස් වැඩිදුර පරික්ෂණ සදහා රජයේ රස පරික්ෂකවරයා වෙත යැවීමට කටයුතු කරන ලෙස දන්වා ඇයගේ දේහය සහෝදරිය හා මව වෙත භාරදි ඇත.
මෙසේ මියගිය යසාරා බදුල්ල ස්ප්‍රින්වැලි ප්‍රදේශයේ පදිංචිව සිටි තරුණියකි. ඇය ඉගෙන ගත් වකවානුවේ එම විශ්වවිද්‍යාලයේ ඉගෙන ගත් තරුණයකු සමඟ පැවැති ප්‍රේම සම්බන්ධයක් මුල් කරගෙන ඇතිවූ ගැටලුවක් නිසා කිසියම් ඖෂධ වර්ගයක් අධි මාත්‍රාවකින් විශ්ව විද්‍යාල භූමිය තුළදී පානය කර ඇති බවට තොරතුරු ලැබී ඇතැයි පොලිසිය පවසා තිබේ.
නිවැසියන් පවසන්නේ විශ්වවිද්‍යාල අධ්‍යාපනය නිමකර තිබූ ඇය රැකියාවක් සඳහා සම්මුඛ පරික්ෂණයකට සහභාගි වීමට කොළඹ ගිය බවත් හදිසියේ අසනිපව රාගම රෝහලට ඇතුළත් කිරිමෙන් පසු ඇය ගැන තොරතුරු ලැබු බවත්ය. ගැහණු ළමයින් දෙදෙනකු සිටින පවුලේ වැඩිමහල් දරුවා ඇය විය. ඇයගේ මව බදුල්ල මහ නගර සභාවේ රාජකාරි කරන්නීය.
ඇයගේ අනෙක් සොහොයුරිය ද කොළඹ සරසවියේ මේ වනවිට අධ්‍යාපනය හදරාමින් සිටි. බදුල්ල මධ්‍ය මහා විද්‍යාලයේ සිප් සතර හැදෑරු යසාරා විශ්වවිද්‍යාල වරම් හිමිකර ගැනීමෙන් පසු කැළණිය විශ්වවිද්‍යාලයට ඇතුළු වන්නේ 2017 වසරේදිය. විශ්වවිද්‍යාල අධ්‍යාපනය නිමකර ඇය මියයන විට ගතව තිබුණේ මාස දෙකක පමණ කාලයකි.
ඇය සරසවිය තුළ පැවැත්වූ සබඳතා ගැන නිවැසියන් දැන සිටියේ නැත.
එහි අධ්‍යාපනය හදාරමින් සිටින අතරතුර දීම රැකියාවක් සඳහා පෞද්ගලික ආයතනයකට ඇය විසින් යොමුකරන ලද ඉල්ලුම් පතකට අනුව ඒ සඳහා පැවැත්වෙන සම්මුඛ පරික්ෂණය සඳහා පැමිණෙන ලෙස දන්වා තිබූ බව නිවසේ අය පවසා තිබේ.
ඒ අනුව යසාරා ස්ප්‍රිංවැලි නිවසේ සිට කොළඹ යන්නේ එම සම්මුඛ පරික්ෂණය සඳහා සහභාගි වීමටය. එම සම්මුඛ පරික්ෂණයේ මුලික කොටස නිමවුවත් ඇයට තවත් දවසක් දෙකක් කොළඹ නතරවීමට සිදුවන බව සම්මුඛ පරික්ෂණයේ අය දන්වා සිටි බව නිවසට ඇය පවසා තිබුණි.
ඒ පිළිබඳව තම පියාට දැන්වීමෙන් පසු ළඟම හිතවතෙකු ගේ නිවසක එම දින කිහිපය නතරවීමට අවශ්‍ය කටයුතු සලසා දුන්නද ඇය එහි නොගොස් තම සරසවි යෙහෙළියන් සිටින නේවාසිකාගාරයේ එම දින දෙක තුන නතරව සිටිමට තිරණය කර ඇත.
සම්මුඛ පරික්ෂණය නිමාවෙන් පසු (01) දින පස්වරුවේ නේවසිකාගාරයට ගොස් ඇති බව වාර්තාවේ.
එලෙස යෙහෙළියන් සමග කාලය ගත කරමින් සිටින අතර හදිසියේම ඇය කිසියම් ඖෂධයක් අධිකව ලබාගෙන ඇතිවු අසනිප තත්ත්වයක් නිසා ප්‍රතිකාර ලබාදිමට ඇයගේ යෙහෙළියන් රාත්‍රි 10.30 ට පමණ ඇයව රාගම රෝහලට රැගෙන යාමෙන් පසු එම රෝහලේ වාට්ටු අංක 22 ඇතුළත් කළ බවත් ඇයගේ යෙහෙළියෝ සඳහන් කළහ.
එලෙස ප්‍රතිකාර ලබමින් සිටියදි පසුගිය (02) දින දහවල් 1130 ට පමණ යසාරා මියගොස් තිබේ.
යෙහෙලියන් දුන් කට උත්තර අනුව ඇය කිසියම් ප්‍රේම සබඳතා ගැටලුවක සිටි අවස්ථාවක මෙම සංසිසිද්ධියට මුහුණ පා ඇත.
යසාරාගේ දේහය පෙරේදා (03) රාත්‍රි 11 ට පමණ ඇයගේ ස්ප්‍රිංවැලි නිවසට රැගෙන ඒමෙන් අනතුරුව එහි තැන්පත් කර ඇත.
මියගිය යසාරා සමන්මලි ගුණසේකර තරුණිය ගේ අවසන් කටයුතු ඊයේ දින (04) පස්වරුවේ ස්ප්‍රිංවැලි පොදු සුසාන භුමියේදි විශාල පිරිසකගේ සෝ සුසුම් මැද සිදුවිය.
0 Comments