රාජ්‍ය ආරක්ෂක ස්වදේශ කටයුතු හා ආපදා කළමනාකරණ රාජ්‍ය අමාත්‍යාංශයට අයත් කැබ් රථයක අලුත්වැඩියා කටයුතු වෙනුවෙන් වැය වන මුදලෙන් අල්ලස් ලෙස රුපියල් තිස් දාහක මුදලක් ගරාජ් හිමිකාරිනියකගෙන් ඉල්ලා ලබාගත් බව කියන එම අමාත්‍යාංශයේ කළමනාකරණ සහකාරවරයකු ලබන 19 වැනිදා තෙක් රක්ෂිත බන්ධනාගාරගත කරන ලෙස කොළඹ ප්‍රධාන මහේස්ත්‍රාත් ප්‍රසන්න අල්විස් මහතා ඊයේ (09) නියෝග කළේය.
මෙලෙස රක්ෂිත බන්ධනාගාරගත කරනු ලැබුවේ රාජ්‍ය ආරක්ෂක ස්වදේශ කටයුතු හා ආපදා කළමනාකරණ රාජ්‍ය අමාත්‍යාංශයේ කළමනාකරණ සහකාර ඕමල්පේ, කෝප්පකන්ද ප්‍රදේශයේ පදිංචි ජයවර්ධනගේ බුද්ධික සෙනරත් ජයවර්ධන නමැත්තකුය.
මෙම සිද්ධිය සම්බන්ධයෙන් අල්ලස් හෝ දූෂණ විමර්ශන චෝදනා කොමිසමට පැමිණිල්ලක් ඉදිරිපත් කරනු ලැබ තිබුණේ බත්තරමුල්ල, පන්නිපිටියේ පදිංචි පත්තිනිගේ දෝන රසිකා දේශානි නමැත්තිය විසිනි.
තමන් තලපත්පිටිය ප්‍රදේශයේ ගරාජයක් පවත්වාගෙන යනු ලබන අතර, එහි පුද්ගලික අංශයේ මෙන්ම රාජ්‍ය අංශයේ වාහන, මිල ගණන් කැඳවීමෙන් පසු අලුත්වැඩියා කර දෙනු ලබන බව පැමිණිලිකාරිය සඳහන් කර ඇතැයි අල්ලස් කොමිසම අධිකරණයට දැනුම් දුන්නේය.
ඒ අනුව, රාජ්‍ය ආරක්ෂක ස්වදේශ කටයුතු හා ආපදා කළමනාකරණ රාජ්‍ය අමාත්‍යාංශයට අයත් අංක පී.සී 0892 දරන කැබ් රථය අලුත්වැඩියා කටයුතු කිරීම සඳහා තමන් භාරගත් බවත් ඊට වැය වන මුදල රුපියල් තුන් ලක්ෂ දොළොස් දහස් හත්සිය පනහක මුදලක් සඳහා සියයට දහයක කමිෂන් මුදලක් වශයෙන් රුපියල් තිස් දෙදහසක මුදලක් සැකකරු තමන්ගෙන් ඉල්ලා ලබාගත් බවත් පැමිණිල්ලේ සඳහන් කර ඇතැයි අල්ලස් කොමිසම අධිකරණයට කරුණු ඉදිරිපත් කළේය.
මෙම සැකකරු අදාළ අල්ලස් මුදල ගරාජය තුළදී ඉල්ලා ලබා ගන්නා අවස්ථාවේදී උපායදූතයකු මඟින් වැටලීමක් සිදු කර අත්අඩංගුවට ගත් බව අල්ලස් කොමිසම අධිකරණයට දැනුම් දුන්නේය.
සැකකරු වෙනුවෙන් අධිකරණයේ පෙනී සිටි නීතිඥවරයා සඳහන් කර සිටියේ තම සේවාදායකයා අදාළ අල්ලස් ඉල්ලීමක් සිදු කර නැති බවත් ආයතනය දැනුම් දීමෙන් පසුව එම ස්ථානයට ගිය බවත්ය.
ඉදිරිපත් වූ කරුණු සැලකිල්ලට ගත් මහේස්ත්‍රාත්වරයා සැකකරු ලබන 19 වැනිදා දක්වා රක්ෂිත බන්ධනාගාරගත කර එදින තෙක් නඩුව කල් තැබීය.
නිමන්ති රණසිංහ
0 Comments