රාජ්‍ය ඇමති සනත් නිශාන්ත රියඅනතුරකින් මරුට

අද (25) අලුයම කටුනායක අධිවේගී මාර්ගයේ සිදුවූ රිය අනතුරකින් රාජ්‍ය අමාත්‍ය සනත් නිශාන්ත (48) ජීවිතක්ෂයට පත්ව තිබේ.

කටුනායක සිට කොළඹ දෙසට ධාවනය කරමින් තිබූ රාජ්‍ය අමාත්‍යවරයා ගමන් කරමින් සිටි සුඛෝපභෝගි රථය, ඒ දෙසටම ධාවනය කරමින් තිබූ කන්ටේනරයක පිටුපස ගැටීමෙන් මෙම අනතුර සිදුව ඇති අතර

කන්ටේනරයේ පිටුපස ගැටුණු ජීප් රිය ඉන් අනතුරුව අධිවේගී මාර්ගයේ ආරක්ෂක වැටේ ගැටී ඇත.
අනතුරින් බරපතළ තුවාල ලැබූ රාජ්‍ය අමාත්‍යවරයා, ඔහුගේ ආරක්ෂක නිලධාරියා සහ එම රථයේ රියදුරා රාගම රෝහලට ඇතුළත් කර ඇති අතර එහිදී රාජ්‍ය අමාත්‍යවරයා සහ ආරක්ෂක නිලධාරියා ජීවිතක්ෂයට පත්ව තිබෙයි.  අද පාන්දර 2ට පමණ එම අනතුර සිදුව තිබුණි.
එහිදී මියගොස් සිටි ආරක්ෂක නිලධාරියා, ජයකොඩි නම් පොලිස් කොස්තාපල්වරයෙකි.රථය පැදවූ රියදුරුගේ ජීවිතය බේරිණි. රියැදුරු තුවාල ලබා රාගම රෝහලට ඇතුළත් කර ඇත.
කටුනායක අධිවේගී මාර්ගයේ 11 වැනි කිලෝමීටර් කණුව අසළදී ‍මෙම අනතුර සිදුව ඇත.

ඊයේ (24) රාත්‍රියේ හලාවත - බණ්ඩාරවත්ත ප්‍රදේශයේ හෝටලයක පැවති විවාහ මංගල සාදයකට සහභාගි වී ආපසු කොළඹ බලා යමින් සිටින අතරතුර මෙම අනතුර සිදුව ඇතැයි වාර්තාවේ.

නීතිඥ චමරි පෙරේරා සමඟ විවාහ වී සිටින සනත් නිශාන්ත මහතා දියණියන් තිදෙනෙකුගේ සහ එක් පුතෙකුගේ පියෙකි.
2015 සිට පුත්තලම් දිස්ත්‍රික්කය නියෝජනය කරමින් පාර්ලිමේන්තුව නියෝජනය කළ සනත් නිශාන්ත මියයන විට 48 වන වියෙහි පසුවිය.
සනත් නිශාන්ත පසුගිය කාලයේ දේශපාලන කථාබස්වලදී ඉදිරියෙන්ම සිටි චරිතයක් වූ අතර ඔහු සහ රාජපක්ෂ පවුල අතර සම්බන්ධය මත ඇතැම් දේ ප්‍රකට විය. ඔහු ආන්දෝලනාත්මක කථාබස් කීමටද සමත්කම් දැක්වූවෙකි.
සනත් නිශාන්ත කිහිප වතාවක්ම පහරදීම් සම්බන්ධයෙන් අත්අඩංගුවට ගෙන ඇත. 2008 වසරේ ඔහු සහ ඔහුගේ සොහොයුරා වන ජගත් සමන්ත එක්ව එවකට ආරච්චිකට්ටුව ප්‍රාදේශීය ලේකම්වරයාගේ රාජකාරියට බාධා කර පහර දුන් අතර 2015 ජනාධිපතිවරණයේදී ඔහු සහ ඔහුගේ ආධාරකරුවන් එක්ව අපේක්ෂක මෛත්‍රීපාල සිරිසේන මහතාගේ කාර්යාලයකට පහර දී ආධාරකරුවන්ට පහර දීමකට සම්බන්ධ විය.

2020 දී වොලිබෝල් පිටියක් ඉදිකිරීම සඳහා මීගමුවේ කඩොලාන විනාශ කිරීමට ඉඩ දෙන ලෙස වන සංරක්ෂණ නිලධාරීන්ට සහ ප්‍රදේශවාසීන්ට බල කිරීමට නිශාන්ත උත්සාහ කරන සිද්ධියක් නිසාද ඔහු කථාබහට ලක්විය.
පරිසර පද්ධතියට සිදුවන බලපෑම පිළිබඳව රාජ්‍ය නිලධාරියෙකු ප්‍රශ්න කළ  පසු ඔක්සිජන් අවශ්‍ය කුමකටදැයි ප්‍රශ්න කිරීම ආන්දෝලනයට තුඩු දුන්නේය.

2020 අගෝස්තු මාසයේදී පුත්තලම ආනවිලුන්දාව ප්‍රදේශයේ රැම්සා තෙත් බිමක අක්කරයක්වත් ඉස්සන් වගාව සඳහා නීති විරෝධී ලෙස එළිපෙහෙළි කර ඇත. මෙය විශාල කෝපයක් ඇති කළ අතර විමර්ශනය සඳහා කමිටුවක් පත් කරන ලදී. සනත් නිශාන්තගේ සොහොයුරා වන ජගත් සමන්ත විසින් මෙම විනාශය මෙහෙයවා ඇති බව පොලිස් පරීක්ෂණවලදී අනාවරණය විය.

සනත් නිශාන්ත මහතා සැප්තැම්බර් 29 සහ ඔක්තෝබර් 5 යන දිනවල අධිකරණයට අපහාස කිරීමේ චෝදනා සම්බන්ධයෙන් අධිකරණයේ පෙනී නොසිටීම හේතුවෙන් 2022 ඔක්තෝම්බර් 22 වැනි දින ඔහුව අත්අඩංගුවට ගැනීමට අභියාචනාධිකරණය වරෙන්තු නිකුත් කළේය.
2022 අරගලය සමයේ ප්‍රතිප්‍රහාර මෙහෙයවීම හේතුවෙන් ඔහු අත්අඩංගුවට පත්ව රක්ෂිත බන්ධනාගාරගතව සිටියේය.
‍ගෝඨාභය රාජපක්ෂ මහතා ජනාධිපති ධුරයට පත්වීමෙන් අනතුරුව ධීවර රාජ්‍ය අමාත්‍ය ධුරයට පත් වන අතර,
මිය යන විට ඒ මහතා වත්මන් රජයේ ග්‍රාමීය ජල සම්පාදන රාජ්‍ය ඇමතිවරයා ලෙස කටයුතු කරමින් සිටියේ ය.