ගිරාඳුරුකෝට්ටේ දිවුලපැළැස්ස රොටලවෙල ක්‍රීඩාංගණයේ පැවති සැණකෙළි බිමක ඉදිකර තිබූ මාරක ළිඳක් පෙරේදා (23) රාත්‍රි හදිසියේ කඩා වැටීමෙන් පස්දෙනෙකු තුවාල ලබා ගිරාඳුරුකෝට්ට සහ මහියංගණ රෝහලට ඇතුළත් කළ බව දිවුලපැළැස්ස පොලිසිය පවසයි. තුවාල ලැබූවන් අතර අවුරුදු 50 ක් වයස කාන්තාවක සහ අවුරුදු 13, 36, 40, 45 වයසේ පසුවෙන පිරිමි පුද්ගලයන් සිව්දෙනෙකු සිටින බවත් පොලිසිය කීය. මොවුන් රොටලවෙල ප්‍රදේශයේ පදිංචි අයවලුන් බව ද පොලිසිය පැවසීය. මෙම තුවාලකරුවන් ගෙන් දෙදෙනකු ගිරාඳුරුකෝට්ට රෝහලේත්, සෙසු තිදෙනා මහියංගණ රෝහලෙත් නේවාසිකව ප්‍රතිකාර ලබමින් පසුවෙන බව පොලිසිය සඳහන් කළේය.
වෙසක් උත්සවය නිමිත්තෙන් රොටලවෙල ප්‍රදේශයේ විහාරස්ථානයක් මගින් සංවිධාන කර තිබූ මෙම සැණකෙළියේ සමාරම්භක ඊයේ දින රාත්‍රි එය නැරඹීමට විශාල පිරිසක් පැමිණ ඇති අතර, සැණකෙළි භූමියේ ඉදිකර තිබූ මාරක ළිඳ නැරඹීමට ද ජනතාව පැමිණ තිබේ.
මාරක ළිඳ ආරම්භ වීමට පෙර නරඹන්නන් ප්‍රවේශ පත් රැගෙන එයට ඇතුළු වී සිටියදී එක්වරම මාරක ළිඳේ අඩි 15 ක් පමණ උසින් පිහිටි කොටසක් මෙසේ එක්වරම කඩා ගෙන බිමට වැටී ඇතැයි පොලිසිය පැවසීය. තුවාලකරුවන් ගෙන් තිදෙනකුගේ තත්ත්වය තරමක් බරපතළ බව රෝහල් ප්‍රකාශයෙක් කීය.
ඌව පළාත් භාර නියෝජ්‍ය පොලිස්පති ඒ. එම්. උපුල් චන්දන, බදුල්ල ජ්‍යෙෂ්ඨ පොලිස් අධිකාරි වසන්ත කන්දේවත්ත, පොලිස් අධිකාරි බුද්ධික ගුණසේකර යන මහත්වරුන්ගේ උපදෙස් මත දිවුලපැළැස්ස පොලිසිය වැඩිදුර පරික්ෂණ පවත්වයි.
0 Comments