අක්මීමන ප්‍රදේශයේ පුද්ගලයකු ඝාතනය කොට රාජගිරිය ප්‍රදේශයට පැමිණ එහි ලැගුම්හලක සැඟව සිටි හිටපු යුද හමුදා සෙබළකු ඇතුළු දෙදෙනකු පෙරේදා (11) අත්අඩංගුවට ගත් බව බස්නාහිර පළාත දකුණ අපරාධ කොට්ඨාසය පවසයි.
සැකකරුවන් දෙදෙනා මෙන්ම මියගිය පුද්ගලයා ද ප්‍රදේශයේ හෙරොයින් ජාවාරමේ නිරත තිදෙනකු වන අතර ඒ සම්බන්ධයෙන් ඇති වූ බහින්බස් වීමක් දුරදිග යෑමෙන් ඉකුත්දා (08) රාත්‍රී කුරුන්ද කන්ද ප්‍රදේශයේ පාළු නිවෙසක නිදා සිටියදී ඔහුගේ ගෙලට කැත්තකින් පහරදී මෙසේ ඝාතනය කොට තිබිණි.
මෙසේ මියගොස් ඇත්තේ අක්මීමන කුරුන්ද කන්ද හරස් පාර පස්මළුව අංක 506හි පදිංචි ප්‍රසන්න කුමාර (හිච්චි මල්ලී) නමැති (42) හැවිරිදි පුද්ගලයෙකි.
මෙම පුද්ගලයා ඝාතනය කිරීමෙන් පසුව ඔහුගේ සොහොයුරාගේ නිවෙසට ද ගොස් ඔහුට ද පහරදී තුවාල සිදුකොට ගාල්ල වංචාවල ප්‍රදේශයේ නිවෙසකදී ලේ තැවරුණු ඇඳුම් පුලුස්සා දමා පසුදා උදෑසන රාජගිරිය ප්‍රදේශයේ ස්පා ආයතනයක සේවයේ නියුතු එක් සැකකරුවකුගේ ඥාති සහෝදරියක රැඳී සිටින රාජගිරිය ප්‍රදේශයේ ලැගුම්හලකට පැමිණ තිබේ.
සැකකරුවන් එහි රැඳී සිටින බවට බම්බලපිටිය පොලිසියට අනුයුක්ත බස්නාහිර පළාත් බුද්ධි නිලධාරියකුට ලද තොරතුරකට අනුව බස්නාහිර පළාත දකුණ අපරාධ කොට්ඨාසයට අනුයුක්ත විශේෂ විමර්ශන කණ්ඩායමක් මඟින් සැකකරුවන් දෙදෙනා රාජගිරිය ප්‍රදේශයේ ලගුම්හලක සැඟව සිටියදී (11) අත්අඩංගුවට ගත් බව පැවසේ.
මෙසේ අත්අඩංගුවට ගෙන ඇත්තේ අක්මීමන ප්‍රදේශයේ පදිංචි හිටපු යුද හමුදා සෙබළකු ඇතුළු (25 - 38) දෙදෙනකු වන අතර ඔවුන්
පෙරේදා (11) සවස අක්මීමන පොලිසියට භාරදීමට නියමිතව තිබිණි.
සිද්ධිය සම්බන්ධයෙන් බස්නාහිර දකුණ අපරාධ කොට්ඨාසයේ අධ්‍යක්ෂ ජනක කුමාර මහතාගේ අධීක්ෂණය යටතේ ස්ථානාධිපති පොලිස් පරීක්ෂක සුමිත් ජයසිංහ මහතාගේ උපදෙස් මත පොලිස් පරීක්ෂක වීරසිංහ මහතාගේ මෙහෙයවීමෙන් පො.සැ. වරුන් වන (32053) කොඩිකාර, (40793) තෙන්නකෝන්, (36410) ගාමිණී, පො.කො. වරුන් වන (23191) තිසේරා, (86593) පසිඳු, (94891) චතුරංග, (31612) ආරියරත්න, පො.කො.රි (14802) ලියනාරච්චි ඇතුළු නිලධාරීහු වැටලීම සිදුකොට ඉදිරි පරීක්ෂණ පවත්වති.
කොට්ටාව - ප්‍රදීප් කුමාර
0 Comments