බොරැල්ලේ ප්‍රසිද්ධ අවමංගල්‍ය ශාලාවක අවසන් කටයුතු සඳහා සූදානම් කර තැන්පත් කර තිබූ දේහයක් අධිකරණ නියෝග ප්‍රකාරව පශ්චාත් මරණ පරීක්ෂණය සිදු කිරීමට රැගෙන ගියත් මරණකරුගේ සොහොයුරිය මරණකරුට අයත් වෛද්‍ය වාර්තා ලබා නොදීම හේතුවෙන් මරණය සම්බන්ධයෙන් තවදුරටත් සැක මතුව ඇතැයි කොල්ලුපිටිය පොලිසිය පවසයි.
එම වෛද්‍ය වාර්තා මරණකරු මාස තුනක කාලයක් රැඳී සිටි බව කියන කොල්ලුපිටියේ ඇල්ෆ්රඩ් හවුස්හි පදිංචි ෂෙහානි රත්නායක යන අය විසින් ඉරා දමා අස්ථාන ගත කළ බවට වාර්තා වී ඇති අතර ඒ අනුව මරණකරු ප්‍රතිකාර ලබාගත් හේමාස් පෞද්ගලික රෝහලේ වෛද්‍ය වාර්තාවල ඡායා පිටපත් ලබා ගන්නා ලෙසට හදිසි මරණ පරික්ෂකවරයා පොලිසියට දන්වා ඇත.
සිද්ධිය සම්බන්ධයෙන් කොටුව මහේස්ත්‍රාත්වරයා දැනුවත් කර අධිකරණ නියෝගයක් ලබා ගෙන වෛද්‍ය වාර්තා ලබා ගැනීමට අපේක්ෂා කරන බව කොල්ලුපිටිය පොලිසියේ උප පොලිස් පරීක්ෂක ජයන්ත ඒකනායක මහතා පැවසීය.
මරණකරුගේ බිරියගෙන් ලැබුණු පැමිණිල්ලකට අනුව කොල්ලුපිටිය පොලිසිය විසින් කරන ලද ඉල්ලීමක් අනුව කොටුව මහේස්ත්‍රාත් තිළිණ ගමගේ මහතා විසින් පසුගිය (12) දා නිකුත් කරනු ලැබූ නියෝගයක් අනුව දේහය පොලිසිය භාරයට පත් කෙරුණි.
එම අවස්ථාවේ අවසන් කටයුතු සිදු කිරීමට සූදානම් කර තිබූ මරණකරුගේ දේහය බොරැල්ල බානි රේමන්ඩ් ආයතනයේ තැන්පත් කර තිබිණි. අවසන් කටයුතු සඳහා සූදානම් කර තිබූ දේහය පශ්චාත් මරණ පරීක්ෂණය සඳහා කොල්ලුපිටිය පොලිස් භාරයට ලබා දෙන ලෙසට නිකුත් වූ අධිකරණ නියෝගය ප්‍රකාරව දේහය පොලිස් භාරයට ගෙන පොලිස් මෘත ශරීරාගාරයේ මේ වනවිට තැන්පත් කර තිබෙන අතර, එම මරණය පරීක්ෂා කිරීමට අවශ්‍ය පියවර පොලිසිය විසින් ගෙන තිබුණ ද මරණය කපා පරීක්ෂා කිරීමට මේ වන තෙක් අවසර ලැබී නැත.
තම සැමියා මාස තුනක කාලයක් නිවසින් බැහැරව සිටි බවත් ඔහුගේ සහෝදරියකගේ කොල්ලුපිටිය ඇල්ෆ්රඩ් හවුස්හි පිහිටි නිවසේ නවාතැන් ගෙන සිටි බවත් එහිදි සැමියා මරණයට පත් වූ බවටත් සඳහන් කරමින් එම මරණය සැක සහිත බවට බිරිය පොලිසියට පැමිණිල්ලක් කර තිබිණි.
එම පැමිණිල්ලට අනුව පොලිසිය කරුණු දක්වමින් මහේස්ත්‍රාත්වරයා හමුවේ බී වාර්තාවක් ගොනු කරමින් දේහය පිළිබඳ අවසන් කටයුතු සිදු කිරීම නවත්වාලීමට නියෝගයක් නිකුත් කරන ලෙසත් සැක කටයුතු මරණයක් බවට ලද පැමිණිල්ලකට අනුව අපරාධ ස්ථානීය පරීක්ෂණයක් සිදු කරන බවත් පොලිසිය අධිකරණයට දන්වා සිටියේය.
මෙලෙස අධිකරණ නියෝග නිකුත් කෙරුණේ ලලිත සේනානායක නමැති 64 හැවිරිදි පුද්ගලයකුගේ දේහයකට වන අතර ඔහු දීර්ඝ කාලීන වකුගඩු රෝගයකින් සහ හෘද රෝගවලින් ප්‍රතිකාර ලැබූ බවට පොලිසිය අධිකරණයට දන්වා සිටි අතර මරණකරුගේ සහෝදරියගේ ඉල්ලීමට අනුව මරණකරුගේ මෘත ශරීරය මුද්‍රා තබා ඇති බවත් පොලිසිය අධිකරණයට දන්වා සිටියේය.
දේහය පොලිසියට ඉදිරි විමර්ශන සඳහා භාර දෙන ලෙස මරණකරුගේ බිරිය වන මායා දිල්රුක්ෂි යන අයට නියෝග කළ මහේස්ත්‍රාත්වරයා දේහය කොළඹ ජාතික රෝහලේ පොලිස් මෘත ශරීරාගාරයේ තැන්පත් කරන ලෙසත් පශ්චාත් මරණ පරීක්ෂණය සිදු කර අධිකරණයට වාර්තා කරන ලෙසත් නියෝග කළේය.
අධිකරණ නියෝග ප්‍රකාරව දේහය පෙරේදා (12) පොලිස් මෘත ශරීරාගාරයට භාර දී ඇත.
සිද්ධිය සම්බන්ධයෙන් කොල්ලුපිටිය පොලිසියේ උප පොලිස් පරීක්ෂක ජයන්ත ඒකනායක මහතා සහ 22081 අමිත් මහතා ඇතුළු කණ්ඩායමක් විමර්ශන කරයි.
0 Comments