රැඳවුම් භාරයේ රඳවා සිටින සළිඳු මල්ෂිත හෙවත් කුඩු සළිඳු නමැත්තා උගුර, කණ, නාසය පිළිබඳ විශේෂඥ වෛද්‍යාවරයකු වෙත යොමු කරන්නැයි කරන ඉල්ලීම කොටුව මහේස්ත්‍රාත් තිළිණ ගමගේ මහතා අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට යොමු කළේය.
මෝසමකට අනුව මෙම පැමිණිල්ල කැඳවනු ලැබූ අවස්ථාවේදී අධිකරණය ඇමතූ නීතිඥ ඉවෝන් නිරාෂා මහත්මිය රහස් පොලීසිය භාරයේ රදවාගෙන ප්‍රශ්න කරන තම සේවාදායකයා රෝගී තත්ත්වයෙන් පසුවන බවත්, ඔහු සාමාන්‍ය වෛද්‍යවරයකු පරීක්ෂා කළ අවස්ථාවේදී උගුර, කණ, නාසය පිළිබඳ විශේෂඥ වෛද්‍යවරයකු වෙත යොමු කිරීමට නිර්දේශ කර ඇති බවත් කීවාය.
තම සේවාදායකයා පරීක්ෂා කළ සාමාන්‍ය වෛද්‍යවරයා ඔහුට දින 05කට ඖෂධ දුන්නත් එම බෙහෙත්ද මේ වන විට අවසන් වී ඇතැයි කී නීතිඥවරිය මෙම ඉල්ලීම කළාය.
කරුණු සලකා බැලූ මහෙස්ත්‍රාත්වරයා සැකකරු රඳවා සිටින්නේ පෞද්ගලික රෝහලක නොවන බැවින් ඔහු විශේෂඥ වෛද්‍යවරයකු වෙත යොමු කිරීමට නියෝගයක් නිකුත් කළ නොහැකි බව පෙන්වා දුන්නේය.
අධිකරණයේ කාර්ය භාරය වී ඇත්තේ රැඳවුම් භාරයේ සිටින සැකකරුගේ යහපැවැත්ම සහතික කිරීම පමණක් වන හෙයින් සැකකරුට අදාළ ඉල්ලීම සම්බන්ධයෙන් නියෝගයක් නිකුත් කිරීමට හැකියාව නැතැයි පෙන්වා දුන් මහෙස්ත්‍රාත්වරයා අදාළ ඉල්ලීම අපරාධ පරීක්ෂණ දෙපාර්තමේන්තුවේ අධ්‍යක්ෂවරයා වෙත යොමු කළේය.
බුද්ධිමාල් රුබේරු
0 Comments