පොලිස් ක්‍රීඩා ඇඳුමක් ඇඳ සිටියා යැයි වැඩ තහනමට ලක්ව සිටින පොලිස් සැරයන්වරයකු කොහුවල පොලිසිය වෙත රැගෙන ගොස් අමානුෂික ලෙස පහර දි ඇත. පහරකෑමට ලක්වූ සැරයන්වරයා වසර 17ක් පොලිස් සේවයේ සිටි අයකු බවද වාර්තාවේ.
එලෙස පහර කෑ පොලිස් සැරයන්වරයා මේ වන විට කළුබෝවිල ශික්ෂණ රෝහලේ අංක 25 වාට්ටුවේ ප්‍රතිකාර ලබමින් සිටි.
මෙලෙස පහර කෑමට ලක්ව ඇත්තේ පොලිස් ගරාජයට අනුයුක්තව සේවය කළ ගාල්ල අඟුලුගහ කහද ප්‍රදේශයේ පදිංචි එස්. ඩී. එම්. ඩයස් මහතායි. 39 හැවිරිදි ඔහු දෙදරු පියකි
වැඩ තහනමට ලක්වීමෙන් අනතුරුව ගොඩනැඟිලි ඉදිකිරීම් කොන්ත්‍රාත් කටයුතු සිදුකරන මිතුරෙකු යටතේ සේවය කර බිරිඳ සහ දරු දෙදෙනාව පෝෂණය කරමින් කටයුතු කළ හිටපු සැරයන්වරයා ඉකුත් 14 වෙනි දින කොන්ත්‍රාත්කරු සහ ඔහු යටතේ සේවය කරන තවත් පුද්ගලයන් දෙදෙනෙකු සමඟ කොටහේන ප්‍රදේශයේ නිවසක ඉදිකිරීම් කටයුත්තකට සහභාගී වී රෑ බෝවන තෙක් වැඩ කර 15 වෙනි දින අලුයම් කාලයේ දෙහිවල නවාතැන්පොළට යාම සඳහා කොන්ත්‍රාත්කරුට අයත් ත්‍රිරෝද රථයෙන් පැමිණීමේදී මේ පහරකෑමට ලක්ව ඇත.
එදින රාත්‍රී ආහාරය නොගෙන සිටි බැවින් පිරිස කොහුවල නගරයේ රාත්‍රී ආපනශාලාවක් ඉදිරිපිට ත්‍රිරෝද රථය නවතා ඇත. එම ස්ථානයේ පොලිස් නිල ඇඳුමින් සැරසී පොලිස් නිලධාරීන් දෙදෙනෙකු සහ සිවිල් ඇඳුමින් සැරසුණු පොලිස් නිලධාරීන් කිහිපදෙනකු තේ සහ දුම් පානය කරමින් සිට ඇත. තමා ඇතුළු පිරිස ආපනශාලාව තුළට යාමේදී ‘කොහෙන්ද ඔය ටී ෂර්ට් එක’ යැයි කියා පොලිස් නිලධාරීන් ඇසූ බව ඔහු කියයි.
අනතුරුව සිදුවූ දෙය ඔහුගේම වචනවලින් මෙසේය.
“මම එතකොට මගේ විස්තර කියලා කිව්වා මම රාජකාරි කරනකොට මිලදී ගත්ත එකක් කියලා. ඊට පස්සේ මට ඒගොල්ලන් කිව්වා යන්න කියලා. මම පස්සේ අනිත් කට්ටියත් එක්ක ආපනශාලාව තුළට ගියා. පස්සේ අපි කෑම කන්න හදනකොට මට ආයි එයාලගේ ත්‍රීවීල් එක ගාවට එන්න කිව්වා. මාව කොහුවල පොලිසිය පිටුපසට එක්කගෙන ගියා. මගේ ටී ෂර්ට් එක ගලවලා ඒ කට්ටිය මට හොඳටම ගැහුවා. ඊට පස්සේ බිම දිගේ ඇදගෙන ගිහිල්ලා කූඩුවට දැම්මා, ඒකෙදිත් මට ගැහුවා මට කලන්තේ වගේ ආවා.මම වතුර ඉල්ලුවත් ඒගොල්ලෝ වතුර දුන්නේ නෑ. කූඩුවේ ඉන්න එක්කෙනෙක් තමයි පොලිසියට හොරෙන් මට වතුර දුන්නේ.උදේ හයට විතර මට හරි අමාරුයි මම බොහොම අමාරුවෙන් කිව්වා මට ගෙදරට මේ ගැන කියන්න මගේ ෆෝන් එක දෙන්න කියලා. ඒවෙලාවේ මට පහර දෙන්න මූලිකව කටයුතු කළ පොලිස් කොස්තාපල් (74163) චාමර නිලධාරියා සහ රථවාහන අංශයේ ස්ථානාධිපතිවරයා කූඩුව ඇතුළට ඇවිල්ලා මට සපත්තු දාපු පයිනුයි, අතිනුයි ආයි පහර දුන්නා. මම කිව්වා මාව ඉස්පිරිතාලෙට අරන් යන්න මට අමාරුයි කියලා. ඒත් ගණන් ගත්තේ නෑ. පස්සේ මගේ යාළුවා ගිහිල්ල ඕ.අයි.සි මහත්තයට කතා කරලා තමයි මාව එළියට ගත්තේ. සැකපිට අත්අඩංගුවට ගන්න මාව කිසිම හේතුවක් නෑ. දැන් මට කුලී වැඩක්වත් කරගන්න අමාරුයි.
මගේ කටිනුත් ලේ ආවා. පිටේ තුවාල. ඇවිදින්නත් අමාරුයි. ඒ නිසයි මම රෝහල් ගත වුණේ. මේ ක්‍රීඩා ඇඳුම් වෙළඳපොළේ ඕන තරම් තියනවා විකුණන්න. මම මේ ඇඳුම ඇන්දා කියල මට ගැහුවේ ඇයිද කියලා මටම හිතාගන්න බෑ”
පොලිසියේ පහරදීමෙන් රෝහල්ගත වූ හිටපු සැරයන්වරයා අධිකරණ වෛද්‍ය නිලධාරීවරයෙකු වෙතද ඉදිරිපත් කළ බව රෝහල් ප්‍රකාශකයෙක් පැවසීය.
මේ සම්බන්ධයෙන් කොන්ත්‍රාත්කරු වන වරුණ නිශාන්ත ගුණතිලක මහතා මෙසේ පැවසීය.
“ගහන්න එපා මහත්තයෝ රස්සාවක් නැති හින්දයි මම මේ කුලී වැඩ කරන්න ආවෙ කියලා ඩයස් කෑ ගැහුවා. ඒත් ඒගොල්ලන් ඉතාමත් අමානුෂික විදියට ඩයස්ට ගැහුවා”
‘මට ළමයි දෙන්නෙක් ඉන්නවා මහත්තයෝ කියද්දිත් කොහොමද උඹ මේ ටිෂර්ට් ඇඳගෙන කුලී වැඩ කරන්නේ කියලා සත්තු වගේ ගැහුවේ’
ඔහු සමඟ එකට වැඩ කිරීමට ගිය වයි. එච්. ප්‍රියන්ත මහතා මෙසේ පැවසීය.
උඹ පොලිසිය ටී ෂර්ට් ඇඳගෙන කොන්ක්‍රීට් අනන්න යනවද යමං කියලා ඇදලා ත්‍රීවීල් එකට දාගත්තා. ඒක ගලවලා බිම දාගෙන ඇදගෙන ගිහිල්ලා තමයි ගැහුවේ අපි බලාගෙන හිටියා.
0 Comments