පැමිණිල්ලකට අදාළව ප්‍රකාශයක් ගැනීමට පුද්ගලයකු පොලීසියට කැඳවන අවස්ථාවේදී ඒ සම්බන්ධයෙන් සියලු කරුණු ඔහුට දැනුම් දෙන විධිවිධාන අඩංගු කරමින් චක්‍රලේඛයක් නිකුත් කිරීමට පොලිස්පති දේශබන්දු තෙන්නකෝන් මහතා ශ්‍රේෂ්ඨාධිකරණයට ඊයේ (27) පොරොන්දු විය.
බලශක්ති විශේෂඥ එම්.පී. රළපනාව මහතා ගොනුකර තිබූ මූලික අයිතිවාසිකම් පෙත්සමකට අදාළව පෞද්ගලිකවම අධිකරණයේ පෙනී සිටි පොලිස්පති දේශබන්දු තෙන්නකෝන් මහතා වෙනුවෙන් පෙනී සිටි රජයේ ජ්‍යෙෂ්ඨ නීතිඥ ශවීන්ද්‍ර වික්‍රම මහතා එලෙස පොරොන්දු විය.
ශ්‍රේෂ්ඨාධිකරණ විනිසුරුවරුන් ගාමිණී අමරසේකර, ජනක් ද සිල්වා සහ ශිරාන් ගුණරත්න යන මහත්වරුන්ගෙන් සැදුම්ලත් විනිසුරු මඬුල්ලක් හමුවේ මෙම පෙත්සම සලකා බැලිණි.
බලශක්ති විශේෂඥ එම්.පී. එම්.පී. රළපනාව මහතා ගොනුකර තිබූ පෙත්සමේ වගඋත්තරකරුවන් වශයෙන් පොලිස්පති දේශබන්දු තෙන්නකෝන් මහතා ඇතුළු පිරිසක් නම් කරනු ලැබ සිටියහ.
පෙත්සම්කාර බලශක්ති විශේෂඥ එම්.පී. රළපනාව මහතා මෙම මුලික අයිතිවාසිකම් පෙත්සම ඉදිරිපත් කරමින් විදුලි බල මණ්ඩලයේ ක්‍රියා කලාපය විවේචනය කරමින් තමන් මුහුණු පොතේ පෝස්ටුවක් පළ කිරීමෙන් අනතුරුව ප්‍රකාශයක් ගැනීමට පොලීසියට පැමිණෙන ලෙස තමන්ට දැනුම් දුන් බවද සඳහන් කර තිබේ.
ප්‍රකාශයක් ගැනීමට තමන් පොලීසියට කැඳවීම තමන්ගේ මූලික අයිතිවාසිකම් කඩකිරීමක් බවත් එය නීතියට පටහැනි බවත් ඉන් තම මූලික අයිතිවාසිකම් කඩ වී ඇති බවට ප්‍රකාශයක් කරන ලෙසත් ඉල්ලා සිටින පෙත්සම්කරු මෙවැනි අවස්ථාවකදී පොලිසිය අනුගමනය කළ යුතු මාර්ගෝපදේශ මාලාවක් සකස් කිරීමට පොලිස්පතිවරයාට නියෝගයක් නිකුත් කරන්නැයිද ඉල්ලා සිටී.
පෙත්සම කැඳවූ අවස්ථාවේදී වග උත්තරකාර පොලිස්පතිවරයා වෙනුවෙන් පෙනී සිටි රජයේ ජ්‍යෙෂ්ඨ නීතිඥ ශවින්ද්‍ර වික්‍රම මහතා කරුණු දක්වමින් අදාළ මාර්ගෝපදේශ මාලාව සකස් කර අධිකරණයට ඉදිරිපත් කිරීමට තම සේවාදායකයා බලාපොරොත්තු වන බවත් පෙත්සම්කරු මෙම පෙත්සම ඉල්ලා අස්කර ගැනීමට පොරොන්දු විය යුතු බවත් පැවසීය.
පෙත්සම්කරු වෙනුවෙන් පෙනී සිටි ජනාධිපති නීතිඥ සාලිය පීරිස් මහතා ඊට පිළිතුරු දෙමින් පෙත්සම ඉල්ලා අස්කර ගැනීම සම්බන්ධයෙන් තම සේවාදායකයාගෙන් උපදෙස් ලබාගත යුතු බවත් ඊට පෙර කීය.
වගඋත්තරකාර දෙපාර්ශ්වය ඊට එකගත්වය පළ කිරීමෙන් අනතුරුව පෙත්සම මැයි 09 වැනිදා කැඳවීමට නියම කළේය.
පෙත්සම්කරු වෙනුවෙන් ජනාධිපති නීතිඥ සාලිය පීරිස් මහතා පෙනී සිටි අතර වගඋත්තරකරු වෙනුවෙන් රජයේ ජ්‍යෙෂ්ඨ නීතිඥ ශවින්ද වික්‍රම මහතා පෙනී සිටියේය.
රන්ජන් කටුගම්පොළෙ
0 Comments