සංචාරයක් සඳහා පැමිණ නැවත මවුරටට යාමට කටුනායක බලා දුම්රියෙන් යමින් සිටි සර්බියානු ජාතිකයකුට අයත් විදේශ ගමන් බලපත්‍රය, ගුවන් ගමන් බලපත් සහ ලැප්ටොප් යන්ත්‍රය ඇතුළු දෑ සහිත ගමන් මල්ල කිසියම් පුද්ගලයකු විසින් රැගෙන පලාගිය බවට ලද පැමිණිල්ලක් මත කළුතර දකුණ පොලිසිය පරීක්ෂණ ආරම්භ කර තිබේ.
දමීර් හැඩ්සික් නමැති සර්බියානු ජාතිකයකු විසින් කළ පැමිණිල්ලක් මත මෙසේ පරීක්ෂණ ආරම්භ කර තිබේ.
මාතර ප්‍රදේශයේ සංචාරක හෝටලයක නවාතැන් ගෙන සිටී සර්බියානු ජාතිකයා පසුගියදා 06 වැනිදා පස්වරුවේ බෙලිඅත්තේ සිට මරදාන බලා ධාවනය වූ ශීඝ්‍රගාමී දුම්රියේ ගමන් කර ඇති අතර, කළුතර දකුණ දුම්රිය ස්ථානයේදී කිසියම් පුද්ගලයකු සිය ගමන් මල්ල රැගෙන දුම්රියෙන් බැස පලාගිය බවට විදේශිකයා පැමිණිලි කර ඇති බව උසස් පොලිස් නිලධාරියෙක් පැවසීය.
ගමන් මල්ල තුළ විදේශ ගමන් බලපත්‍රය, ගුවන් ටිකට්පත, ඩ්‍රෝන කැමරාවක්, ලැප්ටොප් යන්ත්‍රයක්, ක්‍රෙඩිට් කාඩ්පත් කිහිපයක් සහ යුරෝ 200ක මුදලක් තිබූ බව ඔහු පවසා පොලිසියට පවසා ඇත.
සොරකම සිදු වීමෙන් පසු නැවත දුම්රිය නතර කර ඇත්තේ පාණදුර දුම්රිය ස්ථානයේ බැවින් සර්බියානුවා පාණදුර දුම්රිය ස්ථානයෙන් බැස පාණදුර දකුණ පොලිසියට සිද්ධිය දැනුම් දීමෙන් පසු කළුතර දකුණ පොලිසිය දැනුම්වත් කර ඇති බව පොලිසිය සඳහන් කරයි.
සර්බියානු ජාතිකයා හැඬූ කඳුළින් පාණදුර දකුණ පොලිසිය අසල රැඳී සිටි බවද සඳහන් වේ.
සැකකරු සොයා කළුතර දකුණ පොලිසිය පරීක්ෂණ පවත්වයි.
පොතුපිටිය - සුමිත් ප්‍රේමතිලක
0 Comments