ලාංකේය දේශපාලන ක්ෂේත්‍රයේ පෙරළිකාර චරිතයක් මෙන්ම හිටපු මුදල් අමාත්‍යවරයකුද ප්‍රකට ආර්ථික විශේෂඥයකුද වූ රොනී ද මැල් මහතාගේ අවසන් කටයුතු මාතර රුහුණු විශ්වවිද්‍යාලයීය ක්‍රීඩාංගණයේ දී හෙට (1) පස්වරුවේ සිදු කිරීමට නියමිතය.දේහය මහජන ගෞරවය සඳහා පාර්ලිමේන්තුවට රැගෙන යෑමට කෙරුණු ඉල්ලීමක් රොනීද මැල් මහතාගේ අවසන් කැමැත්තට ගරු කරමින් සංවිධායක මණ්ඩලය ප්‍රතික්ෂේප කළේය.
දේහය කොළඹ 3 චාල්ස් රිය මඟ අංක 5 දරන ඒ මහතාගේ නිවසේ මහජන ගෞරවය සඳහා තැන්පත් කෙරිණ.දේහය රැගත් ආදාහන පෙරහර අද (29) පස්වරු 2.00ට දක්ෂිණ අධිවේගී මාර්ගය ඔස්සේ මාතර වැල්ලමඩමේ රුහුණ විශ්වවිද්‍යාලයට රැගෙන යෑමට නියමිතය. රුහුණ විශ්වවිද්‍යාලයේ උපකුලපති ජ්‍යෙෂ්ඨ මහාචාර්ය සුජිව අමරසේන සහ නියෝජ්‍ය උප කුලපති මහාචාර්ය සමන් චන්දන එදිරිවීර මහත්වරුන් ඇතුළු විශ්වවිද්‍යාල කාර්ය මණ්ඩලය විසින් එහිදී දේහය බාර ගැනෙණු ඇත.
අනතුරුව රොනී ද මැල් මහතාගේ දේහය රුහුණ විශ්ව විද්‍යාලයේ ගෘහස්ථ ක්‍රීඩාංගනය අසල විශේෂ ශාලාවේ මහජන සහ සිසු ගෞරවය සඳහා තැන්පත් කෙරේ. පසුදින එනම් මාර්තු 1 වැනිදා දේහය අවමඟුල් පෙරහරකින් රුහුණ විශ්ව විද්‍යාලයේ ක්‍රීඩාංගනයට රැගෙන යෑමට නියමිතය. පස්වරු 4.00ට බෞද්ධ ආගමික වතාවත් සිදුකිරීමෙන් අනතුරුව අවසන් කටයුතු කෙරෙනු ඇත.රොනීද මැල් මහතා කොළඹ පෞද්ගලික රෝහලක දී පෙරේදා (27) රාත්‍රී අභාවප්‍රාප්ත වූයේය. මිය යන විට ඔහු 98 වැනි වියේ පසුවිය.
0 Comments