ජපන් රැකියා පෙන්වා මුදල් ගත් අයෙක් අත්අඩංගුවට

විදේශ සේවා නියුක්ති කාර්යාංශයේ වලංගු බලපත්‍රයක් නොමැතිව, මාතර නගරයේ පවත්වාගෙන ගිය නීතිවිරෝධී විදේශ රැකියා නියෝජිතායතනයක් කාර්යාංශයේ විශේෂ විමර්ශන ඒකකයේ නිලධාරින් විසින් වැටලීම් කර තිබේ. අත්අඩංගුවට ගත් සැකකරු මාතර මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව,

එළඹෙන 15වැනිදා දක්වා රක්ෂිත බන්ධනාගාරගත කිරීමට මහේස්ත්‍රාත්වරයා නියෝග කර ඇත. මාතර නගරයේ Yumi International (Pvt) Ltd නමින් ආයතනයක් පවත්වාගෙන යමින්, ජපානයේ රැකියා ලබාදෙන බවට මුදල් අයකරන බවට පෞද්ගලික ඔත්තුකරුවෙකු මගින් කාර්යාංශයේ විමර්ශන අංශයේ කළමනාකරුට ලද තොරතුරක් අනුව විශේෂ විමර්ශන අංශයේ නිලධාර්න් විසින් අදාළ ස්ථානය වැටලීම් කර ඇත.

ජපානයේ ශිෂ්‍ය වීසා සඳහා ශ්‍රී ලාංකිකයන් යොමු කරන ආයතනයක් මුවාවෙන් කාර්යාංශයේ වලංගු බලපත්‍රයක් නොමැතිව අදාළ ස්ථානය පවත්වාගෙන ගොස් ඇති බව විමර්ශනවලදී හෙළි වී තිබෙන අතර, ඒ අනුව එහි අධ්‍යක්ෂ ලෙස කටයුතු කළ මාතර ප්‍රදේශයේ පදිංචි අයෙකු අත්අඩංගුවට ගෙන තිබේ. එසේම අදාළ ස්ථානයේ තිබී විදේශ ගමන් බලපත්‍ර, රැකියා අයදුම්පත්‍ර විශාල ප්‍රමාණයක් හා තවත් ලිපිගොනු රැසක්ද නිලධාරින් භාරයට ගෙන ඇත.

මෙම වැටලීම සඳහා කාර්යාංශයේ විශේෂ විමර්ශන අංශයේ නිලධාරින් වන එම්.කේ සුමනවීර, ඉදුනිල් පුෂ්පකුමාර, මහීෂ කොඩිප්පිලිආරච්චි,

මදුශාන් විජේවර්ධන, නිදර්ශිකා දමයන්ති හා ගයේෂා සුභාෂිණී යන නිලධාරීර්න් එක්විය.විදේශ රැකියාවක් ලබාගැනීම සඳහා විදේශ ගතවීමේදී යම් ආයතනයකට හෝ පුද්ගලයෙකුට මුදල් හෝ විදේශ ගමන් බලපත්‍රය ලබාදීමට පෙර, එම ආයතනයට විදේශ රැකියා සඳහා බදවාගැනීමට කාර්යාංශයේ වලංගු බලපත්‍රයක් තිබේද යන්න හා වලංගු රැකියා නියෝජිතායතනයක් වුවද එම ආයතනයට අදාළ රැකියාව සඳහා වලංගු රැකියා ඇණවුමක් ලැබී ඇත්දැයි යන්න සොයා බැලීම සඳහා කාර්යාංශයේ www.slbfe.lk වෙබ්අඩවියට පිවිසීමෙන් හෝ 1989 ක්ෂණික ඇමතුම් අංකය ඇමතීම මගින් තොරතුරු ලබාගන්නා ලෙස කාර්යාංශය විදේශ රැකියා අපේක්ෂිතයන්ගෙන් ඉල්ලා සිටියි.
නවෝද්‍යා පවනි