වික්ටෝරියා වේල්ල මතින් වාහන ගමනාගමනයට අවසර දීමෙන් වේල්ලේ ස්ථායිතාවට හානිවීම ඇතුළු බරපතළ ගැටලු රැසක් පැන නැඟිය හැකි බව මහවැලි ප්‍රධාන ජලාශ හා වේලි භාර ඉංජිනේරුවරු පවසති.
අධි ආරක්ෂක කලාපයක් ලෙස ගැසට් කර තිබෙන වේල්ල ආශ්‍රිත ප්‍රදේශයේ අධි සංවේදක උපකරණ විශාල ප්‍රමාණයක් සවි කර තිබෙන බවත්, වාහන ගමනාගමනයට විවෘත කිරීමෙන් වේල්ලට ඇති වන කම්පනය එහි ස්ථායිතාවට හානියක් බවත් ඔවුහූ පෙන්වා දෙති. වික්ටෝරියා වේල්ල මතින් සැහැල්ලු වාහන ගමනාගමනයට අවසර දිය යුතු බවට යෝජනාවක් මහනුවර දිස්ත්‍රික් සම්බන්ධීකරණ කමිටුවට ඉදිරිපත්ව තිබූ අතර, මධ්‍යම පළාත් ආණ්ඩුකාර ලලිත් යූ. ගමගේ, මහනුවර දිස්ත්‍රික් ලේකම් චන්දන තෙන්නකෝන් මහත්වරුන් අදහස් දක්වමින් පවසා සිටියේ එම තීරණය ක්‍රියාත්මක කිරීමේ වරදක් නොමැති බවයි. මේ සම්බන්ධව අවසන් තීරණය ගැනීමට අදාළ යෝජනාව මහවැලිය භාර අමාත්‍යාංශයට යොමු කිරීමට සම්බන්ධීකරණ කමිටුවෙන් තීරණය කරනු ලැබීය.
වේල්ලේ නඩත්තු කටයුතු සඳහා විශාල දොඹකර යොදාගැනීම සිදු වන අවස්ථාවල පැය පහක පමණ කාලයක් වේල්ල මතින් ඇති මාර්ගය වසා දමන බවත්, මෙවැනි කරුණු ගණනාවක් හේතුවෙන් වේල්ල මතින් වාහන ගමනාගමනයට අවසර දීම ගැටලු සහගත බවත්, මේ ආකාරයට අවසර දීමක් සිදු වුවහොත් වේල්ල මතින් ජලාශයට පැන සියදිවි නසා ගැනීම් පවා වාර්තා වීමට ඉඩ ඇති බවත් මහවැලි ජලාශ හා වේලි භාර ඉංජිනේරුවරු ප්‍රකාශ කරති.
අසේල කුරුළුවංශ
0 Comments