පෙබරවාරි 29 අද අසුබ දවසක්ද?

වසර 4කට පසුව උදාවන අධික අවුරුද්දක විශේෂ දවසක් ලෙස අද (පෙබරවාරි 29දා) දිනය හඳුන්වාදිය හැකියි. ඒ අනුව මේ අවුරුද්දට දින 366ක් යෙදී තිබේ. මේ විශේෂිත දිනය පිළිබඳව ඔබ නොදත් තතු සහ මනෝ විද්‍යාත්මකව මෙදින සැමරිය යුතු ආකාරය පිළිබඳව ඌව වෙල්ලස්ස විශ්වවිද්‍යාලයේ, මනෝ උපදේශක, මනෝ චිකිත්සක, වෘත්තීය මාර්ගෝපදේශක අකිල ඖෂධ බණ්ඩාර මහතා සදහන් කරන්නේ මෙවැනි අදහසකි.

ලෝකයේ සෑම ජන කොටසක්ම අලුත් අවුරුදු උත්සවයන් ඔවුන්ගේ ආගමානුකූලව කිහිපවරක්ම සමරනු ලබනවා. සාමාන්‍යයෙන් ජනවාරි පළමුවන දින, සිංහල අලුත් අවුරුදු දිනය වැනි සංස්කෘතිකමය වශයෙන් අලුත් අවුරුදු උදාවන් සමරනු ලබනවා. අලුත් අවුරුද්දක් ලෙස හඳුන්වනු ලබන්නේ දින 365ක කාලයක්. මෙහිදී පෘතුවිය සූර්යයා වටා කක්ෂයේ පරිභ්‍රමණය වීමට දින 365ක් ගත වෙනු ලබනවා. පෘතුවිය තමා වටා පැය විසි හතරක් භ්‍රමණය වෙනවා. මෙය නිවැරදිව ගණනය කළ විට දින 365යි, පැය 5යි, විනාඩි 48, තත්පර 45ක කාලයක් ලෙස ගමන් කරනු ලබනවා. නමුත් අප ගණනය කරන විට දින 365 වශයෙනුයි ගණනය කරනු ලබන්නේ. මීට අමතරව තිබෙන පැය ගණන නිවැරදිව ගණනය කළ විට දින 365.2425 වශයෙන් සඳහන් වෙනවා. මේ ගණනය කිරීම අනුව වසර හතරකට පසුව අධික අවුරුද්දක් ලෙස පෙබරවාරි 29වන දිනය යෙදී තිබෙනවා.

පෙබරවාරි 29ට ඇති විවිධ අර්ථකථනයන්

මුල්කාලීනව විවිධ දින දර්ශනයන් තුළ පෙබරවාරි 29 සඳහා විවිධ අර්ථකථන ලබා දී තිබෙනවා. චීන දින දර්ශනය, හීබෲ දින දර්ශනය, බෞද්ධ දින දර්ශනය, මායාවරුන්ගේ දින දර්ශනය, හින්දු දින දර්ශනය ලෙස විවිධ කාල වකවානු තුළ දින දර්ශනයන් ලෝකයේ බිහි වී තිබෙනවා. මුල්කාලීනව ජුලියස් සීසර් විසින් දින දර්ශනයක් නිර්මාණය කරනු ලැබ තිබෙනවා. එය රෝමානු දින දර්ශනය ලෙස නම් කර තිබෙනවා. එම දින දර්ශනයේ මාස දහයක් සහ ඊට අමතරව ශීත කාලය තුළ තිබෙන දවස්ද ඇතුළත් කර තිබෙනවා. මේ දින දර්ශනය නිර්මාණය සදහා ටොලමියානු පරම්පරාවේ අවසාන පුරුක වන ක්ලියෝ පැට්‍රාගේ සහයෝගයද ජුලියස් සීසර්ට ලැබී තිබෙන බව සඳහන් වෙනවා. වර්තමානයේ භාවිත කරන කැලැන්ඩරය නිර්මාණය වන්නේ ක්‍රිස්තු පූර්ව 45 ජනවාරි පළමු දින සිට ජුලියස් සීසර්ගේ දින දර්ශනය ක්‍රියාත්මක වීමෙන් පසුව බවයි සඳහන් වන්නේ. නමුත් එම දින දර්ශනය විවිධ අඩුපාඩුවලින් සමන්විත බැවින්, 1982දී සංශෝධනයක් සිදුකරනු ලැබ තිබෙනවා. දහතුන් වන ග්‍රෙගරි පාප්තුමා විසින් නව දින දර්ශනයක් ඉදිරිපත් කර තිබෙනවා. එම දින දර්ශනය ග්‍රෙගේරියානු දින දර්ශනය ලෙස හඳුන්වනු ලැබෙනවා. එලෙස බලන විට අප අද භාවිත කරනු ලබන්නේ මෙම ග්‍රෙගේරියානු දින දර්ශනයයි.


