අවිස්සාවේල්ල, උක්වත්ත, හතරවන පටුමග ප්‍රදේශයේ නි‍වසක් අසල තිබී අඩි විස්සකට වැඩි උස් තාප්පයකින් වැටී මියගිය බවට සැක කරන පුද්ගලයකුගේ මළ සිරුරක් හමු වූ බව අවිස්සාවේල්ල මූලස්ථාන පොලිසිය පවසයි.
මෙලෙස මියගොස් ඇත්තේ අවිස්සාවේල්ල, පෙන්රික්වත්ත ප්‍රදේශයේ පදිංචිකරුවකු වන වී. සිවකුමාර් නමැති 42 හැවිරිදි අවිවාහක පුද්ගලයෙකි.
මියගොස් සිටි පුද්ගලයා උක්වත්ත හතරවන පටුමග ප්‍රදේශයේ නි‍ෙවසකට රාත්‍රි කාලයේදී සොරෙන් ඇතුළු වී සිටියදී එම නි‍ෙවසේ නිදා සිටි හිමිකරුවන් අවදිවීම නිසා එක්වරම මොහු නි‍ෙවසින් පලා ගොස් ඇති බවත් එලෙස පලා යන අවස්ථාවේදී ගසකට නැග අදාළ තාප්පය මතට නැග එම තාප්පයෙන් වැටීම නිසාවෙන් මෙම මරණය සිදුව ඇති බවත් සිදුකළ මූලික විමර්ශනයේදී අනාවරණය වූ බවද පොලිසිය පවසයි. අදාළ මරණකරුගේ දේහය ඥාතීන් පැමිණ හඳුනාගෙන ඇත. සිද්ධිය වූ ස්ථානයට පැමිණි අවිස්සාවේල්ල වැඩබලන මහේස්ත්‍රාත් රත්නායක මහතා විසින් මූලික මහේස්ත්‍රාත් පරීක්ෂණ කටයුතු සිදු කරනු ලැබූ අතර අද (18) දින අවිස්සාවේල්ල මූලික රෝහලේ දී පශ්චාත් මරණ පරීක්ෂණය සිදු කරන ලෙස එහිදී නියෝග කළේය.
සීතාවක පොලිස් බලප්‍රදේශයේ අපරාධ ස්ථාන පරීක්ෂණ නිලධාරීන් පැමිණ මූලික පරීක්ෂණ කටයුතු සිදු කළ අතර, අවිස්සාවේල්ල මූලස්ථාන පොලිසියේ අපරාධ විමර්ශන ඒකකයේ ස්ථානාධිපති පොලිස් පරීක්ෂක උපුල් පෙරේරා මහතා ඇතුළු නිලධාරීහු වැඩිදුර පරීක්ෂණ පැවැත්වූහ.
මීගොඩ - බී.කේ. කත්‍රිආරච්චි
0 Comments