බෞද්ධාගමට අපහාස වන අයුරින් විකෘති අදහස් දේශනා කරමින් සිටියදී ඊයේ පන්නිපිටියේදී අත්අඩංගුවට ගත් අවලෝකිතේෂ්වර බෝධිසත්වයා ලෙස පෙනී සිටි පුද්ගලයා සති දෙකකට වැඩි කාලයක් සැඟව සිට ඇත්තේ කැස්බෑව ප්‍රදේශයේ අනුගාමිකයකුගේ නිවෙසක බව අනාවරණය වී ඇත.
මොහු යූ ටියුබ් හා සමාජ මාධ්‍ය ඔස්සේ බෞද්ධාගමට අපහාසාත්මක ධර්ම දේශනා සිදුකර තිබුණි.
අවලෝකිතේෂ්වර බෝධිසත්වයා ලෙසින් පෙනී සිටි කොඩිතුවක්කු මුදියන්සේලාගේ මහින්ද කොඩිතුවක්කු නමැති මෙම පුද්ගලයා අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාසය විසින් ඊයේ අත්අඩංගුවට ගන්නට පෙර දින 10ක කාලයක් සැඟවී සිට ඇත්තේ ඔස්ට්‍රේලියාවේ සිටින සිය අනුගාමියකු විසින් කුලී පදනම මත කැස්බෑව ප්‍රදේශයෙන් ලබා ගත් නිවසක බවත් එම නිවසට රැවුල් කොණ්ඩා වවා ගත් පිරිසක් රාත්‍රි කාලයේදී දේශනා ඇසීමට පැමිණ ඇති බවත් හෙළිවී තිබේ.
පසුගිය ජනවාරි 01 වැනිදා මොහු ඊජිප්තුවේ සිට මෙරටට පැමිණ තිබෙන අතර මොහු කැලණිය රජමහා විහාරය, බෙල්ලන්විල රජමහා විහාරය, ශ්‍රීපාදස්ථානය ඇතුළු වෙහෙර විහාරවලට ගොස් අසත්‍ය ධර්ම ප්‍රචාරක කටයුතු කිරීමට සූදානමින් සිට තිබෙන බවද මොහු සම්බන්ධයෙන් ලද පැමිණිලි හා මහජන කැලඹීම නිසා එම උත්සහායන් සාර්ථක වී නැති බවද හෙළිවී ඇත.
ත්‍රිරෝද රථයක නැඟී ගමන් කරමින් සිටියදී පන්නිපිටියේදී අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාසයේ නිලධාරීහු
මොහු විසින් පරිහරණය කරන ලද ලැප්ටොප් පරිගණකය සහ ජංගම දුරකතන කිහිපයක් ද පොලිස් භාරයට ගෙන තිබේ. සැකකරු අත්අඩංගුවට ගැනීමෙන් අනතුරුව අපරාධ පරීක්ෂණ දෙපාර්තමේන්තුවේ නිලධාරීන් ඔහු නවාතැන් ගෙන සිටි සහ දේශන පැවැත්වූ කැස්බෑව බටුවන්දර සර්වෝදය මාවතේ දෙමහල් කුලී නිවෙස ද පරීක්ෂාවට ලක් කෙරිණි.
අත්අඩංගුවට ගත් මෙම පුද්ගලයාගෙන් ප්‍රශ්න කිරීම් සිදුකරන අතර ප්‍රකාශ සටහන් කරගැනීමෙන් පසු සැකකරු කොළඹ කොටුව මහෙස්ත්‍රාත් හමුවට අද (16) වැනිදා ඉදිරිපත් කිරීමට නියමිතය.
දණ්ඩ නීති සංග්‍රහයේ (291, සහ 291 අ, ආ) යන වගන්ති යටතේ ආගමික හැඟීම්
රිදවීම යන ඒකායන චේදනාවෙන් වචන ප්‍රකාශ කිරීම, යම් පන්තියකට හෝ
ආගමකට ආගමික විශ්වාසයකට නින්දා කිරීම යන වැරදි සහ පරිගණක අපරාධ
පනත යටතේ ගැනෙන වැරදි සම්බන්ධයෙන් මොහුට එරෙහිව චෝදනා ඉදිරිපත්
කිරීමට හැකි බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ
නිහාල් තල්දූව මහතා සඳහන් කළේය. මෙම පුද්ගලයාට රටින් පිටවීම තහනම්
කරමින් මේ වන විට නියෝගයක් ද නිකුත් කර තිබෙන අතර එම නියෝගය කොළඹ කොටුව
මහේස්ත්‍රාත් අධිකරණය මඟින් නිකුත් කරනු ලබන්නේ පසුගිය 12 වැනිදා
පරිගණක අපරාධ විමර්ශන කොට්ඨාසය වෙනුවෙන් නියෝජ්‍ය සොලිසිටර්
ජනරාල් දිලීප පීරිස් මහතා අධිකරණයෙන් කළ ඉල්ලීමකට අනුවය.
සැකකරු විසින් භාවිතා කරන ලද ලැප්ටොප් පරිගණකය සහ ජංගම දුරකතනය විශ්ලේෂණ වාර්තා ලබා ගැනීම සඳහා අපරාධ පරීක්ෂණ දෙපාර්තමේන්තුවේ භාරයට ගෙන ඇත.
විදේශගතව සිටි මෙම පුද්ගලයා ඊජිප්තුවේ සිට තමා අවලෝකිතේශ්වර බෝධිසත්වයන් ලෙස පවසමින් මෙරටට පැමිණෙනු ලබන්නේ පසුගිය 01 වැනිදාය. ඒ පැමිණි ඔහු සුඛෝපභෝගි මෝටර් රථයක නැඟී කැලණි විහාරස්ථානයට ගොස් දේශනාවක් පවත්වන්නේ අපේ රටේ මිථ්‍යාව විශ්වාස කරන පිරිසකගේත් දසසිල් මාතාවකගේත් වැඳුම් පවා ලබමිනි. අවසානයේදී මෙම පුද්ගලයා සිය නිවෙස බලා ගමන් කළේ යැයි කියනු ලබන්නේ රුපියල් 10,000ක මුදලක් උපාසිකාවකගෙන් ලබාගෙනය.
මෙම පුද්ගලයා සම්බන්ධයෙන් අපරාධ පරීක්ෂණ දෙපාර්තමේන්තුවට බෞද්ධ සංවිධාන සහ භික්ෂූන් වහන්සේ ඇතුළු පාර්ශ්ව රැසක් කළ පැමිණිලිවලට අනුව පරිගණක අපරාධ විමර්ශන අංශය මඟින් පරීක්ෂණ ආරම්භ කරනු ලැබීය.
මෙම පුද්ගලයා දේශන පවත්වන විට සිය දියණියට අපයෝජනයක් කළායැයි සඳහන් කර තිබේ. ඔහුගේ එම ප්‍රකාශය පදනම් කරගෙන විමර්ශනයක් පැවැත්විය නොහැකි බවත් දියණිය හඳුනාගෙන ඇගෙන් පැමිණිල්ලක් සටහන් කරගෙන ඒ සම්බන්ධයෙන් විමර්ශනයක් පැවැත්විය හැකි බවත් උසස් පොලිස් නිලධාරියෙක් පැවසීය. ඒ ගැන ද මේ වන විට කරුණු අධ්‍යයනය කරමින් පවතින බව එම නිලධාරියා කීය.
0 Comments