විවිධ සම්ප්‍රදායන් තුළ පෙබරවාරි 29 සැමරුම

සෑම වසර හතරකට වරක්ම අධික දිනයක් පෙබරවාරි 29 වන දිනයට යෙදෙනවා. පෙබරවාරි 29වන දිනට විවිධ සම්ප්‍රදායන් යෙදී තිබෙනවා . ග්‍රීකයන් පෙබරවාරි 29වන දිනය අවාසනාවන්ත දිනයක් ලෙස නම් කර තිබෙනවා. ස්කොට්ලන්තයේ ජනතාව එදිනට දරුවන් උපත ලැබීම අවාසනාවන්ත ලෙසයි දකින්නේ. එලෙස සිතීමට පෙලඹී තිබෙන්නේ පෙබරවාරි 29 උපත ලබන දරුවෙකු සාමාන්‍යයෙන් වසර හතරකට වරක් වයසට යනු ලබන බවට න්‍යායාත්මකව සිතා බැලීමෙන් අනතුරුවයි. ගණනය කිරීමේදී නියමිත වසර තුළදී ඒ ඒ අදාළ වයස් වලට පා තැබුවද නිතැතින්ම උපන් දිනයක් සැමරීමට සිදුවන්නේ වසර හතරකින් පසුවයි. එසේ නොමැති නම් පෙබරවාරි 28ට හෝ මාර්තු පළවෙනිදා සිය උපන් දිනය සැමරිය යුතු වෙනවා. එම නිසා එදිනට ඉපදීම අවාසනාවන්ත බව ඔවුන් සිතා තිබෙනවා.

අවුරුද්දක, අධික දිනයේ ඉපදීමේ සම්භාවිතාව

ලෝකයේ අධික දිනයක ඉපදීමේ සම්භාවිතාව පුද්ගලයන් 1.461 දෙනෙකුට 1ක් අයෙක් ලෙසයි පෙබරවාරි 29වන දිනට උපත ලබන්නේ. ඒ වගේම ලෝක ජනගහනයෙන් 0.07ටත් අඩු ප්‍රමාණයක් මෙදිනට උපත ලබනු ලබනවා.මෙවැනි දිනක උපත ලබන්නන් ඉංග්‍රීසි භාෂාවේදී 'Leapers' හෝ 'Leaplings' වශයෙන් හඳුන්වනු ලබනවා. මෙදිනට උපත් දිනය සමරනු ලබන ලෝකයේ ප්‍රසිද්ධ චරිත රාශියක්ම සිටින අතර, ඒ අතරින් සංගීත ක්ෂේත්‍රයේ ප්‍රසිද්ධ චරිත ලෙස ජා රූල් (රැප්නායක), මාර්ක් ෆොස්ටර් (රොක් ගායක), ඩීනා ෂෝ (පොප් ගායිකා), ඩේව් විලියම්ස් යන අයද, තෙවන පාවුළු පාප් වහන්සේගේ උපන් දිනයද, ක්‍රීඩා ක්ෂේත්‍රයෙන් ෂෝන් ඇබොට් (ඔස්ට්‍රේලියානු ක්‍රිකට් ක්‍රීඩක), ක්ලෝඩියා විලියම්ස් (නවසීලන්ත ටෙනිස් ක්‍රීඩිකා) යන අයගේ උපන් දිනයද යෙදී තිබෙනවා.


