කඩුවෙල කොරතොට පට්ටියවත්ත පාරේ නි‍ෙවසක් තුළ කාන්තාවක් ඝාතනය කිරීමේ සිද්ධියට සැක පිට එම කාන්තාවගේ ඥාති පුත්‍රයෙකු සහ තවත් අයෙකු කඩුවෙල පොලිසිය මඟින් අත්අඩංගුවට ගෙන ඇත.
මෙම ඥාති පුත්‍රයා ඝාතනය වූ කාන්තාවගේ නි‍ෙවසට යාබද නි‍ෙවසේ පදිංචිව සිට ඇති අතර නිතර එම නි‍ෙවසට යන එන අයෙකි. ඔහු වයස අවුරුදු 38ක් වන අයකු බව පොලිසිය පවසයි.
ඔහු සමඟ අත්අඩංගුවට පත් අනෙක් තැනැත්තා සැකකරුගේ නි‍ෙවසේ කිසියම් අලුත්වැඩියාවක් කිරීමට පැමිණි අයකු වේ. කඩුවෙල කොතලාවල පට්ටියවත්ත පාරේ පදිංචිව සිටි දෙදරු මවක වූ අජන්තා කටුගම්පල (52) නමැති කාන්තාව පසුගිය බදාදා පෙරවරුවේ සිය නි‍ෙවස තුළදීම හිසට සිදුවූ බරපතළ තුවාල සහිතව වැටී සිටියදී හමුවූ අතර ඇය පැලඳ සිටි රන් ආභරණ කිහිපයක් ද අතුරුදන්ව තිබිණි.
පොලිසිය සැකකරුවන්ගෙන් කළ ප්‍රශ්න කිරීම් හමුවේ මියගිය කාන්තාවගේ ජංගම දුරකතනය ද සොයාගෙන තිබේ.
සැකකරුවන් කඩුවෙල අධිකරණයට ඉදිරිපත් කොට පැය 48ක රැඳවුම් නියෝග ලබාගෙන වැඩිදුර විමර්ශන සිදුකරන බව කඩුවෙල පොලිස් ස්ථානාධිපති ප්‍ර.පො.ප. කාන් වීරසිංහ මහතා පැවසීය.
(සුගත් ප්‍රේමතිලක)
0 Comments