අහුංගල්ල පොලිස් වසමේ මෙහෙයුමක දී අයිස් සමඟ 16 හැවිරිදි පාසල් සිසුවකු අත්අඩංගුවට ගත් බව අහුන්ගල්ල පොලිසිය කියයි.
අහුන්ගල්ල ගල්වෙහෙර ප්රදේශයේදී අහුන්ගල්ල පොලිසියට ලද තොරතුරක් මත නිවසක් පරීක්ෂා කිරීමේදී එහි සිටි පාසල් සිසුවකු සන්තකයේ තිබී අයිස් මත්ද්රව්ය මිලිග්රෑම් අටදාහක් සොයා ගැනීමට හැකි විය. මෙහි වටිනාකම රුපියල් ලක්ෂ දෙකකට ආසන්න බව පොලිසිය කියයි.
මොහුගෙන් වැඩිදුර ප්රශ්න කිරීමේදී දැනට විදේශගතව සිටින අහුංගල්ලේ පදිංචි මත්ද්රව්ය ජාවාරම්කරුවෙකුගේ උපදෙස් මත මෙම මත්ද්රව්ය බෙදා හරින බව පවසා තිබේ.
මෙම සිසුවා අහුන්ගල්ල ප්රදේශයේ පාසලක සාමාන්ය පෙළ හදාරන සිසුවකු බවත් පොලිසිය පවසයි. විදේශගතව සිටින මත්ද්රව්ය ජාවාරම්කරුවාගේ ගෝලයකු විසින් මෙම සිසුවාට මත්ද්රව්ය ලබාදීම සිදු කරන අතර මෙම සිසුවා මෙම මත්ද්රව්ය අලෙවි කරන බවත් පාසල් සිසුන් අතරේද මේවා බෙදා හරින බවත් පොලිසිය විසින් සොයාගෙන ඇත. මෙම සිසුවාට මත්ද්රව්ය බෙදාහැරීම සඳහා මැසෙන්ජර් ක්රමයට විස්තර ලබාදි ඒවා ස්ථානයක සඟවා සිසුවාට ලබාගැනීමට සලස්වා ඇත. මත්ද්රව්ය විකුණූ මුදල් අහුන්ගල්ලේ පිහිටි රාජ්ය බැංකුවක තැන්පත් කරන බවත් පොලිසිය විසින් ප්රශ්න කිරීමේදී අනාවරණය කරගෙන ඇත.
ඒ සඳහා ඔහුට මුදල් ලබාදෙන බව සිසුවාගෙන් ප්රශ්න කිරීමේදි අනාවරණ කරගෙන ඇත. අත්අඩංගුවට ගත් සිසුවා බලපිටිය මහේස්ත්රාත්වරයා වෙත ඉදිරිපත් කිරීමෙන් අනතුරුව ගාල්ල කිතුලම්පිටිය ළමා නිවර්තන නිවාසයේ රඳවා තැබීම සඳහා නියෝග කර ඇත.
මේ දිනවල යුක්තිය මෙහෙයුම නිසා මෙසේ පාසල් සිසුන් යොදවා මත්ද්රව්ය බෙදාහැරීම ජාවාරම්කරුවන් විසින් සිදු කරන බව පොලිසිය පවසයි. අත්අඩංගුවට පත් සිසුවාගේ මාපියන් කුලී වැඩ කරන බවත් ඔවුන් මේ ගැන කිසිවක් නොදන්නා බවත් පොලිසිය කියයි.
අහුන්ගල්ල පොලිස් ස්ථානාධිපති ප්රධාන පොලිස් පරීක්ෂක හරිත් හල්විට මහතාගේ උපදෙස් මත මෙම මෙහෙයුම සිදු කෙරිණි.
අනුරාධ ප්රියදර්ශන.
0 Comments