ත්‍රිරෝද රථයකින් කුලී ගමනක් යමින් සිටි නවක ටෙලි නාට්‍ය නිළියකට එම ත්‍රිරෝද රථයේ රියැදුරු විසින් ලිංගික අතවරයක් සිදු කර පළායාමේ සිදුවීමක් පිළියන්දලින් වාර්තා වෙයි.
පෙරේදා සවස මෙම සිදුවීම සිදුව ඇත්තේ පිළියන්දල ජාලියගොඩ ප්‍රදේශයේදීය. නවක නිළිය විසින් මොරටුව කටුබැද්ද ප්‍රදේශයේ සිට නුගේගොඩ ප්‍රදේශය දක්වා පෞද්ගලික ගමනක් සඳහා කුලී රථ සේවා පහසුකම් සපයන ඇප් එකකින් ත්‍රිරෝද රථයක් ලබා ගෙන ඇත.
පසුව එම ප්‍රදේශයේ සිට නුගේගොඩ දක්වා ත්‍රිරෝද රථය ගමන් කර ඇත්තේ පිළියන්දල ප්‍රදේශය හරහාය. එහිදී වර්ෂාවක්ද පැවති අතර ත්‍රිරෝද රථයේ රියැදුරු එහි යම් කාර්මික දෝෂයක් ඇති බව පවසා රථය ජාලියගොඩ ප්‍රදේශයේදී පාළු පෙදෙසක මාර්ගය අයිනේ නවතා ඇත. පසුව එක්වරම පසුපස අසුනේ සිටි රංගන ශිල්පිනිය වෙත පැමිණ ඇයට බලහත්කාරකමක් සිදු කර තිබේ.
රියදුරු ඇයගේ මුව වසා පපු පෙදෙස අතගාමින් අතවරයකට උත්සාහ කර ඇති අතර ඇය කෑගැසූවත් අවට කිසිවෙකු නොසිටි නිසා එකවර බේරුමක් තිබී නැත.
කෙසේ වෙතත් ඇය ත්‍රිරෝද රථ රියැදුරා තල්ලු කර දමා රථයෙන් පිටතට එන්නට ටික වේලාවකින් සමත්වී ඇති අතර එළියට විත් කෑ ගසා තිබේ. තරමක් දුරින් සිටි පිරිසකට මෙම හඩ ඇසී ඇත. එහිදී අවට පිරිස එම ස්ථානයට රැස් වනවාත් සමගම ත්‍රිරෝද රථ රියැදුරු රථයෙන් නැගී එම ස්ථානයෙන් පලා ගොස් ඇත.
පලාගිය සැකකරු සොයා පිළියන්දල පොලිසියේ ස්ථානාධිපති ප්‍රධාන පොලිස් පරීක්ෂක දිනේෂ් අත්තරගමගේ නියමයෙන් පරීක්ෂණ ක්‍රියාත්මක වූ අතර
රංගන ශිල්පිනියකට ත්‍රිරෝද රථය තුළ දී ලිංගික අතවර කළ ත්‍රිරෝද රථ රියදුරු ලෙස කටයුතු කර ඇත්තේපොලිස් පරීක්ෂකවරයකු බවට හඳුනාගෙන අත්අඩංගුවට ගන්නට පැය කිහිපයක් තුළ සමත් විය. අදාළ ඇප් එකෙහි මෙම සැකකරුගේ ලියාපදිංචි දත්ත තිබීම මෙම අත්අඩංගුවට ගැනීමේදී පහසුවක් වී තිබේ.