කාන්තාවන් පිරිමින්ට විවාහ යෝජනා ගෙනෙන දිනයක්

ඊට අමතරව විශේෂිත සිදුවීම් දෙස බලන විට පස්වන සියවසේ අයර්ලන්තයේ ශාන්ත බ්‍රිජට්  විසින් කාන්තාවන්ට පිරිමියෙකුට විවාහ යෝජනා සිදුකිරීමට දවසක් ලබාදෙන ලෙස, ශාන්ත පැට්ට්‍රින්ගෙන් ඉල්ලීමක් කර තිබෙනවා. සාමාන්‍යයෙන් සිදුවන්නේ පිරිමියෙකු විසින් කාන්තාවකට විවාහ යෝජනාවක් සිදුකිරීමයි. එවිට ඊට දිනයක් ලෙස ශාන්ත පැට්‍රික් ලබාදෙන දිනය වන්නේ පෙබරවාරි 29වන දිනයයි. ශාන්ත පැට්‍රික් ප්‍රකාශ කර තිබෙන්නේ සෑම වසර හතරකටම සැරයක් එළඹෙන පෙබරවාරි 29වන දිනට කාන්තාවන්ට ඇය කැමති පිරිමියෙකුගෙන් විවාහ වීමට යෝජනාවක් ගෙන ඒමට හැකි බවයි. ඒ තරම්ම එදින සුවිශේෂී බව අපට දක්නට ලැඛෙනවා. එදිනට විවාහ යෝජනා ගෙන යන කාන්තාව රතු පාට පැලඳිය යුතුයි. යම් හෙයකින් මෙලෙස කාන්තාවක් පිරිමියෙකුට යෝජනාවක් කරන විට එම පිරිමි පුද්ගලයා එම යෝජනාවට අකමැති වුවහොත්, එවිට එම පිරිමි පුද්ගලයා විසින් එම කාන්තාවට අත්වැසුම් යුගල දුසිමක් ලබාදිය යුතු බවට නීතියක්ද පනවා තිබෙනවා. එයට හේතුව ලෙස සදහන් කර සිටින්නේ, කාන්තාව විවාහ වීමකදී අතැඟිල්ලට මුද්දක් දමන බැවින්, පිරිමියාගෙන් ප්‍රතික්ෂේප වූ කාන්තාව අතැගිල්ලට මුද්දක් දැමීමට නොහැකි නිසා එය වසා ගැනීමට අත් ග්ලවුස් ලබාදිය යුතු වීමයි. පසුකාලීනව මෙය අයර්ලන්තය, ස්කොට්ලන්තය, එංගලන්තය ඇතුළු බ්‍රිතාන්‍යය පුරාම පැතිරී ගියා. සමහර රටවල්වල මෙය නීතියක් බවටත් ඇතැම් කාලවලදී පත්වී තිබෙනවා.


අංක විද්‍යාවට අනුව පෙබරවාරි 29

අංක විද්‍යාවට අනුව සලකා බලන විට පෙබරවාරි 29 ආධ්‍යාත්මික බලයෙන් ඉතාමත්ම වැඩි දිනයක් ලෙස හදුන්වා දී තිබෙනවා. ආධ්‍යාත්මික ප්‍රජාවන් තුළ නව පිබිදීමක් ඇති කළ හැකි දිනයක් ලෙස පෙබරවාරි 29 දිනය හදුන්වනු ලබනවා. ඊට අමතරව අංක විද්‍යාවේ සඳහන්වන්නේ, පෙබරවාරි 29 දිනය ජීවිතයේ නව පිම්මක් ගත හැකි දිනයක් ලෙසයි. වසර හතරක් තිස්සේම මිනිසෙකුට කර ගැනීමට නොහැකි වූ දේවල් ඉටුකර ගැනීමට හොදම දිනයක් ලෙසද මෙදින නම් කර තිබෙනවා. ජීවිතේ නව පිඹීදීමක් ලබාගෙන, නැවත අලුත් ආරම්භයකින් පටන් ගැන්මට මෙදින වඩාත් සුදුසු බව සදහන් වෙනවා. අධික දිනයක් ලැබීම තුළින් තවදුරටත් අමතර කාලයක් ලැබෙනවා. ඔබට වසරකට සැරයක් තවත් දිනයක් ලැබෙනවා. එය හරිම අපූරු දෙයක්. ඒ වගේම පෙබරවාරි 29 දිනය ස්වභාවධර්මයෙන් ලැබුණ දිනයක් ලෙසත් හඳුන්වනු ලබනවා. ස්භාවධර්මය සහ ලෝකය අපගේ අත්දැකීම්වල කැඩපතක් බැවින්, ලෝකය දෙස බැලීමට, ස්භාවධර්මයේ ද්වාරයක් විවෘත වන දිනයක් ලෙසත් මෙම පෙබරවාරි 29 දිනය හඳුන්වා දී තිබෙනවා.

