මෙයට වසර හතරකට පමණ ඉහතදී පහර දී ඝාතනය කර වැසිකිළි වළක දමා තිබූ හිනිදුම, කපල්ල බටහිර ප්රදේශයේ දෙදරු මවකගේ ඝාතනයේ සුලමුල අනාවරණය කර ගැනීමට හැකි වූ බව ගාල්ල කොට්ඨාස අපරාධ විමර්ශන අංශය පවසයි. මේ කාන්තාව දෙවැනි වරට විවාහ වූ පුද්ගලයා විසින් මේ ඝාතනය සිදු කර ඇති බව පොලිසිය පවසයි. ඔහු පොලිසිය මඟින් අත්අඩංගුවට ගෙන සිදු කළ ප්රශ්න කිරීම්වලදී මේ ඝාතනයේ සුලමුල අනාවරණය වී ඇත.
2020 වර්ෂයේ දී මේ ඝාතනය සිදු වී තිබේ. ඝාතනයට ලක්වූ කාන්තාව මෙන්ම සැකකරු ද දෙවැනි වතාවට විවාහ වී ඇති බව පොලිස් පරීක්ෂණවල දී අනාවරණය වී ඇත. දෙවැනි වරට විවාහ වූ පුද්ගලයාට දාව මේ කාන්තාවට දරුවන් දෙදෙනෙකු සිටින අතර සැකකරු ඇයට පහර දී ඝාතනය කර පසුව නිවසේ වැසිකිළි වළට දමා ඇති බව පොලිසිය පවසයි.
මේ කාන්තාව අතුරුදන්ව ඇති බව සැකකරු විසින් පොලිසියට ප්රකාශ කර තිබිණි. පොලිසිය විසින් සැකකරු අත්අඩංගුවට ගෙන කළ ප්රශ්න කිරීම්වලදී තමන් මේ ඝාතනය සිදු කළ බවට පොලිසිය ඉදිරියේ පාපෝච්චාරණය කර ඇත. ඝාතනයට ලක් වූ කාන්තාවගේ මළසිරුර ඊයේ ගොඩගැනීමට නියමිතව තිබුණි. ගාල්ල පොලිසියේ කොට්ඨාස අපරාධ විමර්ශන අංශය හා හිනිදුම පොලිසිය එක්ව මේ පිළිබඳ පරීක්ෂණ පවත්වයි.
(දික්වැල්ලේ තිලකරත්න )
0 Comments