වෙසක් පොහොය වෙනුවෙන් ගම්පොළ පුපුරැස්ස නගරයේ තරුණ පිරිසක් දන්සලක් දීමට සූදානම්වීමේදී අබිරහස් ලෙස මියගිය පියකු හා පුතකුගේ මරණ සම්බන්ධයෙන් පුපුරැස්ස හදිසි මරණ පරීක්ෂකවරයා විවෘත තීන්දුවක් ප්‍රකාශයට පත් කළේය.
මෙසේ මිය ගොස් ඇත්තේ පුපුරැස්ස නැඩ්සා ප්‍රදේශයේ පදිංචි සනත් රෝහණ විජයකුමාර (40) (පියා) හා ගගන මදුශාන් (17) (පුතා) යන දෙදෙනායි. පුපුරැස්ස නගරයේ තරුණ කැල හා ප්‍රදේශවාසීන් එක්ව විසිදෙවන වරටත් මෙවරද මෙම දන්සල දීමට සූදානම් කර තිබී ඇත. රාත්‍රී පුරා එහි කටයුතු සිදු කරමින් පැවතියද ප්‍රදේශයේ විදුලිය විසන්ධි වී තිබීමෙන් ඔවුන්ගේ එම කටයුතුවලට බාධා පැමිණ තිබීණ. මේ නිසා ඔවුන් ජෙනරේටරයකින් එළිය ගෙන රාත්‍රිය පුරා ඉවුම් පිහුම් කටයුතුවලට සූදානම්ව ඇත.
මේ අතර මියගිය පිය පුතු දෙදෙනා රාත්‍රී දෙකයි තිහට පමණ ටිකක් නිදාගන්න යනවා යැයි පවසා ජෙනරේටරය තිබූ කාමරයට ගොස් තිබුණි. පුපුරැස්ස නගරයේ තිබූ ඇඳුම් මහන වෙළඳ සැලක මෙම ජෙනරේටරය තිබී ඇති අතර එය වීදුරුවලින් සම්පූර්ණයෙන්ම ආවරණය සහිත ස්ථානයකි. අලුයම තුනයි තිහට පමණ එම ජෙනරේටරය නතර වී ඇති අතර ඒ පිළිබඳව සොයා බැලීමට මංජු අගුණාවල යන අය එයට ඇතුල්ව සොයා බලා ඇත.
විදුලි පන්දමක් අතැතිව සිටි ඔහු දැක ඇත්තේ සනත් රෝහණ යන අයගේ මුහුණේ කැරපොත්තං කිහිප දෙනෙකු සිටින බවයි.
ඒ බව පැවසීමට නිදා සිටින සනත් යන අයට කතා කළද ඔහු නිහඬ නිසා අනෙක් පිරිසට ද මේ බව දන්නවා සියල්ලෝම පරික්ෂා කිරීමේදී ඔවුන් මියගොස් ඇති බව දැන ඒ අසල ඇති පුපුරැස්ස පොලිසියට මේ බව දන්වා එම පිය පුතු දෙදෙනා පන්විලතැන්න ග්‍රාමීය රෝහලට රැගෙන ගොස් ඇත.
මේ පිළිබඳව ස්ථානීය පරීක්ෂණ කටයුතු ගම්පොළ වැඩ බලන මහේස්ත්‍රාත් නන්දනී කාන්තිලතා මහත්මිය පැවැත්වූවාය. මිය ගිය ගගන මධුෂාන් ගම්පොළ වික්‍රමබාහු විද්‍යාලයේ ඉගෙනුම ලබන අතර ඔහු මෙවර පැවැත්වූ අපොස සාපෙළ විභාගයද ඉහළින් සමත් වූ අයෙකි. දන්සලට අවශ්‍යය අඹ ගෙඩි කඩාගෙන ඇවිත් තිබුණේ ද මොහුය. ජෙනරේටරයෙන් නිකුත් වූ විෂ දුම මෙම මරණවලට හේතු වන්නට ඇතැයි සැක කරන අතර වැඩ බලන මහේස්ත්‍රාත්වරිය සිරුරු පේරාදෙණිය රෝහලට රැගෙන ගොස් පශ්චාත් මරණ පරීක්ෂණය සිදු කරන ලෙස නියම කළාය.
