ත්‍රිරෝද රථයක දී ජනප්‍රිය රංගන ශිල්පිනියකට ලිංගික අතවර කළ බවට ලද පැමිණිල්ල අනුව සැකපිට අත්අඩංගුවට ගත් පොලිස් පරීක්ෂකවරයා කැස්බෑව අධිකරණය වෙත ඉදිරිපත් කිරීමෙන් අනතුරුව මෙම මස 12 වෙනි දින දක්වා රිමාන්ඞ් භාරයට පත් කරන ලෙස මහේස්ත්‍රාත් අසන්ග බෝදරගම මහතා නියෝග කළේය.
මෙලෙස රිමාන්ඩ් භාරයට පත් කරනු ලැබුවේ අල්ලස් හෝ දූෂණ චෝදනා විමර්ශන කොමිෂන් සභාවට අනුයුක්තව සේවය කරන ඔරුවල, විද්‍යාල මාවත ලිපිනයේ පදිංචි ගැටෙන වතුකරගේ පාලිත සම්පත් විජේසිංහ යන අයයි. සැකකාර පොලිස් පරීක්ෂකවරයා එදිනට හඳුනාගැනීමේ පෙරට්ටුවක් සඳහා ඉදිරිපත් කරන ලෙස ද මහේස්ත්‍රාත්වරයා වැඩිදුරටත් නියෝග කළේය. දණ්ඩ නීති සංග්‍රහයේ 345 වගන්තිය යටතේ ලිංගික අතවර කිරීමේ චෝදනා යටතේ සැකකරු අධිකරණය වෙත ඉදිරිපත් කෙරිණි. ඉකුත් හත්වැනි දින රංගන ශිල්පිනිය කුලී ගමන් පහසුකම් සපයන ප්‍රසිද්ධ සමාගමකින් අන්තර්ජාලය ඔස්සේ ත්‍රී රෝද රථයක් ඇණවුම්කර ත්‍රිරෝද රථයට කටුබැද්ද ප්‍රදේශයේදී ගොඩ වූ ඇය නුගේගොඩ දක්වා යන ලෙස රථ රියදුරට පවසා තිබූ අතර ඔහු පිළියන්දල නගරය හරහා විකල්ප මාර්ගයට ගොස් ජාලියගොඩට දෙසට යමින් සිටියදී පවතින අධික වර්ෂාව හේතුවෙන් යාමට නොහැකි බව පවසා
ත්‍රිරෝද රථය නවතා ඇතැයි පොලිසිය කියයි.
අනතුරුව රියදුරු ලෙස කටයුතු කළ සැකකාර පොලිස් පරීක්ෂකවරයා එකවරම ත්‍රිරෝද රථය නවතා රංගන ශිල්පිනිය අසුන්ගෙන සිටි පිටුපස අසුන ට පැමිණ ඇයගේ පපු ප්‍රදේශය ඇල්ලීමට උත්සාහ කිරීමත් සමඟම ඇය ඔහු සමඟ පොරබදා රථයෙන් බිමට පැන ඇතැයි පොලිසිය කියයි. ඒ වන විට රංගන ශිල්පිනියගේ හැඳුනුම්පත බැංකු කාඩ් පත මුදල් ඇතුළු තවත් වටිනා ලිපි ලේඛන ඇතුළත් අත් බෑගයද එහි පිටුපස අසුනේ තිබී ඇති අතර සැකකරු ඒවත් රැගෙන පලා ගොස් තිබූ බව රංගන ශිල්පිනිය එදින රාත්‍රී පිළියන්දල පොලිසියට පැමිණ පැමිණිලි කර තිබිණි. රථයෙන් බිමට පැනිමෙන් රංගන ශිල්පිනියගේ දණ හිස්වලට තුවාල සිදුවී තිබිණි. සැකකරු කැස්බෑව මහේස්ත්‍රාත් අධිකරණය වෙත ඉදිරිපත් කරන ලද්දේ පොලිස් කොස්තාපල් අතපත්තු මහතා විසිනි.
බණ්ඩාරගම බිමල් ජයසිංහ
0 Comments