පියා හැර ගිය බාලවයස්කාර තැනැත්තියක් රැකබලා ගැනීම සඳහා භාර ගෙන ඇය දූෂණය කිරීම ඇතුළු චෝදනා තුනකට වැරැදිකරු වූ දෙදරු පියකුට කොළඹ මහාධිකරණ විනිසුරු ආචාර්ය නාමල් බණ්ඩාර බලල්ලේ මහතා ඊයේ (20දා) බරපතළ වැඩ ඇතිව වසර 22ක සිරදඬුවමක් හා රුපියල් 50,000ක දඩයක් නියම කළේය.
විත්තිකරු ඔහුට විරුද්ධව ඉදිරිපත්වූ අධිචෝදනා සියල්ලටම වරදකරු කළ මහාධිකරණ විනිසුරුවරයා පළමු හා දෙවැනි චෝදනාවට බරපතළ වැඩ සහිතව වසර 10 බැගින් සිරදඬුවම් හා රුපියල් 20,000 බැගින් දඩ මුදල් නියම කළේය. තුන්වැනි චෝදනාවට බරපතළ වැඩ සහිතව වසර 2ක සිරදඬුවමක් හා රුපියල් 10,000ක දඩ මුදලක් නියම කර එය නොගෙවන්නේ නම්, එක් එක් චෝදනාවන්ට මාස 6 බැගින් ලිහිල් දඬුවම් නියම කර එම සියලු සිරදඬුවම් එකවර ගෙවෙන ලෙස දඬුවම් නියම කරන ලදි.
2013 හා 2014 අතර කාලය තුළදී බාලවයස්කාර තැනැත්තියගේ භාරකාරීත්වය දරමින් ඇය දූෂණය කිරීම, ලිංගික බලහත්කාරය ඇතුළු අධි චෝදනා 3ක් යටතේ 1995 අංක 22 දරන දණ්ඩ නීති සංග්‍රහයේ 345, 365 ඇතුළු වගන්ති යටතේ විත්තිකරුට එරෙහිව නීතිපතිවරයා විසින් නඩු පැවරීම සිදු විය.
චුදිත වැරැදිකරු කර ඔහුට එරෙහිව දඬුවම් නියම කිරීමට පෙර තිව්‍ර කාරක කරුණු ඉදිරිපත් කරමින් රජයේ අධිනීතිඥ ඔස්වල්ඩ් ද සිල්වා මහතා ශ්‍රී ලංකාවේ සිදුවන ස්ත්‍රී දූෂණ බොහොමයක් සිදු වන්නේ සමීප ඥාතීන් අතින් බව කියා සිටියේය. එබැවින් ඒවා බොහොමයක් ලජ්ජාව නිසා හෝ හෙළිදරව් කිරීමට ඇති අකමැත්ත නිසා කාලයේ වැලිතලාවට යටව යන බව ද කියා සිටින ලදි.
චුදිත තැනැත්තා වින්දිත දැරියට රැකවරණය සැපයීමේ මුවාවෙන්
ඇය කෙලෙසීම බලවත් වරදක් බවත් නීතිපති එදිරිව රණසිංහ හා නීතිපති එදිරිව මෙන්ඩිස් නඩු තීන්දු මඟින් එවැනි අවස්ථාවලදී උපරිම දඬුවම් නියම කිරීමේ අවශ්‍යතාව අවධාරණය කර ඇති බව උපුටා දක්වන ලදි.
(චන්දන ජයවීර)
0 Comments