ජ්‍යෝතිෂවේදයට  අනුව පෙබරවාරි 29

ජ්‍යෝතීර් විද්‍යාවට අනුව මිනිසුන්ගේ ආධ්‍යාත්මික දියුණුව, හැඟීම්, ගැඹුරු විඥානය අවදි කළ හැකි දිනයක් ලෙස හඳුන්වා දී තිබෙනවා. ඇතැම් සම්ප්‍රදායන් තුළ සොබාදහමේ දිනයක් ලෙසත් මෙදින නම්කර තිබෙනවා. විශ්වයේ තිබෙන්නා වූ දුර්ලභ ද්වාරයකින් යන්නා වූ දිනයක් ලෙසයි පෙබරවාරි 29 හදුන්වනු ලබන්නේ. එම නිසා එදිනට ගසක් සිටුවන ලෙස සඳහන් කර තිබෙනවා. එවිට සෑම වසර හතරකටම සැරයක් ගසක් සිටුවිය යුතුයි. සෑම දවසකම ගසක් සිටුවීම නිරන්තරයෙන් සිදුකළ හැකි හොඳ දෙයක්.නමුත් පෙබරවාරි 29වන දින ඇති ශක්තිය හේතුවෙන්, එදිනට ගසක් සිටුවීම වඩාත් යහපත් බව සදහන් වෙනවා. සාමාන්‍යයෙන් මිනිසෙකු අවුරුදු 80ක් ජීවත් වෙනවා නම්, ඔහු සම්ප්‍රදායක් ලෙස වසර හතරෙන් හතරට අධික අවුරුද්දක් යෙදෙන කාලය තුළදී ගසක් සිටුවීමෙන් ජීවිත කාලය පුරාවටම ඔහු ගස් විස්සක් සිටුවා තිබෙනවා. එය පරිසරයට වඩාත් ප්‍රයෝජනවත් මෙන්ම පැවැත්ම රඳා පවතින අවස්ථාවක්. ඒ වගේම සොබාදහම පිළිබඳව විශේෂයෙන් සිතිය යුතු දිනයක් ලෙසත් මෙදින හඳුන්වා දී තිබෙනවා.


දිනයේ සංකේතය ගෙම්බා

පෙබරවාරි 29වන දින පනින  දිනයක් (leap day) එසේත් නොමැති නම් වෙනස් වන දිනයක් බැවින්, එදිනට සංකේතයක් ලෙස ගෙම්බා නම් කර තිබෙනවා. එය යම් සම්ප්‍රදායන් තුළ විශ්වාස කරනු ලැබ තිබෙනවා. නමුත් එය ස්ථිර අදහසක් නෙවෙයි. මනෝ විද්‍යාත්මකව පෙබරවාරි 29

ජීවිතය දෙස නැවත හැරී බලා, ඔබේ ජීවිතයට ළගාකර ගත හැකි අවස්ථාවන් සහ අභිප්‍රායත් සාර්ථක කර ගැනීමට මෙදින වඩාත්කාලෝචිත දිනයක් වෙනවා. අපේ ජීවිතයේ ඉතා යහපත්ව ඉදිරියට ගෙන යාමට මෙදින අධිෂ්ඨාන කර ගැනීමට යහපත් දිනයක්. ජීවිතයේ මෙතෙක් දුරට ඔබ සිදුකර තිබෙන්නේ කුමක්ද සහ මින් ඉදිරියට ඔබේ ජීවිතය සාර්ථක කර ගැනීමට කුමක් කළ යුතුද යන දේවල් පිළිබඳ සිතා හොඳින් තීරණ ගෙන, ඉදිරියට යා හැකි දිනයක් ලෙසද මෙදින හඳුන්වනු ලබනවා. මේ දිනය නරක දිනයක් ලෙස සදහන් වෙන්නේ නැහැ. පෙබරවාරි 29 වන දිනය ඔබේ ජීවිතයට අලුත් ආරම්භයක්, අලුත් දෙයක් කිරීමට පටන් ගැනීමට යහපත් දිනයක්, ඔබ එලෙස පටන් ගන්නා දෙය දියුණුවට පත්කර ගනිමින්, නැවත වසර හතරකට පසු එය සැමරීමට නිමිත්තක් කර ගැනීමට හැකියාව තිබෙනවා. ඒ වගේම අද වන විට පවුලේ තිබෙන සම්බන්ධතාවන් මව පියා වශයෙන්ද, අඹු සැමීයන් වශයෙන්ද, ඥාති සබඳතා, දෙමාපිය දූදරු සබඳතා වියැකී යමින් තිබෙන කාල වකවානුවක්. මිනිසුන් ඉතාම කාර්යබහුල වී තිබෙනවා. තමන්ගේ භූමිකාවන්වල තිබෙන වගකීම්ද මිනිසුන්ට ඉෂ්ට කර ගැනීමට නොහැකි වී තිබෙනවා. එම නිසා ඔබ ගැන. සිතා, ඔබේ පවුල වෙනුවෙන්, සමාජය  වෙනුවෙන් කළ යුතු මගහැරුණු දෑ කරගෙන යෑමට පටන් ගැන්මට හොද ආරම්භයක් ලබාගැනීමට හැකි දිනයක් ලෙසත් මෙදින හඳුන්වා දිය හැකියි.

පියුමිකා වීරසූරිය