මිග් යානා ගනුදෙනුවට අදාළව සැකකරුවන් ලෙස නම් කර සිටින සිංගප්පූරු ජාතික ටී. එස්. ලී සහ එන් ජේ. ලේක්හිම් යන දෙදෙනා සම්බන්ධයෙන් කරුණු දැක්වීමට ලබන 17 වනදා අධිකරණයේ පෙනී සිටින ලෙස කොටුව මහේස්ත්‍රාත් තිළිණ ගමගේ මහතා අපරාධ පරීක්ෂණ දෙපාර්තමේන්තුවට ඊයේ (08) නියෝග කළේය.
සිංගප්පූරු ජාතිකයන් මේ නඩුවේ සැකකරුවන් නොවන බවත් ඔවුන් දෙදෙනාට නිකුත් කර ඇති නිල් නිවේදනය ආපසු කැඳවන ලෙසත් ඉල්ලමින් ජනාධිපති නීතිඥ මෛත්‍රී ගුණරත්න මහතා ඇතුළු නීතිඥයින් සිදු කළ ඉල්ලීම සලකා බැලූ මහේස්ත්‍රාත්වරයා මේ නියෝගය සිදු කළේය.
මේ සිද්ධිය සම්බන්ධයෙන් මෝසමක් ගොනු කරමින් ජනාධිපති නීතිඥ මෛත්‍රී ගුණරත්න මහතා දන්වා සිටියේ මෙම ප්‍රශ්නගත ගුවන් යානා ගනුදෙනුවේදී මේ විදේශ ජාතිකයන් දෙදෙනා තැරැව්කරුවන් ලෙස පමණක් කටයුතු කර ඇති බවය.
නීතිඥවරයා මෙසේ ද කීය.
“මේ සිද්ධියට අදාළව ගනුදෙනුව සිදු වූ අවස්ථාවේදී කටයුතු කළ මිග් යානා ගනුදෙනුවට අදාළ ගිවිසුම් අත්සන් කළ හිටපු ගුවන් හමුදාපති එයාර් මාර්ෂල් රොෂාන් ගුණතිලක යන අය මෙහි ප්‍රධානතම සැකකරුවෙක්. ඔහු අත්අඩංගුවට නොගෙන මෙහි තැරුව්කරුවන් ට වරෙන්තු නිකුත් කර තිබෙනවා. ප්‍රශ්නගත ගනුදෙනුවේ මුල් ගිවිසුම අස්ථානගත වී ඇති බවට එයාර් වයිස් මාර්ෂල් ජයනාත් කුමාරසිංහ යන අය ප්‍රකාශ ලබා දී තිබෙනවා. ඔහු සම්බන්ධයෙන් ගෙන ඇති පියවර කුමක්ද? රාජ්‍යයන් දෙකක් අතර එළැඹි ගිවිසුමක්. එලෙස අස්ථානගත විය හැකිද? ඩොලර් මිලියන 15ක් සම්බන්ධ ගනුදෙනුවක්. අපරාධ පරීක්ෂණ දෙපාර්තමේන්තුව මේ සම්බන්ධයෙන් අද වනතුරු පියවර ගෙන නැහැ. මේ නඩුව වසර 8ක් තිස්සේ පවත්වාගෙන යනවා. අපි මෙහි අතරමැදියන්. වරදක් කර නැහැ. නඩු ගොනුවත් අඩි එකහමාරක් පමණ උසයි .
මේ දෙදෙනා බැලූ බැල්මට සැකකරුවන් නොවන බව පෙනී යනවා. විදේශ ජාතිකයන් දෙදෙනා මේ සිද්ධියේ සාක්ෂිකරුවන් විය යුතුයි. එවිටයි මේ නඩුව පවත්වාගෙන යා හැකි වන්නේ. එහෙයින් ඔවුන්ට මේ නඩුව සඳහා පැමිණිමට හැකි වාතාවරණයක් සකස් කර දෙන්න” යැයි විදේශ ජාතිකයන් දෙදෙනා වෙනුවෙන් දීර්ඝ කරුණු දැක්වීමක් සිදු කරමින් ජනාධිපති නීතිඥ මෛත්‍රී ගුණරත්න මහතා අධිකරණයෙන් ඉල්ලා සිටියේය.
මේ කරුණුවලට සවන් දුන් මහේස්ත්‍රාත්වරයා මේ සම්බන්ධයෙන් ඉදිරි දින කරුණු දක්වන ලෙස අපරාධ පරීක්ෂණ දෙපාර්තමේන්තුවට නියෝග කළේය.
මෙම සිද්ධියේ සැකකරුවෙක් ලෙස අත්අඩංගුවට ගැනීමෙන් අනතුරුව රක්ෂිත බන්ධනාගාර ගත කර සිටි හිටපු රුසියානු තානාපති උදයංග වීරතුංග මහතා ඇප මත මුදා හැර ඇත.
සිංගප්පූරු ජාතික ටී. එස්. ලී, එන්. ජේ. ලේක්හිම්, පෙරගොඩව් ,මයිකෝලා කුර්දකෙව් සහ ශ්‍රී ලංකා ගුවන් හමුදාවේ පී. දොන් ජයනාත් කුමාරසිරි යන පුද්ගලයන් මෙන්ම ඩී එස් එලායන්ස් සමාගම,බෙලරුස් හෝල්ඩින්ග්ස් සමාගම් මෙම නඩුවේ සැකකරුවන් ලෙස නම් කර ඇත.
2018 වසරේ දෙසැම්බර් මස 12 වනදා මිග් යානා ගනුදෙනුවට අදාළව සිංගප්පූරුවේ පිහිටි බෙරිමිසා සමාගමේ අධ්‍යක්ෂවරුන් වන ටී. එස්. ලී, ඔහුගේ බිරිය වන එන්. ජේ. ලේක්හිම් යන දෙදෙනාට කොටුව මහේස්ත්‍රාත් අධිකරණය ජාත්‍යන්තර වරෙන්තු නිකුත් කර ඇත.
සුභාෂිණී සේනානායක
0 Comments