වෙසක් දන්සලකට ආහාර සකස් කරමින් සිට විදුලි ජනක යන්ත්‍රයක් ක්‍රියාත්මක කර තිබූ කාමරයක නින්දට ගිය පිය පුතු දෙදෙනා මියගොස් ඇත්තේ එම ජෙනරේටරයෙන් නිකුත් වූ කාබන් මොනොක්සයිඩ් වායුව ආග්‍රහණයවීමෙන් බව ඒ පිළිබඳව පශ්චාත් මරණ පරීක්ෂණය පැවැත්වූ පේරාදෙණිය ශික්ෂණ රෝහලේ විශේෂඥ අධිකරණ වෛද්‍ය නිලධාරී ආර්. පී. ජයසූරිය මහතා සඳහන් කර ඇත.
මෙම විෂ වායුව ආග්‍රහණයවීමෙන් විනාඩි 5ක් වැනි කෙටි වේලාවකින් නිහඬ මරණයක් සිදුවිය හැකි බවද පවසා ඇති වෛද්‍යවරයා මෙහි වැඩිදුර වාර්තා සඳහා ලේ සාම්පල දෙකක් රස පරීක්ෂකවරයා වෙතද යැවීමට පියවර ගෙන ඇත. පුපුරැස්ස පොලිස් ස්ථානාධිපති ප්‍රධාන පොලිස් පරීක්ෂක මනෝරන්ජන් මහතා සඳහන් කර සිටියේ එම ලේ සාම්පල සඳුදා දින කොළඹට රැගෙනයාමට පියවර ගෙන ඇති බවයි. විසිතුන දින මෙම දන්සල පැවැත්වීමට සූදානම් කර තිබී ඇති අතර ඒ සඳහා රාත්‍රී කාලයේ මෙම පිරිස එක්වී එහි කටයුතු කරමින් සිට ඇත. ඒ අවස්ථාවේ ප්‍රදේශයේ විදුලිය විසන්ධි වී තිබීම නිසා මෙම විදුලි ජනක යන්ත්‍රය ගෙනවිත් ඇති බවද ප්‍රකාශ විය.
මෙම පිය පුතු දෙදෙනා පදිංචිව සිටින පුපුරැස්ස නැඩ්සා ජනපද මාර්ගය වර්ෂාව සමඟ අවහිරවීම හේතුවෙන් එම දේහයන් දෙක මේ වන විට පුපුරැස්ස විහාරස්ථානයේ තබා ඇති අතර එහි අවසන් කටයුතු අද (සෙනසුරාදා) දින පුපුරැස්ස පොදු සුසාන භූමියේ සිදු කිරීමටද නියමිතය.
ගම්පොළ කොට්ඨාස භාර ජ්‍යෙෂ්ඨ පොලිස් අධිකාරී අසංක බණ්ඩාර ගුණතිලක, පුපුරැස්ස පොලිස් ස්ථානාධිපති ප්‍රධාන පොලිස් පරීක්ෂක මනෝරංජන් ගම්පොළ, ස්ථානීය පරීක්ෂණාගාර ස්ථානාධිපති ප්‍රධාන පොලිස් පරීක්ෂක චම්පික විමලරත්න, පොලිස් පරීක්ෂක ප්‍රියන්ත බණ්ඩාර, පොලිස් සැරයන් (41219) කරුණානායක, (36425) ජයන්ත, කාන්තා පොලිස් සැරයන් (2972) ඉනෝකා, පොලිස් කොස්තාපල්වරු වන (77177) අනුරුද්ධ, (103474) දේවින්ද යන නිලධාරීහු පරීක්ෂණ පැවැත්වූහ.
ගම්පොළ - සුරංග දිල්හාන්
0 Comments