කලාවැව නාමල් උයන සහ ඒ අවට ප්‍රදේශවල වසර ගණනාවක් සැරිසරමින් සිටි බරණ නමින් ප්‍රචලිත දළ ඇතාට විදුලිය සැර වද්දවා මරා දැමීමේ සිද්ධියේ සැකකාර පොලිස් කොස්තාපල්වරයාට එරෙහිව චෝදනා ගොනු කිරීමට අපරාධයේ විමර්ශනවල උද්ධෘත (සටහන්) නීතිපතිවරයා වෙත යොමුකරන ලෙස කැකිරාව දිසා විනිසුරු සහ මහේස්ත්‍රාත් සෙනරත් බණ්ඩාර මහතා ගල්කිරියාගම වනජීවී කාර්යාලයේ වන සත්ත්ව අඩවි සහකාර එච්.එම්. එස්. බණ්ඩාර මහතාට නියෝග කළේය.
මෙසේ නියෝග කළේ මෙම සිද්ධියට අදාළ නඩුව කැකිරාව මහේස්ත්‍රාත් අධිකරණය හමුවේ යළි කැඳවූ අවස්ථාවේදීය.
මෙම අපරාධය සම්බන්ධයෙන් චෝදනා ලැබ දැනට අධිකරණ නියෝග මත ඇප මත මුදා හැර සිටින ප්‍රධාන සැකකාර පොලිස් කොස්තාපල්වරයා ඇතුළු සෙසු සැකකරුවන්ගේ දුරකතන සම්බන්ධයෙන් දුරකතන විශ්ලේෂණ වාර්තා අධිකරණයට ඉදිරිපත් කරන ලෙසට මීට පෙර පෞද්ගලික දුරකතන සමාගම් සියල්ලෙහි කළමනාකාරිත්වයට අධිකරණය නියෝග කර තිබුණි.
විදුලිය සැර වද්දවා බරණ ඝාතනයට යොදා ගත් බවට සැකකෙරෙන විදුලි රැහැන් ලංකා විදුලියබල මණ්ඩලයේ විදුලි ඉංජිනේරුවරුන් මඟින් පරීක්ෂා කර ඊට අදාළ වාර්තාව අධිකරණයට ඉදිරිපත් කරන ලෙසට ද වනජීවී නිලධාරීන්ට තවදුටරත් නියෝග කරනු ලැබීය.
බරණ දළ ඇතාට විදුලිය සැර වද්දවා මරා දැමීමේ සිද්ධිය සම්බන්ධයෙන් චෝදනා ලැබ අධිකරණ නියෝග මත දැනට ඇප මත මුදා හැර සිටින මෙම අපරාධයේ ප්‍රධාන සැකකාර පොලිස් කොස්තාපල්වරයාගේ සේවය අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරිවරයාගේ නියෝගයකට අනුව මීට පෙර තහනම් කෙරිණ. පසුව විමර්ශනවලට යටත්ව ඔහු යළි සේවයේ පිහිටවනු ලැබීය.
මෙම අපරාධය සම්බන්ධයෙන් අධිකරණය හමුවේ චෝදනා ලැබ සිටින්නේ ගල්කිරියාගම පොලිස් ස්ථානයට අනුයුක්තව සේවය කරන පොලිස් කොස්තාපල් (51622) ජයසුන්දර හේරත් මුදියන්සේලාගේ අජිත් කුමාර ජයසුන්දර යන අයයි.
බරණ දළ ඇතාගේ පශ්චාත් මරණ පරික්ෂණය පැවැත්වූ වනජීවී පශු වෛද්‍ය ඉසුරු හේවාකෝට්ටගේ මහතා ඇතාගේ මරණයට හේතුව ලෙස තහවුරු කර ගෙන ඇත්තේ විදුලිය සැර වැදීමෙන් හෘද වස්තුවට සිදුව ඇති බලපෑම බවයි. විදුලිය සැර වද්දවා මරා දැමුණු බරණ දළ හස්තියාගේ වයස අවුරුදු 30ක් පමණ වන බවත් බරණගේ උස අඩි නවයක් පමණ වන බවත් පශ්චාත් මරණ පරීක්ෂණය පැවැත්වූ වනජීවී පශු වෛද්‍ය ඉසුරු හේවාකෝට්ටගේ මහතා විසින් තවදුරටත් තහවුරු කර ගැනිණ.
බරණ ඇතා අඩි හතරක් පමණ දිගකින් යුත් පිරිපුන් දළ යුගලකට හිමිකම් කීය. ගල්කිරියාගම වනජීවී කාර්යාලයේ වන සත්ත්ව අඩවි ආරක්ෂක ප්‍රේමසිරි විතානගේ මහතාගේ උපදෙස් මත වන සත්ත්ව අඩවි සහකාර එච්.එම්.එස්. බණ්ඩාර මහතා ඇතුළු නිලධාරීන් කණ්ඩායමක් බරණ ඝාතන සිද්ධිය සම්බන්ධයෙන් වැඩිදුර විමර්ශන සිදු කරයි.
මෙම නඩුවේ ප්‍රධාන සැකකාර පොලිස් කොස්තාපල්වරයා සහ ඔහුගේ ඇතැම් හිතවතුන් විසින් නඩුවේ ප්‍රධාන සාක්ෂිකාරියකට බලපෑම් කරමින් සිටින බව පවසන වනජීවී නිලධාරීහු ඒ සම්බන්ධයෙන් විමර්ශනයක් පැවැත්වෙන බව ද කියයි. දක්ෂිණ ලංකාවේ ප්‍රධාන සංඝනායක ඕමල්පේ සෝභිත හිමියන් සභාපතිත්වය දරන ස්වභාව ධර්මය සහ වන සතුන් උදෙසා සංවිධානය ද ජනාධිපති නීතිඥ අනුර මැද්දේගොඩ මහතා මගින් මෙම නඩුවට අතරමැදි පාර්ශ්වයක් ලෙස ඇතුළු වීමට අවැසි කටයුතු සිදු කරමින් සිටින බව සඳහන්ය.
අනුරාධපුර - උපාලි ආනන්ද
0 Comments