සැකකරු අල්ලස් හෝ දූෂණ චෝදනා විමර්ශන කොමිසමට අනුයුක්තව සේවය කරන්නෙකි. රංගන ශිල්පිනිය කුලී ගමන් පහසුකම් සපයන අන්තර්ජාල ඇප් එක ඔස්සේ ත්‍රිරෝද රථයෙ කටුබැද්දේ සිට ඇනවුම් කර තිබූ බව පැවසේ. එහිදී පැමිණ තිබූ රථයට ගොඩ වූ ඇය නුගේගොඩ දක්වා යන ලෙස රියැදුරුට පවසා තිබූ අතර ඔහු කටුබැද්දේ සිට පිළියන්දල හරහා ජාලියගොඩට දෙසට යමින් සිටියදී පවතින අධික වර්ෂාව හේතුවෙන් යාමට නොහැකි බව පවසා රථය නවතා ඇතැයි පොලිසිය කියයි. අනතුරුව රියැදුරු ලෙස කටයුතු කළ සැකකාර පොලිස් පරීක්ෂකවරයා එකවරම රංගන ශිල්පිනිය අසුන්ගෙන සිටි පිටුපසු අසුන ට පැමිණ ඇයගේ පපු ප්‍රදේශය ඇල්ලීමට උත්සාහ කිරීමත් සමඟම ඇය ඔහු සමඟ පොරබදා රථයෙන් බිමට පැන ඇතැයි පොලිසිය කියයි. ඒ වන විට රංගන ශිල්පිනියගේ හැඳුනුම්පත බැංකු කාඩ් පත මුදල් ඇතුළු තවත් වටිනා ලිපි ලේඛන ඇතුළත් අත් බෑගයද එහි පිටුපස අසුනේ තිබී ඇති අතර සැකකරු ඒවාත් රැගෙන පලා ගොස් තිබිණි. සැකකාර පොලිස් පරීක්ෂකවරයාගෙන් ඒ පිළිබඳ ප්‍රශ්න කිරීමේදී තමන් ඒවා රැගෙන නොගිය බව ප්‍රකාශ කළ බව පොලිස් නිලධාරියෙක් පැවසීය.
ත්‍රිරෝද රථයෙන් බිමට පැනිමෙන් රංගන ශිල්පිනියගේ දණ හිස්වලට තුවාල සිදුවී තිබූ අතර ඇය පෞද්ගලික රෝහලකින් ප්‍රතිකාර ලබා ගෙන ඇතැයි පොලිස් ආරංචි මාර්ග සඳහන් කරයි.
සැකකරු රංගන ශිල්පිනිය සමඟ ගමන ආරම්භ කිරීම සටහන්ව ඇත්තේ කටුබැද්ද ප්‍රදේශයේ බවට හා ඔහු එම කුලී ගමන අවසන් කර ඇත්තේ කළුබෝවිල පැපිලියාන ප්‍රදේශයෙන් බවට පොලිස් විමර්ශනවලදී අනාවරණය වී ඇත. සැකකාර පොලිස් පරීක්ෂකවරයා රංගන ශිල්පිනියට අතවර කිරීමට යොදාගත් ත්‍රිරෝද රථය සඟවා තිබෙන අතර එය සොයා පොලිසිය පරීක්ෂණ පවත්වයි. සැකකරු බළන්ගොඩ රාස්සගල ප්‍රදේශයේ පදිංචි වයස අවුරුදු 40ක පුද්ගලයෙකි. ඔහු කැස්බෑව මහේස්ත්‍රාත් අධිකරණය වෙත ඉදිරිපත් කිරීමට නියමිතය.
ගල්කිස්ස කොට්ඨාස භාර ජ්‍යෙෂ්ඨ පොලිස් අධිකාරී මංගල දෙහිදෙණිය සහකාර පොලිස් අධිකාරි එම් ඩි ඩි නිලංග මහත්වරුන්ගේ උපදෙස් මත පිළියන්දල පොලිසියේ ස්ථානාධිපති ප්‍රධාන පොලිස් පරීක්ෂක දිනේෂ් අත්තරගම මහතාගේ මෙහෙයවීමෙන් ළමා හා කාන්තා කාර්යාංශයේ ස්ථානාධිපතිනි කාන්තා උපපොලිස් පරීක්ෂක මදාරා සමරදිවාකර මෙනෙවිය පරීක්ෂණ පවත්වයි.
0 Comments