පවුල් ආරවුලක් සම්බන්ධයෙන් හොරණ අධිකරණයේ විභාගය වන නඩුවකට සහභාගිවීම සඳහා පැමිණි පුද්ගලයකු පවුල් උපදේශන කාර්යාලය තුළදී තම කුඩා දරුවා ඉදිරිපිටම බිරියට පහර දී ඇතැයි හොරණ පොලිසිය පවසයි. පසුගිය 17 වෙනිදා මෙම සිද්ධිය සිදුවී ඇති අතර, පහර කෑමෙන් ලේ ගලන තුවාල සහිතව සිහිසුන්ව වැටී සිටි කාන්තාව 1990 සුවසැරිය ගිලන් රථය මඟින් හොරණ දිස්ත්‍රික් මහ රෝහලට රැගෙන ගිය බව පොලිසිය සඳහන් කරයි.
මෙම අඹුසැමි යුවළම තම එකම දරුවාගේ අයිතිය ඉල්ලන බව පොලිසිය පෙන්වාදෙන අතර ඒ සඳහා අධිකරණ නියෝග මත ඔවුන් පවුල් උපදේශන නිලධාරියා වෙත යොමුකර තිබිණ. එම නිලධාරියා පැමිණෙන විට කාර්යාලයේ දරුවා හඬමින් සිට ඇති අතර, ලේ ගලන තුවාල සහිතව වැටී සිටි කාන්තාව දැක පොලිසියට දන්වා තිබේ.
එම අවස්ථාවේ දිවා ජංගම සංචාරයේ සිටි හොරණ පොලිසියේ පොලිස් සැරයන් 41052 ප්‍රියන්ත නිලධාරියාගේ දැනුම් දීම මත සුළු පැමිණිලි අංශයේ ස්ථානාධිපති ප්‍රධාන පොලිස් පරීක්ෂක පරාක්‍රම ගුණරත්න මහතා විසින් එම ස්ථානයේ දී සැකකරු අත්අඩංගුවට ගෙන තිබේ.
මෙසේ අත්අඩංගුවට පත්වූයේ හඳපාන්ගොඩ, මෙනේරිගම ප්‍රදේශයේ පදිංචි 30 හැවිරිදි එක් දරු පියෙකි. අධිකරණ සංවිධාන පනතේ අංක 55 හා දණ්ඩනීති සංග්‍රහයේ 314 හා 316 වගන්ති යටතේ අත්අඩංගුවට ගත් සැකකරු 18 දා හොරණ අධිකරණයට ඉදිරිපත් කර ඇති අතර, ලඛන 29 දා දක්වා රක්ෂිත බන්ධනාගාරගත කරන ලෙස හොරණ වැඩ බලන මහේස්ත්‍රාත් සුනිල් ගුණරත්න මහතා නියෝග කර තිබේ.
හල්තොට - විනීතා මානෙල් ගමගේ
0 Comments