නේවාසිකව ප්‍රතිකාර ලබන රෝගීන්ගෙන් උපරිම සිල්ලර මිලට වඩා වැඩිමිල ගණන් යොදා මුදල් අයකිරීමේ චෝදනාවලට වරද පිළිගත් කොළඹ ප්‍රධාන පෙළේ පෞද්ගලික රෝහලක් වන ආසිරි මෙඩිකල් රෝහලේ අධ්‍යක්ෂ මණ්ඩලයට මාලිගාකන්ද වැඩබලන මහෙස්ත්‍රාත් හිමාලි ඒකනායක මහත්මිය රුපියල් 25,000/-ක දඩයක් නියම කළාය.
රුපියල් 25,000/-ක දඩ මුදල නොගෙවුව හොත් මාස 06ක සිරදඬුමක්ද ඇය නියම කළාය.
නුගේගොඩ හයිලෙවල් පාරේ පදිංචි සනත් කුමාර අතුකෝරල මහතා සෞඛ්‍ය අමාත්‍යාංශයට කළ පැමිණිල්ලකින් අනතුරුව ජාතික ඖෂධ නියාමන අධිකාරියේ ආහාර ඖෂධ පරීක්‍ෂකවරයා එම පෞද්ගලික රෝහලේ අධ්‍යක්ෂ කරුවන්ට එරෙහිව නඩු පවරා තිබිණි.
2023 පෙබරවාරි 07 වැනිදාත් 19 වැනිදාත් අතර කාලයේ එහි නේවාසිකව ප්‍රතිකාර ලබමින් සිටි සමරකෝන් මුදියන්සේලාගේ මන්ත්‍රී කුමාරිහාමි මහත්මියට උපරිම සිල්ලර මිලක් නියම කර ඇති ඖෂධ එම මිලට වඩා වැඩිමිල ගණන් යොදා මුදල් අයකළ බවට ඖෂධ නියාමන අධිකාරි පනත යටතේ විත්තිකරුවන්ට එරෙහිව චෝදනා 11ක් යටතේ ජාතික ඖෂධ නියාමන අධිකාරිය විසින් නඩු පවරා තිබිණි.
එම නඩුවේ සාක්කිකරුවන් වශයෙන් සමරකෝන් මුදියන්සේලාගේ මන්ත්‍රී කුමාරිහාමි මහත්මිය, ඇගේ පුත්‍රයා වන සනත් කුමාර අතුකෝරල, ජාතික ඖෂධ නියාමන අධිකාරියේ ප්‍රධාන ආහාර හා ඖෂධ පරීක්ෂක අමිත් පෙරේරා යන මහත්වරුන් ඇතුළු 06 දෙනකු නම් කර ඇති අතර නඩු භාණ්ඩ වශයෙන් මන්ත්‍රී කුමාරිහාමි මහත්මියට රෝහලෙන් නිකුත් කළ බිල්පත ඇතුළු ලේඛන 06ක් නම් කර තිබිණි.
උපරිම සිල්ලර මිලක් නියම කර ඇති ඖෂධ වර්ග අතුරින් ඖෂධ වර්ග 11ක් එම ඖෂධ අලෙවි කළ හැකි මිලට වඩා සීයයට 104 සිට සීයයට 357 දක්වා වූ වැඩිමිල ගණන් යොදා අලෙවි කර ඇති බව ඖෂධ නියාමන අධිකාරිය වගුවක අකාරයෙන් අධිකරණයට පෙන්වා දී තිබිණී.
ඉදිරිපත් වූ කරුණු සලකා බැලු මාලිගාකන්ද මහේස්ත්‍රාත් ලෝචනී අබේවික්‍රම වීරසිංහ මහත්මිය විත්තිකාර රෝහලේ අධ්‍යක්‍ෂවරුන්ට අධිකරණයේ පෙනී සිටින ලෙස නියම කරමින් නොතිසි නිකුත් කර තිබිය දී ඊට පෙර දිනයක මෝෂමක් මාර්ගයෙන් වැඩබලන මහෙස්ත්‍රාත් හිමාලි ඒකනායක මහත්මිය හමුවට එම රෝහලේ අධ්‍යක්ෂවරුන්ගේ බලයලත් නියෝජිතයෙක් ඉදිරිපත් වී අදාළ චෝදනාවලට වරද පිළිගත්තේය.
ඒ අනුව එම චෝදනාවලට ඔහු වරදකරු බවට තීරණය කරමින් රුපියල් 25,000/-ක දඩයක් නියම කළ වැඩබලන මහේස්ත්‍රාත්වරිය දඩ මුදල නොගෙවුවහොත් මාස 6ක සිරදඬුමකටද ඔහු යටත් කළාය.
0 Comments