මහරගම ප්‍රදේශයේ සම්බාහන මධ්‍යස්ථාන මුවාවෙන් පවත්වාගෙන ගිය ගණිකා නිවාස වටලා කළමනාකරුවන් 06 දෙනකු සහ එම ගණිකා නිවාසවල සේවය කළ කාන්තාවන් ඇතුළු 20 දෙනෙක් පෙරේදා (09) මධ්‍යම දූෂණ මර්දන ප්‍රහාරක බළකාය විසින් අත්අඩංගුවට ගනු ලැබූහ.
මහරගම නගරය කේන්ද්‍ර කර ගනිමින් සම්බාහන මධ්‍යස්ථාන මුවාවෙන් ගණිකා නිවාස රාශියක් හතු පිපෙන්නාක් මෙන් බිහි වී ඇති බවත්,
ඒ සඳහා නගර මධ්‍යයේ පිහිටි පාසල්වල සහ උපකාරක පන්තිවල සිසුන් බොහොමයක් මෙම ගණිකා නිවාස වෙත යාමට යොමුවී ඇති අතර මෙම ගණිකා මධ්‍යස්ථාන කිසිඳු චකිතයකින් තොරව පවත්වාගෙන යන බවටත් මහරගම ප්‍රදේශවාසීන් දුරකතන පණිවිඩ ඔස්සේ තොරතුරු ලබා දෙමින් සිටින බව පොලිසිය පවසයි.ලබාදෙන පණිවිඩවලට අනුව එම තොරතුරු සඳහා ක්‍රියාත්මක වීමට මධ්‍යම දූෂණ මර්දන ප්‍රහාරක බළකායේ අධ්‍යක්ෂ පොලිස් අධිකාරි සමන්තිලක වැලිවිට මහතා සහ ස්ථානාධිපති ප්‍රධාන පොලිස් පරික්ෂක ඉන්දික වීරසිංහ යන නිලධාරීන් කරන ලද සැලැස්මකට අනුව එම ප්‍රදේශයේ බුද්ධි අංශ නිලධාරීන් යොදවා සිදු කරන ලද රහසිගත ආවේක්ෂණ රාජකාරියෙන් පසු අනාවරණය කර ගත් තොරතුරුවලට අනුව ගංගොඩවිල මහේස්ත්‍රාත් අධිකරණයෙන් ලබා ගත් සෝදිසි වරෙන්තු මත පෙරේදා (09) සවස කාලයේ මෙම වැටලීම් සිදු කර තිබේ.
පොලිස් කණ්ඩායම් හයක් යුක්තිය මෙහෙයුමට සමගාමීව සිදුකරන ලද වැටලීමේදී මෙම පිරිස් අත්අඩංගුවට ගෙන ඇති බව පොලිසිය සඳහන් කරයි.
සැකකරුවන් සහ සැකකාරියන් ගංගොඩවිල මහේස්ත්‍රාත් අධිකරණය ඉදිරිපත් කිරීමට කටයුතු යොදා තිබුණි.
(රක්ෂණ ශ්‍රියන්ත)
0 Comments