දිස්ත්‍රික්ක නවයක ඇතැම් ස්ථානවල අද (28දා) මිනිස් සිරුරට දැනෙන උණුසුම් තත්ත්වය අවධානය යොමු කළ යුතු මට්ටමේ පවතින බව කාලගුණ විද්‍යා දෙපාර්තමේන්තුවේ ස්වාභාවික විපත් පිළිබඳ අනතුරු ඇඟවීමේ මධ්‍යස්ථානය සඳහන් කරයි.
පුත්තලම, කුරුණෑගල, ගම්පහ, කොළඹ, හම්බන්තොට, ගාල්ල, මාතර, කළුතර හා රත්නපුර දිස්ත්‍රික්කවල මෙම තත්ත්වය පැවැතිය හැකි බවත් මේ නිසා අදාළ දිස්ත්‍රික්වල වැඩිහිටි හා රෝගී ජනතාව පිළිබඳව සැලකිලිමත් විය යුතු බවත් පවසන එම මධ්‍යස්ථානය කුඩා ළමුන් වාහන තුළ තනියම රඳවා නොයන ලෙසත් ඉල්ලා සිටියි.
වැඩබිම් තුළ සේවය කරන පිරිස් ප්‍රමාණවත් තරම් ජලය පානය කරන ලෙසත්, සෙවණ ඇති ස්ථානවල හැකි පමණ විවේක ගන්නා ලෙසත්, අධික වෙහෙසකාරී කටයුතු සීමා කරන ලෙසත්, සුදු හෝ ළා පැහැති සැහැල්ලු ඇඳුම් භාවිත කරන ලෙසත් ජනතාවගෙන් ඉල්ලා සිටින බවද එම මධ්‍යස්ථානය සඳහන් කරයි.
කාලගුණ විද්‍යා දෙපාර්තමේන්තුව විසින් ගෝලීය ගණිතමය කාලගුණ අනාවැකි ආකෘති දත්ත විශ්ලේෂණ මගින් ලබාගත් වායු ගෝලීය ආර්ද්‍රතාව සහා උපරිම උෂ්ණත්ව අගය යොදා ගනිම්න් සකස් කළ උණුසුම් දර්ශකයට අනුව මෙම ශරීරයට දැනෙන උණුසුම් තත්ත්වයන් පිළිබඳ අගයන් සකස් කර තිබේ.
මෙම දර්ශකයට අනුව 27 - 38 දක්වා අගය සාමාන්‍ය තත්වයක් ලෙස සලකන අතර 39 - 45 දක්වා අගය අවධානය යොමුකළ යුතු මට්මේ පවතී. 46 -52 අතර අගය වැඩි අවධානය යොමුකළ යුතු මට්මේ පවතින අතර 52ට වැඩි වන අවස්ථාවලදී අනතුරුදායක තත්ත්වයක් ලෙස සලකනු ලබයි. මෙම අගයන් වායු ගෝලීය උෂ්ණත්වය නොවන බවත්, මෙය ශරීරයට දැනෙන තත්වයක් බවත්, අවධානය යොමුකළ යුතු මට්ටමේදී වැඩි වේලාවක් නිරාවරණය වීම සහ ක්‍රියාකාරකම්වල නිරත වීමෙන් තෙහෙට්ටු විය හැකි බවත්, තවදුරටත් ක්‍රියාකාරකම්වල නිරතවීමෙන් විජලනය සහ ලවණ ඉවත් වීම නිසා මස්පිඩු පෙරළීම සිදුවිය හැකි බවත් පෙන්වා දෙයි. අද (28දා) කොළඹ හා රත්නපුර නගරවල උෂ්ණත්වය සෙල්සියස් අංශක 35 ක් දක්වාත්, මන්නාරම් නගරයේ උෂ්ණත්වය සෙල්සියස් අංශක 33 දක්වාත් ඉහළ යා හැකි බව කාලගුණ විද්‍යා දෙපාර්තමේන්තුව සඳහන් කරයි.
අනුරාධපුර, යාපනය, ත්‍රිකුණාමලය, ගාල්ල නගරවල උෂ්ණත්වය සෙල්සියස් අංශක 32ක් ලෙසත්, මහනුවර නගරයේ උෂ්ණත්වය සෙල්සියස් අංශක 31ක් හා මඩකලපුව නගරයේ උෂ්ණත්වය සෙලසියස් අංශක 30ක් ලෙස පැවතිය හැකි බවද දෙපාර්තමේන්තුව පෙන්වා දෙයි.
නුවරඑලිය නගරයේ අවම උෂ්ණත්වය සෙල්සියස් අංශක 13ක් ලෙසත් උපරිම උෂ්ණත්වය සෙල්සියස් අංශක 21ක් ලෙසත් අද පැවැතිය හැකි බවත්, ඊයේ (27දා) කොළඹ නගරයේ උෂ්ණත්වය සෙල්සියස් අංශක 32ක් ලෙස පැවැති බවත් සඳහන් කරයි.
ඊයේ(27දා) රත්නපුර නගරයේ උෂ්ණත්වය සෙල්සියස් අංශක 34ක් ලෙස පැවැති බවත්, අනුරාධපුර, ගාල්ල නගරවල උෂ්ණත්වය සෙල්සියස් අංශක 33ක් ලෙස පැවැති බවත් පෙන්වා දෙයි.
අද(28දා) නුවරඑළිය, මාතලේ සහ පොළොන්නරුව දිස්ත්‍රික්කවල විටින් විට වැසි විය හැකි බවත්, නැගෙනහිර සහ ඌව පළාත්වලත් අනුරාධපුර දිස්ත්‍රික්කයේත් වැසි වාර කිහිපයක් ඇති විය හැකි බවත් කාලගුණ විද්‍යා දෙපාර්තමේන්තුව සඳහන් කරයි.
බස්නාහිර සහ සබරගමුව පළාත්වලත් මහනුවර, ගාල්ල සහ මාතර දිස්ත්‍රික්කවලත් සවස් කාලයේදී හෝ රාත්‍රී කාලයේදී ස්ථාන ස්වල්පයක වැසි හෝ ගිගුරුම් සහිත වැසි ඇතිවිය හැක .මධ්‍යම කඳුකරයේ නැගෙනහිර බෑවුම් ප්‍රදේශවලත් උතුරු, උතුරු- මැද, වයඹ, දකුණු, ඌව සහ නැගෙනහිර පළාත්වලත් විටින් විට සුළඟේ වේගය පැ.කි.මී. 30-40 දක්වා ඉහළ යා හැකි හෙයින්, ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් ඉල්ලා සිටියි.
ඉන්දික හේවාවිතාරණ
0 Comments