කඩුවෙල වෙලේ හන්දියේ ඇළ ඉවුරේ ලඳු කැලෑවක තිබී හමුවූ කඩුවෙල මහ නගර සභා සේවකයාගේ මරණය සම්බන්ධයෙන් විවෘත තීන්දුවක් අධිකරණ වෛද්ය ලසන්ත ගමගේ මහතා විසින් ලබා දෙන ලදි. ඒ අනුව සිරුරේ කොටස් වැඩිදුර පරීක්ෂණ සඳහා යොමු කෙරිණි. කඩුවෙල මහ නගර සභාවේ රියැදුරෙකු ලෙස සේවය කරන සමරනායක මුදලිගේ පාලිත සමරනායක (38) නැමැත්තාගේ මළසිරුර පසුගිය සිකුරාදා උදෑසන කඩුවෙල වෙලේහන්දියේ ඇළ මාර්ගය අසල ලඳු කැළයක තිබී නවගමුව පොලිසියේ නිලධාරීන් විසින් සොයාගෙන තිබුණි.
ඔහුගේ ශරීරයේ ඇතැම් තැන්වල ඉතා කුඩා තුවාල ලප නවගමුව හදිසි මරණ පරීක්ෂක විශ්රාමික අධිකරණ රෙජිස්ට්රාර් ඩබ්. ඒ. කේ. නිමල් මතතා විසින් නිරීක්ෂණය කළ අතර ඒවා කූඩැල්ලන් වැනි සතුන්ගේ සපා කෑමකින් ඇතිවිය හැකි බව ද ප්රකාශ විය.
මොහු තිදරු පියෙකු වන අතර තදින් මත්පැන් පානයට ඇබ්බැහි වූ අයෙකු බව පොලිසිය පවසයි.
කෙසේ වෙතත් පසුගිය සතියේ ඔහු නගර සභාවෙන් ආපදා ණය මුදලක් ද ලබාගෙන ඇති අතර එම මුදල් රාජ්ය බැංකුවක තැන්පත් කොට ඇති බව මරණ පරීක්ෂණයේ දී හෙළි විය. ඔහුගේ සාක්කුවේ රුපියල් තුන් දහසක මුදලක් ද තිබී එය මරණ පරීක්ෂණයේ දී පරීක්ෂාවට ලක්විය.
නවගමුව පොලිස් ස්ථානාධිපති ප්ර. පො. ප. ලයනල් සේනානායක මහතාගේ උපදෙස් මත පො. සැ. (56992) රෝහිත මහතා ඇතුළු නිලධාරීහු පරීක්ෂණ මෙහෙයවති.
සුගත් ප්රේමතිලක
0 Comments