මෙම වසරේ ජනවාරි සහ පෙබරවාරි යන මාස දෙක ඇතුළත හයර් යන මුවාවෙන් ත්‍රීවීලර් රථවලට නැඟ තමන් සතු මිල මුදල් ඇතුළු වටිනා භාණ්ඩ කොල්ලකෑම් පිළිබඳව ත්‍රීවීලර් රියැදුරන් 25කට අධික ප්‍රමාණයකගෙන් පැමිණිලි වැල්ලම්පිටිය පොලිසිය වෙත ලැබී තිබුණි.
“අපේ සල්ලි ටික අරන් ගියා නම් තව කමක් නැහැ කොල්ලකාලා යන්නේ අපේ මූණවල් අත පය කපලා. මුණට පිහිය තියලා අදිනවා. මේ මිනිහා අයිස් ගහලා මොළේ විකෘති වෙච්ච එකෙක්. ලේ දකින්න කැමති එකෙක්.
ලේ පෙරාගෙන පොලිසියට පැමිණිලි කිරීමට පැමිණි ත්‍රීවීලර් රියැදුරන් කිහිප දෙනෙක්ම එලෙස පවසා ඇත.
වැල්ලම්පිටිය පොලිසියේ ස්ථානාධිපති ප්‍රධාන පොලිස් පරික්ෂක ඉන්දික නිලන්ත මහතාගේ උපදෙස් අනුව අපරාධ විමර්ශන අංශයේ ස්ථානාධිපති පොලිස් පරික්ෂක ඉසුරු ශාමික මහතා මේ පැමිණිලි පිළිබඳව විමර්ශන ආරම්භ කළේය.
මෙම කොල්ලකරු ඇතුළු කණ්ඩායම පංචිකාවත්ත, ආමර් වීදිය ප්‍රදේශයෙන් හයර් යන මුවාවෙන් ත්‍රීවීලර් රථවලට ගොඩ වී වැල්ලම්පිටිය, සේදවත්ත පාරට රැගෙන විත් රියැදුරන් සතු බඩු භාණ්ඩ කොල්ලකා පලා යන බව පසුගිය මාස දෙකක කාලය තුළ රියැදුරන්ගෙන් ලැබුණ පැමිණිලි 25කට අධික සංඛ්‍යාවක් නිරීක්ෂණය කිරීමේදී අපරාධ විමර්ශන නිලධාරීන්හට පෙනී ගොස් ඇත. රියැදුරන් හතර පස් දෙනකුගේම මුහුණු පිහියකින් කපා තිබුණු අතර එක් අයෙකුගේ හිස මුදුනට උල් පිහියකින් ඇන තිබූ බව ද පොලිසිය අනාවරණය කරගෙන තිබුණි .
රියැදුරන් සතු මුදල්, ජංගම දුරකතන, රන් භාණ්ඩ ද මෙලෙස කොල්ලකා තිබුණි .
පොලිසිය පසුගියදා සිදු කළ මෙහෙයුමකදී මහා මාර්ගයේ රැඳී සිටි සැක කටයුතු පුද්ගලයෙකු පරික්ෂා කිරීමට යාමේදි ඔහු අධික වේගයෙන් දිව ගොස් තිබේ. ඒ අවස්ථාවේදි අපරාධ විමර්ශන අංශයේ ස්ථානාධිපතිවරයා ඇතුළු නිලධාරීන් ද අධික වේගයෙන් ඔහු හඹා ගොස් දැඩි ප්‍රයත්නයක් දරා අත්අඩංගුවට ගෙන තිබේ.
සැකකරුව පරික්ෂා කිරීමේදී ඔහු සන්තකයේ තිබී අයිස් මත්ද්‍රව්‍ය ග්‍රෑම් 10යි, මිලිග්‍රෑම් 300ක් හමුවී තිබුණි. මොහු ත්‍රීවීලර් රථ කොල්ලකෑමට සම්බන්ධ බවට සැක කළ පොලිසිය රැඳවුම් නියෝග ලබා ගෙන දිගින් දිගටම සිදු කරන ලද ප්‍රශ්න කිරීම්වලදී ඔහු ත්‍රීවීලර් රථවල ගොස් ඔහු විසින් සිදු කරන ලද කොල්ලකෑම් 25ක් හෙළි කරගෙන තිබේ.
වැඩිදුරටත් පරික්ෂා කිරීමේදි මෙම සැකකරුට විරුද්ධව නඩු 37ක් ද, වරෙන්තු 12ක්ද ඇති බව සොයාගෙන තිබේ. සැකකරු අධික ලෙස අයිස් මත්ද්‍රව්‍යවලට ඇබ්බැහිව සිටින බවද හෙළි වී තිබේ. සේදවත්ත ප්‍රදේශයේ පදිංචිව සිටි පුද්ගලයකු බවටද හඳුනාගෙන තිබේ. මෙම කොල්ලකෑම්වලට ඔහු සමඟ සම්බන්ධව සිට ඇති අනෙකුත් අය ද අත්අඩංගුවට ගැනීමට විමර්ශන කටයුතු සිදු කරගෙන යයි. සැකකරු අධිකරණය වෙත ඉදිරිපත් කිරීමට නියමිතව ඇත.
මුල්ලේරියාව - සිරිසේන ගමගේ
0 Comments