කලක සිට හම්බන්තොට ඇතුළු ප්‍රදේශ රැසකටම අයිස් මත්ද්‍රව්‍ය බෙදා හැරීමේ ජාවාරමක නිරත වු හම්බන්තොට මහ රෝහලේ සේවය කළ භෞතචිකිත්සකවරයා මේ මස 20වැනි දින දක්වා රක්ෂිත බන්ධනාගාරගත කරන ලෙස හම්බන්තොට මහේස්ත්‍රාත් හා අතිරේක දිසා විනිසුරු ඕෂධ මිගාර මහආරච්චි මහතා පෙරේදා(06) නියෝග කෙරිණි.
මෙලෙස රක්ෂිත බන්ධනාගාරගත කෙරුණේ හම්බන්තොට මහ රෝහලේ භෞතචිකිත්සකවරයකු ලෙස සේවය කරන සූරියවැව, පොළ පහළ පදිංචිකරුවෙකි.
හම්බන්තොට ප්‍රදේශයේ සිදු වන අයිස් මත්ද්‍රව්‍ය ජාවාරමක් පිළිබඳව තංගල්ල කොට්ඨාස දූෂණ මර්දන ඒකකයට ලද තොරතුරකට අනුව හම්බන්තොට සාමෝදාගම ප්‍රදේශයේ කළ වැටලීමකදී අයිස් මත්ද්‍රව්‍ය මිලි ග්‍රෑම් 570ක් සමඟ පුද්ගලයකු අත්අඩංගුවට ගැනීමට ඒකකයේ නිලධාරීන් සමත් වී තිබේ. එහිදී අත්අඩංගුවට පත් පුද්ගලයාගෙන් කළ ප්‍රශ්න කිරීමේදී සැකකරු පවසා ඇත්තේ හම්බන්තොට මහ රෝහලේ භෞතචිකිත්සකවරයා විසින් අයිස් මත්ද්‍රව්‍ය බෙදා හරින බවයි.
ඒ අනුව අදාළ භෞතචිකිත්සකවරයා නවාතැන් ගෙන සිටි හම්බන්තොට තාවකාලික නවාතැන පරීක්ෂා කිරීමේදී එහි තිබී අයිස් මත්ද්‍රව්‍ය ග්‍රෑම් 04යි මිලි ග්‍රෑම් 500ක් සමඟ සැකකරු අත්අඩංගුවට ගෙන තිබේ. සැකකරු කලක පටන් මේ ජාවාරම කරගෙන ගොස් ඇති බව මූලික විමර්ශනවලදී අනාවරණයවී ඇත්තේ. සැකකරු දිගින් දිගටම මේ ජාවාරම කිරීම නිසා සැකකරුගේ බිරියද සැකකරුගෙන් වෙන්ව ජීවත්ව සිටින බවද අනාවරණය වී තිබේ. සැකකරු හම්බන්තොට, අම්බලන්තොට, සූරියවැව, තිස්සමහාරාම හා ඇඹිලිපිටිය ප්‍රදේශවලට මේ අයිස් මත්ද්‍රව්‍ය බෙදා හැරීම කර තිබේ. සැකකරු වැල්ලම්පිටිය පදිංචි පුද්ගලයකුගෙන් මේ අයිස් මත්ද්‍රව්‍ය තොග වශයෙන් ලබා ගන්නා බව මූලික ප්‍රශ්න කිරීමේදි සැකකරු පවසා ඇත. සැකකරුගෙන් කළ මූලික ප්‍රශ්න කිරිමේදී අයිස් මත්ද්‍රව්‍ය ජාවාරම සම්බන්ධ තොරතුරු රැසක් අනාවරණය වී ඇති අතර ඒ ඔස්සේ වැඩිදුර පරීක්ෂණ සිදු කරයි.
තංගල්ල කොට්ඨාස භාර ජ්‍යෙෂ්ඨ පොලිස් අධිකාරී කේ.බී. කීර්තිරත්න මහතාගේ උපදෙස් පරිදි තංගල්ල කොට්ඨාස දූෂණ මර්දන ඒකකයේ ස්ථානාධිපති උප පොලිස් පරීක්ෂක ජයවිර, පොලිස් සැරයන්වරුන් වන
(70223) රසික, (71452) ඉන්දික, (72939) සංජය, (75587) අමිල හා
පොලිස් කොස්තාපල්වරුන් වන (84229) සමන්, (91504) සඳරුවන් ඇතුළු නිලධාරීන් කණ්ඩායමක් විසින් මේ වැටලීම සිදුකර සැකකරුවන් අත්අඩංගුවට ගෙන තිබේ.
සූරියවැව විශේෂ - නුවන් ජයසේකර
0 Comments