නැවත ලබාදීමේ පදනම මත ලබාගත් රුපියල් මිලියන 70ක මුදලක් ලබානොදී වංචා කළැයි අපරාධ පරීක්ෂණ දෙපාර්තමේන්තුව අත්අඩංගුවට ගත් අවුරා ලංකා සමාගමේ අධිපති ව්‍යාපාරික විරංජිත් තාඹුගල ලබන 27 වැනිදා තෙක් රක්ෂිත බන්ධනාගාර ගත කරන ලෙස කොළඹ අතිරේක මහේස්ත්‍රාත් පවිත්‍රා සංජීවනී පතිරණ මහත්මිය ඊයේ (22) නියෝග කළාය.
අයි. ඩබ්ලිව්. එස්. හෝල්ඩින්ස් පුද්ගලික සමාගමේ අධිපති ආතර් සේනානායක මහතා කරන ලද පැමිණිල්ලකට අනුව මෙම විමර්ශනය ආරම්භ කළ බවට සඳහන් කරමින් අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසය සැකකරු අත්අඩංගුවට ගෙන අධිකරණයට ඉදිරිපත් කළ අවස්ථාවේදී මහේස්ත්‍රාත්වරිය මෙම නියෝගය නිකුත් කළාය.
මෙම ගනුදෙනුව සිදුවන අවස්ථාවේදී පැමිණිලිකරු රුපියල් මිලියන 60ක මුදලක් ඔහුගේ බැංකු ගිණුමෙන් ලබාගෙන සැකකරුට ලබාදී ඇති බවත් මෙයින් අපරාධමය වරදක් වී ඇති බවත් සඳහන් කළ අපරාධ පරීක්ෂණ දෙපාර්තමේන්තුව අදාළ මුදල සැකකරු විසින් පැමිණිලිකරුගෙන් ලබාගෙන ඇති බවට තොරතුරු හෙළිවී ඇතැයි ද අධිකරණයට පැවැසීය.
දින පහළොවක් ඇතුළත ලබා දෙන පොරොන්දුව මත ලබා ගත් මෙම මුදල සඳහා දෙපාර්ශ්වය විසින් ගිවිසුමක් ද අත්සන්කරනු ලැබ ඇති බවත් සැකකරු නැවත එම මුදල ලබා නොදී වංචා කර ඇති බවත් අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කළේය.
සැකකරු වෙනුවෙන් අධිකරණයේ පෙනී සිටි නිතීඥ රන්ජන් ද සිල්වා මහතා සඳහන් කර සිටියේ තම සේවාදායකයා අදාළ ආයතනයෙන් හෙළිකොප්ටර් දෙකක් මිලදීගැනීමේ ගනුදෙනුවක් සිදුකර ඇති බවත් එහි දී අදාළ මිලගණන් විමසා බැලීමේ දී රුපියල් මිලියන 120ක මුදලක් තම සේවාදායකයා පැමිණිලිකරුට ගෙවා ඇති බවට හෙළිවූ බවත් ය. කෙසේ වෙතත් තම සේවාදායකයා මෙම මිලියන 70ක මුදල ලබා නොගත් අතර එම චෝදනාව තරයේ ප්‍රතික්ෂේප කරන බව ද නිතීඥවරයා අධිකරණයට දැනුම් දුන්නේය.
ඉදිරිපත්වූ කරුණු සැලකිල්ලට ගත් අධිකරණය සැකකරු සම්බන්ධයෙන් වන විමර්ශන කඩිනමින් අවසන් කර වාර්තාවක් ඉදිරිපත් කරන ලෙසට අපරාධ පරීක්ෂණ දෙපාර්තමේන්තුවට නියම කරමින් සැකකරු ලබන 27 වැනිදා තෙක් රක්ෂිත බන්ධනාගාර ගත කර එදින තෙක් නඩුව කල් තැබීය.
0 Comments