මත්පැන් සාදයක් අතරතුර ඇති වූ බහින්බස්වීමක් දුරදිග යාමෙන් දෙපාර්ශ්වයක් අතර වූ පහරදීමකින් එකම පවුලේ සහෝදරයන් දෙදෙනකු ඇතුළු තිදෙනෙකු තුවාල ලබා රෝහල් ගත කර ඇතැයි මත්තේගොඩ පොලිසිය පවසයි.පහරදීම වැළැක්වීමට ගිය සහෝදරයන් දෙදෙනාගේ මව ද සුළු තුවාල ලබා ඇති අතර සිද්ධියෙන් නිවාස දෙකකට හා දේපළවලට හානි සිදු කර ඇතැයිද පොලිසිය කීය.
මත්තේගොඩ බණ්ඩාරනායකපුර ප්‍රදේශයේ නිවසක පැවැති මත්පැන් සාදයක් අතරතුරදී ඒ සඳහා රැගෙන ආ මත්පැන් අවසන් වීමත් සමග එහි සිටි එක් තරුණයකු පොලිසියෙන් ඇල්ලුවොත් මම බේරගන්නම් යැයි පවසා මත්පැන් පානය කර සිටි මිතුරකු කැමති කරවාගෙන තවත් මත්පැන් රැගෙන ඒම සඳහා කොට්ටාව දෙසට යතුරු පැදියකින් යමින් සිටියදී රාත්‍රී මුර සංචාරයේ නිරත පොලිස් නිලධාරීන් කණ්ඩායමක් යතුරුපැදිය නවතා පරීක්ෂාකොට මත්පැන් පානය කර සිටි පැදිකරු අත්අඩංගුවට ගෙන නීතිය ක්‍රියාත්මක කර තිබේ.
එහිදී පැදිකරු බේරා ගැනීමට නොහැකි වූ පසු පැදිකරු යළිත් මත්පැන් සාදය පැවති ස්ථානයට පැමිණ සිද්ධිය සැල කර සිටීමේදී ඊට උරණ වූ පැදිකරුගේ සහෝදරයකු ඔහුට පහර දී ඇති බව පොලිසිය සඳහන් කළේය.
ඉන් පසුව පහර කෑ තැනැත්තා එම ස්ථානයෙන් බැහැරට ගොස් තවත් හත් දෙනෙකුගෙන් පමණ කණ්ඩායමක් රැගෙන යළිත් සාදය පැවැති නිවස අසලට විත් එහි සිටි එකම පවුලේ සහෝදරයන් දෙදෙනෙකුට සවලකින්, යකඩ පොලු වලින් හා අතින් පයින් පහර දී නිවාස දෙකක ජනෙල්වලට හා දොරවල්වලට අලාභ හානි සිදුකොට පලා ගොස් තිබූ බව පොලිසිය පැවැසීය.
පහර කෑමෙන් එකම පවුලේ සහෝදරයන් දෙදෙනකු හා ඔවුන්ගේ ඥාති දියණියක විවාහ කරගැනීමට කැමැත්ත පළ කර සිටි තරුණයකු කැපුම් තුවාල සහිතව හෝමාගම මූලික රෝහලට හා ශ්‍රී ජයවර්ධනපුර රෝහලට ඇතුළත්ව ප්‍රතිකාර ලබන බව පොලිසිය කීය.
සිද්ධිය සම්බන්ධයෙන් දෙපාර්ශ්වයම පැමිණිලි කර ඇති අතර පහරදීමට පැමිණි කල්ලියේ දෙදෙනෙකු අත්අඩංගුවට ගෙන ඇති බවත් තවත් කිහිප දෙනෙකු අත්අඩංගුවට ගැනීමට නියමිත බවත් පොලිසිය ප්‍රකාශ කළේය.
සිද්ධිය සම්බන්ධයෙන් ගල්කිස්ස කොට්ඨාස භාර ජ්‍යෙෂ්ඨ පොලිස් අධිකාරි මංගල දෙහිදෙණිය මහතාගේ අධීක්ෂණය යටතේ සහකාර පොලිස් අධිකාරි දර්ශන කුරුකුලසූරිය මහතාගේ උපදෙස් මත මත්තේගොඩ පොලිසියේ ස්ථානාධිපති පොලිස් පරීක්ෂක ඉන්දික කුමාර මහතාගේ මෙහෙය වීමෙන් අපරාධ විමර්ශන අංශයේ ස්ථානාධිපති උප පොලිස් පරීක්ෂක චානක මහතා ඇතුළු නිලධාරීහු ඉදිරි පරීක්ෂණ පවත්වති.
මත්තේගොඩ ශාන්ත ප්‍රදීප් කුමාර කුලරත්න
0 Comments