ප්‍රමිතියෙන් තොර හියුමන් ඉමියුනෝග්ලොබියුලින් ආනයනය කිරීමේ ගැටලුව සම්බන්ධයෙන් එහි 'මහ මොළකරු' ලෙස චෝදනාවට ලක්වූ හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබේ. අද උදෑසන අපරාධ පරීක්ෂන දෙපාර්තමේන්තුවට පැමිණ පැය 10කට අධික කාලයක් ඔහුගෙන් ප්‍රශ්න කිරීමෙන් අනතුරුව අත්අඩංගවට පත්විය. අද පෙරවරු 9 ට පමණ අපරාධ පරීක්ෂණ දෙපාර්තමේන්තුව වෙත අමාත්‍යවරයා පැමිණියේ මාලිගාකන්ද මහේස්ත්‍රාත් අධිකරණය ඊයේ ලබාදුන් නියෝගයට අනුව වන අතර ඊයේ විදෙස් ගමන් තහනමක්ද ඔහුට පැනවිණි.
මෙම කටඋත්තරය ලබාදීම ඔහු විවිධ හේතු පෙන්වා කල්දැමූ අතර ප්‍රශ්නගත එන්නත් සිද්ධිය සම්බන්ධයෙන් ප්‍රකාශයක් ලබාදීම සඳහා අපරාධ පරීක්ෂණ දෙපාර්තමේන්තුවට පැමිණෙන ලෙසට පසුගිය 30 වැනිදා කැඳවීමක් කර තිබුණත් ඔහු වෙනත් දිනයක් ඉල්ලා කිව්වේ නඩු කටයුත්තක් සහ ජනාධිපති ලේකම් කාර්යාලයේ රැස්වීමක් පැවැත්වෙන බවය.කෙසේ වෙතත්, නියෝජ්‍ය සොලිසිටර් ජනරාල්වරිය ඊයේ අධිකරණයට දැනුම් දුන්නේ අදාළ රැස්වීමට ඔහු සහභාගි වී නොමැති බව වන අතර ඔහු අධිකරණයට බොරු කියූ බව හෙළි විය.
අත්අඩංගුවට ගෙන රක්ෂිත බන්ධනාගාර ගතකර සිටින සෞඛ්‍ය අමාත්‍යාංශයේ හිටපු ලේකම් ජනක ශ්‍රී චන්ද්‍රගුප්ත ඇතුලු 6 දෙනෙකු ලබන 15 වනදා දක්වා යළි රක්ෂිත බන්ධනාගාරගත කර ඇති අතර පස්වෙනි සැකකරු වන වෛද්‍ය සැපයුම් අංශයේ ගබඩා පාලකවරයා ඇප මත මුදා හැර ඇත.
'කෙහෙළිය ගෝ ගම' ලෙස පිහිටුවා මෑත කාලීනව ඔහුට එරෙහිව විරෝධතා වැඩසටහනක් ඇරඹුවත් පොලිසිය එය විසුරුවා තිබුණි.
කෙහෙලිය රඹුක්වැල්ල සෞඛ්‍ය ඇමති ලෙස කටයුතු කරද්දී අක්‍රමිකතා ගැන ආරංචි වුවත් රජය ඔහු ආරක්ෂා කළ අතර වැඩි ඡන්දයෙන් විශ්වාස භංගය ජයග්‍රහණයටද ආණ්ඩු පක්ෂය ඔහුට අතහිත දුණි.
කෙසේ වෙතත් පසුව ඔහු සෞඛ්‍ය ඇමති ධූරයෙන් නෙරපනු ලැබිණි.
0 Comments