වෙසක් පොහොය දා (23දා) තම සැමියා සමඟ රුවන්වැලිසෑය වැඳපුදා ගැනීමට පැමිණි කාන්තාවකගේ රුපියල් ලක්ෂ දෙකකට වැඩි වටිනාකමකින් යුත් මුදල් සහිත පසුම්බියක් සොරකම් කළ සංවිධානාත්මක අපරාධ කල්ලියක කාන්තාවන් දෙදෙනෙකු අත්අඩංගුවට ගත් බව අනුරාධපුර මූලස්ථාන පොලිසිය පවසයි.
මෙලෙස අත්අඩංගුවට පත්ව ඇත්තේ මැදවච්චිය, කුඩා වැව ප්‍රදේශයේ පදිංචි කාන්තාවන් දෙදෙනෙකි.
පැමිණිලිකාරිය සැමියා සමඟ අනුරාධපුර පුලියන්කුලම ප්‍රදේශයේ සිට රුවන්වැලි සෑය වන්දනාවේ පැමිණ, මුදල් පසුම්බිය සහිත බෑගය කරේ දමා ගෙන උදෑසන 9ට පමණ මල් මිලදී ගෙන ඇති බව පැමිනිල්ලේ සඳහන් වේ.
සෑය වන්දනා කරන අතරවාරයේදී බැතිමතුන් විශාල ප්‍රමාණයක් මළුවේ සිටියදී, තම අත් බෑගය පරීක්ෂා කරන අවස්ථාවේදී මුදල් පසුම්බිය එහි නොවූ බවත් රුපියල් 235000ක, මුදලක් සහ ලිය කියවිලි එහි තිබූ බවත් පැමිලිල්ලේ සඳහන්වේ.
ඒ සම්බන්ධයෙන් විමර්ශන සිදු කර සොරකම් කරන ලද මුදල් ද සමඟ සැකකාරියන් දෙදෙනා පැය කීපයක් යාමට මත්තෙන් අත්අඩංගුවට ගත් බවත්, එම සැකකාරියන් දෙදෙනාගෙන් සිදු කළ වැඩි දුර ප්‍රශ්න කිරීම්වලදී මීට දවස් විස්සකට පෙර බස් රථයකින් ගමන් කළ කාන්තාවකගේ මුදල් පසුම්බියේ තිබූ මුදල් සහ රන් ආභරණ කොල්ලකෑම ද සැකකාරියන් දෙදෙනා විසින් සිදු කළ බව අනාවරණය වූ බව පොලිසිය සඳහන් කළේය.
අත්අඩංගුවට ගත් සැකකාරියන් දෙදෙනා අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි
අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරී තිලින හේවාපතිරණ මහතාගේ උපදෙස් මත අනුරාධපුර මූලස්ථාන පොලිසියේ ස්ථානාධිපති ප්‍රධාන පොලිස් පරීක්ෂක ආර්. එම්. ජයවීර මහතාගේ මෙහෙයවීමෙන්, අපරාධ විමර්ශන අංශයේ නිලධාරීහු පිරිසක් විමර්ශන සිදු කර සැකකාරියන් අත්අඩංගුවට ගත්හ.
අනුරාධපුර සශිනි මධුෂානි
0 Comments