බීමත්ව රිය පැදෙව්වාට චෝදනා ගොනු කළ අවස්ථාවේ බැලුම් පුම්බන්නට බැහැ කියමින් ශ්වසන පරීක්‍ෂාව ප්‍රතික්ෂේප කළ රියැදුරෙකුගෙන් රුපියල් ලක්ෂයක දඩයක් අය කිරීමට කුලියාපිටිය මහේස්ත්‍රාත් රන්දික ලක්මාල් ජයලත් මහතා පෙරේදා (13) නියම කළේය.
කුලියාපිටිය හෙට්ටිපොළ පාරේ ආපනශාලාවක හිමිකරුවෙකු වූ ඩී.එම්. සාරංග දිසානායක නමැත්තෙකුට එලෙසින් දඩ නියමාවිය.
බීමත්ව රිය ධාවනය කිරීමේ චෝදනාවට අමතරව රිය බලපත්‍රයක්, ආදායම් බලපත්‍රයක්, රක්‍ෂණ සහතිකයක් නොමැතිව ධාවනය, ප්‍රධාන ලාම්පු දල්වා නොමැතිව ධාවනය, අපරික්‍ෂාකාරී රිය ධාවනය හා පොලිස් අණ නොතකා ධාවනය යන චෝදනාද සැකකාර රියැදුරාට එරෙහිව පොලිසිය විසින් චෝදනා නඟා තිබිණ.
පොලිසිය බී වාර්තාවකින් කරුණු ඉදිරිපත් කරමින් පවසා සිටියේ බැලූ බැල්මට අධික බීමතින් සිටි සැකකරු ශ්වසන පරීක්‍ෂාව ප්‍රතික්ෂේප කළ බවයි. පසුව වෛද්‍යවරයෙකුට ඉදිරිපත් කරන්නැයි දැඩිව යෝජනා කළ සැකකරු එසේ ඉදිරිපත් කළ පසු අදාළ වෛද්‍යවරයා පැවසූයේ කිසිදු දුගඳක් වහනය නොවන බව යැයිද පොලිසිය අධිකරණයට පවසා සිටියේය.
රෝහල ඉදිරියේ ඇති ආපනශාලාවේ හිමිකරු වන සැකකරු සම්බන්ධව වෛද්‍යවරයා දුන් නිර්දේශය කිසිසේත් පිළිගත නොහැකි බව කී පොලිසිය එහෙත් ශ්වසන පරීක්‍ෂාව ප්‍රතික්ෂේප කිරීමම බීමත්ව රිය ධාවනය කළ බවට උපකල්පනය කළ හැකි බවට මෝටර් රථවාහන පනතේ 151 වගන්තියේ 1 ආ උප වගන්තියේ සඳහන් වන බැවින් සැකකරු බීමත්ව රිය ධාවනය කළ බවට චෝදනාවද ඉදිරිපත් කළ බවද කී පොලිසිය අධිකරණයට කරුණු දැක්වීය.
ඒ අනුව චෝදනා සියල්ලට සැකකරු වෙනුවෙන් පෙනී සිටි නීතිඥවරයා වරද පිළිගැනීමෙන් අනතුරුව එසේ දඩ නියම විය.
කුලියාපිටිය - මෙවිරු ධනාන්
0 Comments