ලෙඩ සුව කරන බව පවසා බාල වයස්කාර පිරිමි ළමයින් ගෙන්වාගෙන තෙල්‍ සාත්තු කරන මුවාවෙන් කලක සිට ලිංගික අතවර කිරීමට පුරුදුව සිටි බව කියන අසපුවක හිමිනමක බව කියන අයෙකු පෙරේදා (27) දා අත්අඩංගුවට ගත් බව හෝමාගම මූලස්ථාන පොලිසිය පවසයි.
මීට පෙර අවස්ථා කිහිපයක දී මෙම ශ්‍රමණවේශධාරියා ප්‍රදේශයේ මව්පියන් රවටා බාල වයස්කාර දරුවන් ගෙන්වාගෙන ලිංගික අතවර සිදුකිරීමේ සිද්ධීන් රැසක් වාර්තා වී තිබූ බවත් ඒ සම්බන්ධයෙන් පැමිණිලි නොකිරීම නිසා සැකකාර හිමිනම අත්අඩංගුවට ගැනීමට නොහැකිව සිටි බවත් පොලිසිය කියයි.
අත්අඩංගුවට ගෙන ඇත්තේ අසපුවක් පවත්වාගෙන යන (50) හැවිරිදි ශ්‍රමණවේශධාරියකු බවද පොලීසිය කියයි.
නිවසක් කුලී පදනම මත ලබාගෙන අසපුවක් පවත්වාගෙන යමින් එහි ආගමික වතාවත් සිදු කරමින් ප්‍රදේශයේ ජනතාව තුළ ප්‍රසාදයක් දිනාගෙන ඒ හරහා සුව කළ නොහැකි රෝග සුව කරන බව පවසමින් විවිධ මාදිලියේ ප්‍රතිකාර සිදුකර තිබෙන බව පොලිසිය කළ පරීක්ෂණ වලදී හෙළිවී ඇත.
ඒ සඳහා ප්‍රාණයට ප්‍රාණයක් අවශ්‍ය බව රෝගියාගේ ඥාතීන්ට පවසා එම ප්‍රාණය වයස අවුරුදු 15ට අඩු රූමත් පිරිමි ප්‍රාණයක් විය යුතු බවද පවසමින් නිවෙස්වල බාල වයස්කාර පිරිමි දරුවන් ගෙන්වාගෙන දින දෙක තුන රඳවාගෙන තිබෙන බව ද පොලීසිය කියයි.
ඒ අනුව අවුරුදු 15ක වයසැති දරුවන් දෙදෙනකුට ඇතිව තිබූ රෝගී තත්ත්වයක් සුව කිරීම සඳහා මීට දින දෙකකට පෙර මාපියන් එම අසපුවට දරුවන් දෙදෙනා කැඳවාගෙන ගොස් හිමිනම හමු වූ අවස්ථාවේ දී පවසා ඇත්තේ දින දෙක තුනක් නවතාගෙන ප්‍රතිකාර කළ යුතු බවයි.
පසුව දරුවන් දෙදෙනා අසපුවේ නවතා සිටිය දී සැකකාර හිමිනම මෙසේ ලිංගික අතවර සිදුකර ඇති බවත් ඒ බව දරුවන් දෙමාපියන්ට දැන්වීමෙන් පසුව හෝමාගම පොලිසියේ සිදු කළ පැමිණිල්ලකට අනුව සැකකාර හිමිනම අත්අඩංගුවට ගත් බවත් පොලිසිය කියයි.
සැකකාර ශ්‍රමණවේශධාරියා විසින් තවත් පිරිස් රවටා ලක්ෂ ගණනින් මුදල් වංචා කිරීමේ සිද්ධීන් රැසක් වාර්තා වී තිබූ බවත් පොලිසිය පවසයි.
අත්අඩංගුවට ගත් සැකකාර ශ්‍රමණ වේශධාරියා ඊයේ (28) දා හෝමාගම අධිකරණයට ඉදිරිපත් කිරීමට නියමිතව සිටි අතර බාල වයස්කාර දරුවෝ දෙදෙනා වෛද්‍ය පරීක්ෂණයක් සඳහා හෝමාගම මූලික රෝහලට ඇතුළත් කිරීමට නියමිතව සිටියහ.
සිද්ධිය සම්බන්ධයෙන් හෝමාගම මූලස්ථාන පොලිසිය වැඩිදුර පරීක්ෂණ පවත්වයි.
මත්තේගොඩ ශාන්ත ප්‍රදීප් කුමාර කුලරත්න සහ කඩුවෙල බුද්ධික කුමාරසිරි
0 Comments